ന്യൂഡൽഹി: തുറമുഖങ്ങളിലെ ഉപരോധം അവസാനിപ്പിക്കുകയും സൈനിക സമ്മർദ്ദം കുറയ്ക്കുകയും ചെയ്താൽ ഏഴ് ദിവസത്തിനുള്ളിൽ ഹോർമുസ് കടലിടുക്ക് തുറക്കാൻ ഇറാൻ തയ്യാറാണെന്ന് റിപ്പോർട്ടുകൾ. അതേസമയം, വാർത്താ ചാനലായ എൻബിസിക്ക് നൽകിയ അഭിമുഖത്തിൽ യുഎൻ പൊതുസഭയിൽ വെച്ച് ഇറാനുമായി സംസാരിക്കാൻ അമേരിക്ക തയ്യാറാണെന്ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോ വ്യക്തമാക്കി. ക്രിയാത്മകമായ ഫലങ്ങളിലേക്ക് നയിക്കാൻ സാധ്യതയുള്ളതാണെങ്കിൽ, അത്തരത്തിലുള്ള ചർച്ചകൾക്ക് തീർച്ചയായും തുറന്ന സമീപനമാണ് സ്വീകരിക്കുന്നതെന്നാണ് റൂബിയോ അഭിപ്രായപ്പെട്ടത്.
യുഎൻ പൊതുസഭയിൽ പങ്കെടുക്കാനായി ന്യൂയോർക്കിലെത്തിയിട്ടുള്ള ഇറാനിയൻ പ്രതിനിധി സംഘത്തിന് അമേരിക്കയുമായുള്ള നയതന്ത്ര ബന്ധം പുനരുജ്ജീവിപ്പിക്കുന്നതിനുള്ള പൂർണ്ണ അധികാരമുണ്ടെന്ന് ഒരു മുതിർന്ന ഇറാനിയൻ ഉദ്യോഗസ്ഥൻ പറഞ്ഞു. യുഎസിനെ സംബന്ധിച്ച് നയതന്ത്രത്തിലേക്ക് മടങ്ങിവരാനുള്ള സുവർണ്ണ അവസരമാണ് യുഎൻ പൊതുസഭ. പ്രശ്നം നയതന്ത്രപരമായി പരിഹരിക്കാൻ ആഗ്രഹിക്കുന്നുവെന്ന് യുഎസ് ഔദ്യോഗികമായി പ്രഖ്യാപിക്കുകയും, തുടർനടപടികൾ എങ്ങനെ മുന്നോട്ട് കൊണ്ടുപോകണം എന്നതിനുള്ള സമയക്രമത്തിൽ ധാരണയിലെത്തുകയും വേണമെന്നും ഇറാനിയൻ ഉദ്യോഗസ്ഥൻ അഭിമുഖത്തിൽ പറഞ്ഞു.
പ്രാദേശിക രാജ്യങ്ങളുടെ പിന്തുണയോടെ പുതിയ ആക്രമണങ്ങൾക്ക് യുഎസ് പദ്ധതിയിടുന്നതായി ഇറാനിയൻ സൈന്യത്തിന് വിവരം ലഭിച്ചതിന് പിന്നാലെയാണ് ഈ പ്രസ്താവനകൾ വന്നിരിക്കുന്നത്.ആസൂത്രിതമായ ആക്രമണങ്ങളുമായി യുഎസ് മുന്നോട്ട് പോയാൽ യാതൊരു പരിധികളുമില്ലാതെ തിരിച്ചടിക്കുമെന്ന് ഞായറാഴ്ച ഇറാനിയൻ സൈനിക നേതൃത്വം മുന്നറിയിപ്പ് നൽകിയിരുന്നു.
യുഎൻ പൊതുസഭയിൽ വെച്ച് ഇറാൻ പ്രസിഡന്റ് മസൂദ് പെസെഷ്കിയൻ യുഎസ് പ്രസിഡന്റ് ഡൊണാൾഡ് ട്രംപുമായി കൂടിക്കാഴ്ച നടത്തുകയില്ലെന്ന് ഇറാനിയൻ ഉദ്യോഗസ്ഥൻ വ്യക്തമാക്കി. മാത്രമല്ല, പെസെഷ്കിയന്റെ സംഘത്തിന്റെ സഞ്ചാരസ്വാതന്ത്ര്യം യുഎസ് സർക്കാർ കർശനമായി പരിമിതപ്പെടുത്തിയിട്ടുണ്ട്. മാധ്യമ സംഘത്തിലെ അംഗങ്ങൾക്ക് വിസ നിഷേധിച്ചതായും, വാഷിംഗ്ടണിന്റെ ഭാഗത്തുനിന്നുള്ള മുൻകാലങ്ങളിൽ ഉണ്ടാകാത്ത തരത്തിലുള്ള ശത്രുതാപരമായ നടപടിയാണിതെന്നും ഔദ്യോഗിക വാർത്താ ഏജൻസിയായ ഇർന വിശേഷിപ്പിച്ചു. എന്നാൽ, ന്യൂയോർക്കിലെ യോഗത്തിനായി എത്തുന്ന ഇറാനിയൻ വിദേശകാര്യ മന്ത്രി അബ്ബാസ് അരാഗ്ചിയ്ക്ക് യുഎസ് സ്റ്റേറ്റ് ഡിപ്പാർട്ട്മെന്റ് സുരക്ഷാ സേവനം നൽകുന്നുണ്ട്.
കഴിഞ്ഞ ജൂലൈ 14-നാണ് ഇറാനിയൻ തുറമുഖങ്ങളിലും തീരപ്രദേശങ്ങളിലും യുഎസ് സൈന്യം ഉപരോധം വീണ്ടും കർശനമാക്കിയത്. അമേരിക്കയും ഇറാനും തമ്മിലുള്ള സംഘർഷത്തിലെ പ്രധാന പോർമുനയായി ഹോർമുസ് കടലിടുക്ക് മാറിയിരിക്കുന്നു. ആഗോള ഊർജ്ജ കയറ്റുമതിയുടെ നിർണ്ണായക പാതയായ ഈ തന്ത്രപ്രധാന ജലപാതയിലെ ഗതാഗത നിയന്ത്രണങ്ങൾ, അന്താരാഷ്ട്ര വ്യാപാരത്തിലും എണ്ണ വിതരണത്തിലും കൂടുതൽ തടസ്സങ്ങൾ ഉണ്ടാകുമെന്ന ആശങ്ക വർദ്ധിപ്പിച്ചിട്ടുണ്ട്.
Comments