കോട്ടയം: നിയമ പഠനമാകാം, പക്ഷേ വക്കാലത്തുമായി കോടതിയിലേക്കു പോകേണ്ടെന്ന് വിദ്യാര്ഥികളോട് എം.ജി. സര്വകലാശാല. 30 വയസിനു മുകളില് പ്രായമുള്ളവര് എല്എല്.ബി. കോഴ്സ് പഠിക്കണമെങ്കില് പഠനത്തിനുശേഷം ഇന്ത്യയിലെ ഒരു കോടതിയിലും വക്കീലായി പ്രാക്ടീസ് ചെയ്യില്ലെന്ന സത്യവാങ്മൂലം നല്കണമെന്ന എം.ജി. സര്വകലാശാല വാദമാണു വിവാദമായിരിക്കുന്നത്.
കോഴ്സിന് ഏതെങ്കിലും സാഹചര്യത്തില് അംഗീകാരം നഷ്ടപ്പെട്ടാല് വിദ്യാര്ഥികള്ക്കു മാത്രമാണ് ഉത്തരവാദിത്വമെന്നും സത്യവാങ്മൂലത്തില് നല്കണമെന്നും സര്വകലാശാല നിബന്ധന വച്ചിട്ടുള്ളതായി വിദ്യാര്ഥികള് ആരോപിച്ചു. സര്വകലാശാലയുടെ നിയമ പഠന വിഭാഗമായ സ്കൂള് ഓഫ് ഇന്ത്യന് ലീഗല് തോട്ടിലെ ത്രിവത്സര സായാഹ്നഹ്ന കോഴ്സില് പഠിക്കുന്ന വിദ്യാര്ഥികളോടാണു സര്വകലാശാലയുടെ നിര്ദേശം.
സത്യവാങ്മൂലം നല്കാത്ത 21 വിദ്യാര്ഥികളെ സര്വകലാശാല പുറത്താക്കി. സായാഹ്നഹ്ന ക്ലാസുകളില് 30 വയസിനു മുകളില് പ്രായമുള്ളവര്ക്കു പ്രവേശനം നല്കാന് പാടില്ലെന്നും പഠനം വിലക്കിയെന്നും ചൂണ്ടിക്കാട്ടി ബാര് കൗണ്സില് നല്കിയ സര്ക്കുലറിന്റെ അടിസ്ഥാനത്തിലാണു സര്വകലാശാലയുടെ ഈ തീരുമാനം. അതിനിടെ 30 വയസിനു മുകളില് പ്രായമുള്ള നാലുപേര് സത്യവാങ്മൂലം നല്കി പഠനം തുടരുന്നുണ്ട്.
എം.ജി. സര്വകലാശാലയുടെ സ്കൂള് ഓഫ് ലീഗല് തോട്ടില് ബാര് കൗണ്സില് ഓഫ് ഇന്ത്യയുടെ അംഗീകാരമുള്ള കോഴ്സ് എന്ന നിലയില് ത്രിവത്സര സായാഹ്നഹ്ന കോഴ്സിലേക്കു പ്രവേശനം നടത്തിയപ്പോള് ഒരു തരത്തിലുള്ള നിബന്ധനകളും ഇല്ലായിരുന്നു. പ്രോസ്പെക്ടസിലും ഇത്തരത്തിലായിരുന്നു. ഈ വര്ഷം പ്രവേശനം നേടിയ 46 പേരില് 25 പേരും 30 വയസിനു മുകളില് പ്രായമുള്ളവരായിരുന്നു.
പ്രവേശന നടപടികള് പൂര്ത്തീകരിച്ച് രണ്ടു മാസത്തിനുശേഷവും ക്ലാസ് തുടങ്ങിയില്ല. തുടര്ന്നു വിദ്യാര്ഥികള് കോടതിയ സമീപിച്ചാണു ക്ലാസ് തുടങ്ങാന് ഉത്തരവ് നേടിയത്. ഇതിനിടെയിലാണു വിചിത്രമായ സത്യവാങ്മൂലം നല്കണമെന്ന് അധികൃതര് വിദ്യാര്ഥികളോട് ആവശ്യപ്പെട്ടത്.ബാര് കൗണ്സിലിന്റെ പ്രായപരിധി സംബന്ധിച്ച തീരുമാനം ഹൈക്കോടതി മരവിപ്പിച്ചതാണെന്നും ഏതു പ്രായത്തിലുള്ളവര്ക്കും നിയമപഠനം സാധ്യമാണെന്നു മാണു വിദ്യാര്ഥികളുടെ നിലപാട്. പ്രോസ്പെക്ടസില് ഇല്ലാത്ത നിബന്ധന പ്രവേശനം നേടിയ വിദ്യാര്ഥികളെ ബാധിക്കില്ലെന്നു തന്നെയാണു വിദ്യാര്ഥികള് പറയുന്നത്. സര്വകലാശാല തീരുമാനം തിരുത്തി, പുറത്താക്കിയവരെ തിരികെ പ്രവേശിപ്പിക്കണമെന്നാവശ്യപ്പെട്ട് സമരത്തിനൊരുങ്ങുകയാണു വിദ്യാര്ഥികള്.
സ്കൂള് ഓഫ് ലീഗല് തോട്ട് അടച്ചുപൂട്ടി സ്വാശ്രയ നിയമ കോളജുകളെ സഹായിക്കാനാണു സര്വകലാശാല ശ്രമിക്കുന്നതെന്നും വിദ്യാര്ഥികള് പത്രസമ്മേളനത്തില് ആരോപിച്ചു. എസ്.എഫ്.ഐ. ജില്ലാ കമ്മറ്റിയും സമരത്തിനു പിന്തുണ പ്രഖ്യാപിച്ചിട്ടുണ്ട്. അധികൃതരുടെ നിലപാടിനെതിരെ ഇന്ന് ഉച്ചകഴിഞ്ഞു രണ്ടിനു വിദ്യാര്ഥികള് സര്വകലാശാല മാര്ച്ചും സംഘടിപ്പിച്ചിട്ടുണ്ട്. പത്രസമ്മേളനത്തില് വിദ്യാര്ഥികളായ ഫാ. ബെന്നി കുഴിയടിയില്, ഡോ. ദീപു ജോസ്, ഡോ. ടി.ആര്. രാജേന്ദ്രന്, ജിബി ആന്റണി, കെ.പി. കാര്ത്തിക്, ജസ്റ്റിന് അഗസ്റ്റിന് എന്നിവര് പങ്കെടുത്തു.
