മലപ്പുറം: കേരള സർവകലാശാലയ്ക്ക് കീഴിലെ കോളേജുകളിൽ വിദ്യാർഥി രാഷ്ട്രീയം വിലക്കാനുള്ള നീക്കത്തിനെതിരെ പ്രതിഷേധം ശക്തമാകുന്നതിനിടെ പ്രതികരണവുമായി താനൂർ എംഎൽഎ പി കെ നവാസ്. രാജ്ഭവന്റെ അജണ്ട നടപ്പാക്കാനുള്ള ഇടമല്ല കേരള സർവകലാശാലയെന്നും കലാലയ രാഷ്ട്രീയത്തെ ഇല്ലാതാക്കുന്ന തരത്തിലുള്ള നീക്കങ്ങൾ അംഗീകരിക്കില്ലെന്നും പി കെ നവാസ് ഫേസ്ബുക്ക് കുറിപ്പിൽ വ്യക്തമാക്കി.
ക്യാമ്പസുകൾ ക്ലാസ് മുറികളിൽ മാത്രം ഒതുങ്ങുന്നതല്ലെന്ന് പി കെ നവാസ് പറഞ്ഞു. ചോദ്യങ്ങളും വിയോജിപ്പുകളും സംവാദങ്ങളും സമരങ്ങളും രാഷ്ട്രീയ ഇടപെടലുകളും ക്യാമ്പസുകളുടെ ഭാഗമാണ്. അതാണ് ജനാധിപത്യത്തിന്റെ ശ്വാസമെന്നും അദ്ദേഹം കുറിച്ചു.
വ്യാജപ്രവർത്തനങ്ങളെയും അക്രമങ്ങളെയും സമരാഭാസങ്ങളെയും ന്യായീകരിക്കേണ്ടതില്ലെന്നും അദ്ദേഹം വ്യക്തമാക്കി. എന്നാൽ ആയുധവും ചോരയും അക്രമവും ചേർത്ത് വിദ്യാർഥി രാഷ്ട്രീയത്തെ മലിനപ്പെടുത്തുന്നവർക്കെതിരെ മെറിറ്റിന്റെ അടിസ്ഥാനത്തിൽ കൃത്യമായ നടപടി സ്വീകരിക്കണമെന്നും പി കെ നവാസ് ആവശ്യപ്പെട്ടു.
Comments