കോഴിക്കോട്: ഇ.ഡി.യുടെ കത്ത് എന്ന പേരില്‍ പുറത്തുവരുന്ന വാര്‍ത്തകള്‍ തന്നെ ബോധപൂര്‍വ്വം വ്യക്തിപരമായി മോശമാക്കാനുള്ള ശ്രമമെന്ന് പ്രതികരിച്ച് മുന്‍മന്ത്രി മുഹമ്മദ് റിയാസ്. സിപിഐഎമ്മിന്റെ പരിപാടി നടക്കുന്ന ഇന്നത്തെ ദിവസം തന്നെ ഈ കഥ പുറത്തുവിടാന്‍ തെരഞ്ഞെടുത്തിരിക്കുന്നത് ബോധപൂര്‍വ്വമാണെന്നും സുപ്രധാന തെളിവുകള്‍ ഈ രീതിയില്‍ പുറത്തുവിടുമോയെന്നും റിയാസ് ചോദിച്ചു.
'നമ്മള്‍ബേപ്പൂര്‍' എന്ന വാട്‌സാപ്പ്ഗ്രൂപ്പ് മണ്ഡലത്തിലെ വികസനപ്രവര്‍ത്തനങ്ങള്‍ക്കായി ഉണ്ടാക്കിയ ഗ്രൂപ്പ്. അതില്‍ മാധ്യമപ്രവര്‍ത്തകര്‍ ഉള്‍പ്പെടെ സമൂഹത്തിലെ സമസ്ത മേഖലകളിലെയും ആള്‍ക്കാര്‍ ഉണ്ടെന്നും പറഞ്ഞു. ആ ഗ്രൂപ്പ് സംബന്ധിച്ച പരിശോധനകള്‍ നടത്തി സ്ഥിരീകരിക്കാം. ഹവാല എന്ന നിലയില്‍ തന്നെ കണക്ട് െചയ്യാനുള്ള ശ്രമം മുമ്പും ഉണ്ടായിട്ടുണ്ട്. അത് പൊളിയുകയും ചെയ്തിട്ടുണ്ട്.
ഇ.ഡി. പുതിയ കഥ മെനയുകയാണ്. ഇപ്പോഴത്തെ വാര്‍ത്തകള്‍ നല്ല ഒന്നാന്തരം തിരക്കഥയാണ്. അത് എഴുതിയയാള്‍ക്ക് ദേശീയ അവാര്‍ഡ് നല്‍കണം. ഹവാല പണം വീണ സമ്മതിച്ചു എന്ന രീതിയിലുള്ള വാര്‍ത്ത ശുദ്ധ അസംബന്ധമാണ്. ഭാവിയിലെ ബിസിനസ് ആരംഭിക്കുന്നതിനായി എഴുതിയിട്ടുള്ള കുറിപ്പാണ് കള്ളപ്പണവുമായി ബന്ധപ്പെട്ടത് എന്ന രീതിയില്‍ പ്രചരിപ്പിക്കുന്നത്.
നേരത്തേ ഇ.ഡി. നടത്തിയ റെയ്ഡില്‍ വെച്ച് ആരും കള്ളപ്പണമാണെന്ന് പറഞ്ഞിട്ടില്ല. ഭാവിയിലെ ബിസിനസ് കാര്യം കടലാസില്‍ എഴുതിയതാണ്. അതിനെ റെഡ്ബുക്ക് എന്ന പേരില്‍ പ്രചരിപ്പിക്കുകയാണ്. വീട്ടിലും കൊച്ചി ഓഫീസില്‍ രണ്ടുതവണയും ഉള്‍പ്പെടെ ഇ.ഡി. വീണയെ മൂന്ന് തവണ ചോദ്യം ചെയ്തിട്ടുണ്ട്. അതില്‍ ഹവാലയുമായി ബന്ധപ്പെട്ട ഒരു ചോദ്യവും ചോദിച്ചിട്ടില്ല. കേസിനെ നിയമപരമായി നേരിടുമെന്നും പറഞ്ഞു.
Comments