കൊച്ചി: സ്പായില്‍ ജോലി വാഗ്ദാനം ചെയ്ത് കൂട്ടബലാത്സംഗത്തിന് ഇരയാക്കിയ സംഭവത്തില്‍ ഇനി പിടിയിലാകാനുള്ളത് ജോലിക്കായി യുവതിയെ വിളിച്ചുവരുത്തിയ യുവതിയും രക്ഷപ്പെടാന്‍ ശ്രമിച്ചപ്പോള്‍ യുവതിയെ തടഞ്ഞുവെച്ച യുവാവും. ഇതില്‍ ഒരാള്‍ സ്ത്രീയാണോ ട്രാന്‍സ്ജെന്‍ഡറാണോ എന്ന കാര്യത്തില്‍ സംശയമുണ്ട്. പ്രതികള്‍ സെക്സ് മാഫിയയിലെ കണ്ണികളാണെന്ന സംശയവും പോലീസിനുണ്ട്.
നേരിട്ടത് ക്രൂരമായ പീഡനമായിരുന്നു. താന്‍ നേരിട്ട ദുരനുഭവത്തിന്റെ ആഘാതത്തില്‍ ആയിരുന്ന യുവതി, പരാതി നല്‍കാനുള്ള മാനസികാവസ്ഥയില്‍ അല്ലായിരുന്നു. തുടര്‍ന്ന് യുവതിയുടെ കൂട്ടുകാരാണ് പരാതി നല്‍കിയത്. വെള്ളി, ശനി ദിവസങ്ങളിലായാണ് സംഭവം നടക്കുന്നത്. അതിജീവിതയുടെ വൈദ്യപരിശോധന നടത്തി. സ്പായില്‍ മാനേജര്‍ തസ്തികയിലേക്ക് ആളെ വേണം എന്ന് ഓണ്‍ലൈന്‍ പ്ലാറ്റ്ഫോമായ ഒഎല്‍എക്സില്‍ പരസ്യം കണ്ടാണ് യുവതി സ്പാ നടത്തിപ്പുകാരായ പ്രതികളെ ബന്ധപ്പെട്ടത്.
തുടര്‍ന്ന് ജോലിക്കായുള്ള അഭിമുഖത്തിനായി ഇടപ്പള്ളിയിലെ ലോഡ്ജിലെത്തി. അഭിമുഖത്തിന് ശേഷം മടങ്ങിയ യുവതിയെ പ്രതികള്‍ വൈകുന്നേരം വീണ്ടും ലോഡ്ജിലേക്ക് വിളിച്ചുവരുത്തി. തുടര്‍ന്ന് യുവതിക്ക് ഇവര്‍ മദ്യവും രാസലഹരിയും നല്‍കി ബലാത്സംഗം ചെയ്യുകയും ദൃശ്യങ്ങള്‍ റെക്കോഡ് ചെയ്യുകയുമായിരുന്നു. ശരീരത്തില്‍ ലൈംഗികാതിക്രമത്തിന്റെ ഭാഗമായുള്ള പരിക്കുകളുണ്ടായിരുന്നു.
അഭിമുഖത്തിന് ശേഷം ജോലിക്കായി തിരഞ്ഞെടുത്തുവെന്ന് പറഞ്ഞ് ഒരു സ്ത്രീയാണ് തന്നെ വിളിച്ചതെന്നും അതുകൊണ്ടാണ് താന്‍ പോയതെന്നുമാണ് യുവതിയുടെ മൊഴി. സംഭവത്തില്‍ രണ്ടുപേര്‍ ഇതിനകം അറസ്റ്റിലായിട്ടുണ്ട്. കേസില്‍ ആലപ്പുഴ കാര്‍ത്തികപ്പിള്ളി ഇരിക്കാവ് എസ്.ആര്‍. നിവാസില്‍ ശ്രീരാജ് (30), കളമശ്ശേരി തേവയ്ക്കല്‍ കുതിരപ്പറമ്പില്‍ ജിത്ത് മാര്‍ട്ടിന്‍ (27) എന്നിവരെയാണ് കളമശ്ശേരി പോലീസ് അറസ്റ്റ് ചെയ്തത്. രണ്ട് പേരേയും റിമാന്‍ഡ് ചെയ്തു.
Comments