തിരുവനന്തപുരം: കോൺഗ്രസ് നേതൃത്വവും പോഷക സംഘടനകളും തമ്മിലുള്ള ഭിന്നത രൂക്ഷമാകുന്നു. ബോർഡ്-കോർപ്പറേഷൻ സ്ഥാനങ്ങളുടെ വിഭജന ചർച്ചകളിൽ മഹിളാ കോൺഗ്രസിനെ പൂർണ്ണമായും അവഗണിച്ചതിൽ പ്രതിഷേധിച്ച് എ.ഐ.സി.സി നേതൃത്വത്തിന് മഹിളാ കോൺഗ്രസ് നേതൃത്വം പരാതിക്കത്ത് നൽകി . ഉടൻ തന്നെ കെ.പി.സി.സി എക്സിക്യൂട്ടീവ് യോഗം വിളിച്ചു ചേർക്കാൻ നിർദ്ദേശം നൽകണമെന്ന് ആവശ്യപ്പെട്ടാണ് എ.ഐ.സി.സിയെ സമീപിച്ചിരിക്കുന്നത്.
മഹിളാ കോണ്‍ഗ്രസ് നല്‍കിയ നോമിനികളെ അല്ല പരിഗണിക്കുന്നതെന്നതാണ് അതൃപ്തിക്ക് കാരണം. സര്‍ക്കാരിന്റെ നയപരമായ കാര്യങ്ങളിലും മഹിളാ കോണ്‍ഗ്രസിന് വിമര്‍ശനമുണ്ട്. സാംസ്‌കാരിക വകുപ്പില്‍ അടക്കമുള്ള നിയമനങ്ങള്‍ മഹിളാ കോണ്‍ഗ്രസിന്റെ താല്‍പര്യത്തിന് വിരുദ്ധമായിരുന്നു. ഇനി നടക്കാനിരിക്കുന്ന നിയമനങ്ങളില്‍ എങ്കിലും കൃത്യമായ പ്രാതിനിത്യം ഉണ്ടാകണമെന്നാണ് ആവശ്യം
പാർട്ടിക്ക് ഉള്ളിൽ ജനാധിപത്യപരമായ ചർച്ചകൾ നടക്കുന്നില്ലെന്നും സംഘടനാപരമായ തീരുമാനങ്ങൾ ഏകപക്ഷീയമായാണ് കൈക്കൊള്ളുന്നതെന്നുമാണ് ആരോപണം. സ്ത്രീ പ്രാതിനിധ്യം ഉറപ്പാക്കേണ്ട ഘട്ടങ്ങളിൽ പോലും സംഘടനാ നേതൃത്വം തങ്ങളെ പരിഗണിക്കുന്നില്ലെന്ന രൂക്ഷമായ അതൃപ്തിയിലാണ് മഹിളാ കോൺഗ്രസ് ഭാരവാഹികൾ.ബോർഡ്-കോർപ്പറേഷൻ പദവികൾ പങ്കുവെക്കുന്നതുമായി ബന്ധപ്പെട്ട് മുതിർന്ന നേതാക്കളുടെ നേതൃത്വത്തിൽ ചർച്ചകൾ പുരോഗമിക്കുമ്പോഴും പോഷക സംഘടനയായ മഹിളാ കോൺഗ്രസിൻ്റെ പ്രാതിനിധ്യം പൂർണ്ണമായും തഴയപ്പെട്ടു.
അതേസമയം കോണ്‍ഗ്രസില്‍ എല്ലാവര്‍ക്കും അഭിപ്രായ സ്വാതന്ത്ര്യമുണ്ടെന്നും മുന്‍കാലങ്ങളിലും അഭിപ്രായങ്ങള്‍ തുറന്നുപറഞ്ഞിട്ടുണ്ടെന്നുമാണ് അടൂര്‍ പ്രകാശിന്റെ വാര്‍ത്താ സമ്മേളനത്തെ സംബന്ധിച്ച് ദീപ്തി മേരി വര്‍ഗീസ് പ്രതികരിച്ചത്. പ്രശ്‌നങ്ങളുണ്ടെങ്കില്‍ നേതൃത്വം ചര്‍ച്ചചെയ്യണം. മുഖ്യമന്ത്രിയോടും നേതൃത്വത്തോടും ചോദ്യങ്ങള്‍ ചോദിക്കാം. വിമര്‍ശിക്കുകയും തിരുത്തുകയും ചെയ്യുന്ന ജനാധിപത്യരീതി കോണ്‍ഗ്രസില്‍ ഉണ്ടെന്നും ദീപ്തി പ്രതികരിച്ചു.
Comments