മുംബൈയിലെ ഗണപതി വിഗ്രഹത്തിന് 703.27 കോടി രൂപയുടെ ഇൻഷുറൻസ്! ഉത്സവ വിഗ്രങ്ങൾക്കുള്ള ഏറ്റവും വലിയ ഇൻഷുറൻസ് തുക

മുംബൈ: ഒരു ഗണപതി വിഗ്രഹത്തിന് 703.27 കോടി രൂപയുടെ ഇൻഷുറൻസോ? നാം സ്വപ്നത്തിൽ പോലും ചിന്തിക്കാത്ത ഒരു കാര്യമാണ് ഇതെങ്കിലും സംഭവം സത്യമാണ്. മുംബൈയിലെ ജിഎസ്ബി സേവാ മണ്ഡൽ ഗണപതിക്ക് ആണ് റിക്കോർഡ് തുകയായ 703.27 കോടി രൂപയുടെ ഇൻഷുറൻസ് ഏർപ്പെടുത്തിയിരിക്കുന്നത്.

ഈ വർഷം ഗണേശോത്സവത്തിന് ഒരുക്കിയ ഇന്ത്യയിലെ ഏറ്റവും സമ്പന്നവും സുരക്ഷിതവുമായ ഉത്സവ വിഗ്രഹങ്ങളിൽ ഒന്നാണിത്. സ്വർണവും വെള്ളിയും വിലപിടിപ്പുള്ള ആഭരണങ്ങളും കൊണ്ട് അലങ്കരിച്ച ഈ വിഗ്രഹം, മണ്ഡലത്തിന്റെ വിപുലവും ഭക്തിനിർഭരവുമായ ആഘോഷങ്ങളുടെ കേന്ദ്രബിന്ദുവാണ്.

മുംബൈയിലെ ജിഎസ്ബി സേവാ മണ്ഡൽ ഗണപതിയെക്കുറിച്ച് പ്രത്യേകം ആമുഖം ആവശ്യമില്ല. വിപുലമായ അലങ്കാരങ്ങൾക്കും സ്വർണാഭരണങ്ങൾക്കും ഒരിക്കലും കുറയാത്ത ഭക്തജനത്തിരക്കിനും പേരുകേട്ട, നഗരത്തിലെ ഏറ്റവും പ്രശസ്തമായ വിഗ്രഹങ്ങളിൽ ഒന്നാണിത്. 2026-ലെ ഗണേഷ്‌ത്സവത്തിന് മുന്നോടിയായി, മഹാഗണപതി വിഗ്രഹത്തിനും അതുമായി ബന്ധപ്പെട്ട എല്ലാ വിലപിടിപ്പുള്ള വസ്തുക്കൾക്കും റെക്കോർഡ് ഇൻഷുറൻസ് കവർ പ്രഖ്യാപിച്ചുകൊണ്ട് മണ്ഡൽ വീണ്ടും വാർത്തകളിൽ ഇടം നേടിയിരിക്കുകയാണ്.

2026-ലെ ഗണേശോത്സവത്തിനായി മണ്ഡൽ തങ്ങളുടെ വിഗ്രഹത്തിനും വിലപിടിപ്പുള്ള വസ്തുക്കൾക്കും ഞെട്ടിപ്പിക്കുന്ന രീതിയിൽ 703.27 കോടി രൂപയുടെ ഇൻഷുറൻസ് എടുത്തു. ഇന്ത്യയിലെവിടെയുമുള്ള ഉത്സവ വിഗ്രഹങ്ങൾക്ക് ലഭിക്കുന്ന ഏറ്റവും ഉയർന്ന ഇൻഷുറൻസ് തുകകളിൽ ഒന്നാണിത്. കഴിഞ്ഞ വർഷങ്ങളെ അപേക്ഷിച്ച് തുക വർദ്ധിച്ചിട്ടുണ്ട്; സ്വർണ്ണത്തിന്റെയും വെള്ളിയുടെയും വിലപിടിപ്പുള്ള ആഭരണങ്ങളുടെയും വില കൂടുന്നതും അലങ്കാരങ്ങളുടെ ഘടനയും ഇതിന് കാരണമാണ്.

ഈ വർഷം മഹാഗണപതി 66 കിലോഗ്രാമിലധികം സ്വർണാഭരണങ്ങളും, 335 കിലോഗ്രാമിലധികം വെള്ളിയും, ഒപ്പം ധാരാളം വിലപിടിപ്പുള്ള രത്നങ്ങളും അണിഞ്ഞിരിക്കുന്നു. ഇതിലെ പല വസ്തുക്കളും പുതിയതായി വാങ്ങിയതല്ല, മറിച്ച് വർഷങ്ങളായി ഭക്തരും മണ്ഡൽ അംഗങ്ങളും സംഭാവന ചെയ്തതാണ്.