ന്യൂഡല്‍ഹി: വിമര്‍ശനങ്ങള്‍ ഉണ്ടായാലും ഇല്ലെങ്കിലും അറിഞ്ഞുകൊണ്ടുതന്നെ ആക്രമിച്ചു കളിക്കുക എന്നതാണ് തന്റെ രീതിയെന്ന് സഞ്ജു വി സാംസണ്‍. രാജ്യത്തിനായി കളിക്കുമ്പോള്‍ പരമാവധി റണ്‍സ് കണ്ടെത്തി സംഭാവന നല്‍കുക എന്നതാണ് തന്റെ രീതിയെന്നും പറഞ്ഞു. ഇന്നലെ അഫ്ഗാനിസ്ഥാനെതിരേ രണ്ടാം ടി20 മത്സരത്തില്‍ അര്‍ദ്ധശതകം കുറിച്ച ശേഷമായിരുന്നു പ്രതികരണം.
അഫ്ഗാനിസ്ഥാനെതിരായ രണ്ടാം ടി20 മത്സരത്തില്‍ 22 പന്തില്‍ 57 റണ്‍സ് അടിച്ച് കൂട്ടി ടീമിന്റെ വിജയത്തില്‍ നിര്‍ണായക പങ്കുവഹിച്ച താരം വൈഭവ് സൂര്യവംശിയുമായും അഭിഷേക് ശര്‍മയുമായുള്ള മത്സരത്തെക്കുറിച്ച് മനസു തുറന്നു. ഐപിഎല്ലില്‍ 700-ഓളം റണ്‍സ് നേടിയ 15 കാരന് ടീമില്‍ അവസരം നല്‍കേണ്ടത് അനിവാര്യമാണ്. ആ പരമ്പരയ്ക്ക് മുമ്പ് അവന്‍ മികച്ച ഫോമിലായിരുന്നു. ഒരു നായകന്‍ എന്ന നിലയില്‍ ചിന്തിക്കുമ്പോള്‍ അന്നത്തെ തീരുമാനം തികച്ചും ന്യായമായിരുന്നു.
എല്ലാവരും മികച്ച ഫോമിലുള്ളപ്പോള്‍ ടീമിനെ തെരഞ്ഞെടുക്കുന്നത് മാനേജ്മെന്റിനും ക്യാപ്റ്റനും സെലക്ടര്‍മാര്‍ക്കും അത്ര എളുപ്പമല്ല. ഒരു ടീമിനെ നയിച്ച ആളെന്ന നിലയില്‍ ഈ തീരുമാനങ്ങളുടെ ബുദ്ധിമുട്ട് തനിക്ക് കൃത്യമായി അറിയാം. വ്യക്തിഗത നേട്ടങ്ങളേക്കാള്‍ രാജ്യത്തിന്റെ വിജയത്തി നാണ് മുന്‍ഗണന. രാജ്യത്തിന്റെ വിജയത്തിനായാണ് എല്ലാവരും കളിക്കുന്നത്. സ്ഥിരതയില്ലായ്മയുടെ പേരില്‍ ഉയരുന്ന വിമര്‍ശനങ്ങ ള്‍ക്കും മറുപടി നല്‍കി. മത്സരങ്ങള്‍ പരാജയപ്പെടുമ്പോള്‍ അത് നിങ്ങളെ മാനസികമായി ബാധിക്കുമെന്നും അവിടെ അനുഭവസമ്പത്ത് തുണയ്ക്കുമെന്നും താരം പറഞ്ഞു. പരാജയങ്ങള്‍ക്ക് ശേഷം ടീമില്‍ തുടരുക എന്നത് ഏതൊരു ഇന്ത്യന്‍ ക്രിക്കറ്റര്‍ക്കും വലിയ വെല്ലുവിളിയാണെന്ന് സഞ്ജു അഭിപ്രായപ്പെട്ടു.
2015-ല്‍ അരങ്ങേറ്റം കുറിച്ച സഞ്ജു 68 ടി20 മത്സരങ്ങളില്‍ മാത്രമാണ് ഇതുവരെ കളിച്ചത്. 11 വര്‍ഷത്തെ കരിയറിനിടയില്‍ നിരന്തരമായ പരീക്ഷണങ്ങളിലൂടെയാണ് താരം കടന്നുപോയത്. ടി20 ലോകകപ്പില്‍ മാന്‍ ഓഫ് ദി സീരീസ് പുരസ്‌കാരം നേടിയിട്ട് പോലും തൊട്ടടുത്ത ഇംഗ്ലണ്ട് പര്യടനത്തില്‍ സഞ്ജുവിന് ബെഞ്ചിലിരിക്കേണ്ടി വന്നിരുന്നു.
Comments