ടോക്കിയോ: ദുര്‍ബ്ബലരായ ജപ്പാനെ പരാജയപ്പെടുത്തി 2026 ഏഷ്യന്‍ ഗെയിംസ് വനിതാ ക്രിക്കറ്റില്‍ ഇന്ത്യ സെമിയില്‍. ക്വാര്‍ട്ടര്‍ ഫൈനലില്‍ നിലവിലെ ചാമ്പ്യന്മാരായ ഇന്ത്യ ആതിഥേയരായ ജപ്പാനെ എട്ടുവിക്കറ്റിന് പരാജയപ്പെടുത്തി. ഇരു രാജ്യങ്ങളും തമ്മിലുള്ള ആദ്യ അന്താരാഷ്ട്ര ട്വന്റി20 പോരാട്ടത്തില്‍ 90 പന്തുകള്‍ ബാക്കി നില്‍ക്കേയാണ് ഇന്ത്യ വിജയിച്ചത്. ജപ്പാന്‍ ഉയര്‍ത്തിയ 57 റണ്‍സിന്റെ വിജയലക്ഷ്യം ഇന്ത്യ 5 ഓവറില്‍ മറികടന്നു.
ജപ്പാന്‍ ഓപ്പണര്‍മാരായ അയാക്ക കാറ്റോ-സ്റ്റാഫോര്‍ഡും ഹരുണ ഇവാസാക്കിയും പവര്‍പ്ലേ മുഴുവന്‍ വിക്കറ്റ് പോകാതെ പിടിച്ചുനിന്നെങ്കിലും, ഇന്ത്യന്‍ സ്പിന്നര്‍മാരായ ശ്രീ ചരണി, ദീപ്തി ശര്‍മ്മ, ഷെഫാലി വര്‍മ്മ എന്നിവര്‍ ചേര്‍ന്ന് എതിരാളികളെ തകര്‍ത്തെറിഞ്ഞു. രണ്ട് പന്തില്‍ രണ്ട് വിക്കറ്റ് വീഴ്ത്തിയ ശ്രീ ചരണി, രണ്ട് മെയ്ഡന്‍ ഓവറുകള്‍ ഉള്‍പ്പെടെ 10 റണ്‍സിന് 4 വിക്കറ്റ് നേടി ഏഷ്യന്‍ ഗെയിംസ് ചരിത്രത്തിലെ ഒരു ഇന്ത്യന്‍ താരത്തിന്റെ മികച്ച ബോളിംഗ് പ്രകടനം കുറിച്ചു. രണ്ടു ഏഷ്യന്‍ ഗെയിംസ് പതിപ്പുകളില്‍ വിക്കറ്റ് നേടുന്ന ആദ്യ ഇന്ത്യന്‍ താരമായി ദീപ്തി ശര്‍മ്മ മാറി.
റണ്‍ ചേസില്‍, വനിതാ ട്വന്റി20യില്‍ ഒരു ഐ.സി.സി പൂര്‍ണ്ണ അംഗത്വ രാജ്യത്തിനെതിരെ ജപ്പാന്റെ ചരിത്രപരമായ ആദ്യ രണ്ട് വിക്കറ്റുകള്‍ നോനോഹ യാസുമാറ്റോയും കാറ്റോ-സ്റ്റാഫോര്‍ഡും സ്വന്തമാക്കി. ഒടുവില്‍ 15 പന്തില്‍ പുറത്താകാതെ 40 റണ്‍സ് അടിച്ചുകൂട്ടിയ ഷെഫാലി വര്‍മ്മ ഇന്ത്യയെ വന്‍ വിജയത്തിലേക്ക് നയിച്ചു. ജപ്പാന്‍താരം അയാകോ കാട്ടോ 40 പന്തുകളില്‍ 25 റണ്‍സ് എടുത്തിരുന്നു.
Comments