ട്രെയിനിൽ ടിക്കറ്റ് പരിശോധനയ്ക്കിടെ യാത്രക്കാരിയായ യുവതി നടത്തിയ നാടകീയ രംഗങ്ങളുടെ വീഡിയോ സോഷ്യൽ മീഡിയയിൽ വൈറലാകുന്നു. എക്സ്പ്രസ് ട്രെയിനിൽ ടിക്കറ്റ് ആവശ്യപ്പെട്ട ടി.ടി.ഇയുമായി തർക്കത്തിലേർപ്പെട്ട യുവതി പിന്നീട് സ്വന്തം വസ്ത്രം കീറിയെന്നാണ് പുറത്തുവന്ന ദൃശ്യങ്ങളിലെ ആരോപണം. സംഭവത്തിന്റെ കൃത്യമായ സ്ഥലം, യുവതിയുടെയും ടി.ടി.ഇയുടെയും വ്യക്തിവിവരങ്ങൾ എന്നിവ സ്വതന്ത്രമായി സ്ഥിരീകരിച്ചിട്ടില്ല.
ടി.ടി.ഇ ടിക്കറ്റ് ആവശ്യപ്പെട്ടതോടെയാണ് തർക്കം ആരംഭിച്ചതെന്നാണ് റിപ്പോർട്ട്. യുവതിക്ക് സാധുവായ ടിക്കറ്റ് ഉണ്ടായിരുന്നില്ലെന്നും പകരം പണം നൽകാൻ ശ്രമിച്ചെന്നും അവകാശപ്പെടുന്നുണ്ട്. താൻ റെയിൽവേ ജീവനക്കാരന്റെ സഹോദരിയാണെന്നും യുവതി പറഞ്ഞതായി വീഡിയോയ്ക്കൊപ്പമുള്ള വിവരങ്ങളിൽ പറയുന്നു. തുടർന്ന് തർക്കം കൂടുതൽ രൂക്ഷമാവുകയായിരുന്നു.
സംഭാഷണത്തിനിടെ യുവതി ഫോണിൽ സഹോദരനുമായി സംസാരിക്കുകയും ടി.ടി.ഇ തന്നെ ഉപദ്രവിക്കാൻ ശ്രമിക്കുന്നതായി ആരോപിക്കുകയും ചെയ്തതായി റിപ്പോർട്ടിലുണ്ട്. പിന്നാലെയാണ് സ്വന്തം വസ്ത്രം കീറുന്ന നിലയിലേക്ക് സംഭവമെത്തിയത്. ടി.ടി.ഇ തന്നെ മോശമായി സ്പർശിച്ചെന്നും ഉപദ്രവിക്കാൻ ശ്രമിച്ചെന്നും യുവതി ആരോപിക്കുന്നതും ദൃശ്യങ്ങളിൽ കേൾക്കാം. അതേസമയം, ടി.ടി.ഇ നേരത്തെ തന്നെ സംഭവങ്ങൾ മൊബൈൽ ഫോണിൽ റെക്കോർഡ് ചെയ്തിരുന്നതായും റിപ്പോർട്ടുണ്ട്.
വീഡിയോ വൈറലായതിന് പിന്നാലെ റെയിൽവേ സേവ അധികൃതർ സംഭവത്തിൽ കൂടുതൽ വിവരങ്ങൾ ആവശ്യപ്പെട്ടിട്ടുണ്ട്. യാത്രക്കാരോട് പി.എൻ.ആർ വിവരങ്ങളും മൊബൈൽ നമ്പറും പങ്കുവെക്കാനും റെയിൽമാഡ് വഴിയോ 139 എന്ന ഹെൽപ്‌ലൈൻ നമ്പറിലൂടെയോ പരാതി നൽകാനും അധികൃതർ നിർദേശിച്ചു. സംഭവവുമായി ബന്ധപ്പെട്ട ഔദ്യോഗിക പരാതിയുടെ അന്തിമ സ്ഥിതിയും കൃത്യമായ സ്ഥലവും നിലവിൽ സ്ഥിരീകരിച്ചിട്ടില്ല.
Comments