ദക്ഷിണ കൊറിയൻ റണ്ണിംഗ് ഇൻഫ്ലുവൻസറും ഗവേഷകയുമായ യൂ ജി-വോൺ (25), 2026 ഒക്ടോബർ 11-ന് നടന്ന 'സീയൂൾ റേസ്' ഹാഫ് മാരത്തണിന്റെ ഫിനിഷിംഗ് ലൈനിന് വെറും 500 മീറ്റർ അകലെ കുഴഞ്ഞുവീണ് മരിച്ചു. മാരത്തൺ മൂന്ന് മണിക്കൂറിൽ താഴെ സമയത്തിനുള്ളിൽ ഓടിതീർത്ത് ശ്രദ്ധേയയായ താരമായിരുന്നു ഇവർ. മരണകാരണം ഇതുവരെ ഔദ്യോഗികമായി സ്ഥിരീകരിച്ചിട്ടില്ല.
സീയൂൾ റേസ് ഹാഫ് മാരത്തൺ പൂർത്തിയാക്കാൻ ഏതാനും മീറ്ററുകൾ മാത്രം ബാക്കിനിൽക്കെയാണ് യൂ ജി-വോൺ കുഴഞ്ഞുവീണു മരിച്ചത്. ഉന്നതതല സെമികണ്ടക്ടർ ഗവേഷണത്തോടൊപ്പം മത്സര ഓട്ടവും വിജയകരമായി മുന്നോട്ട് കൊണ്ടുപോയിരുന്ന 25-കാരി, ഒക്ടോബർ 11-ന് നടന്ന 21 കിലോമീറ്റർ റേസിന്റെ 20.6 കിലോമീറ്റർ പിന്നിട്ടപ്പോഴാണ് ബോധരഹിതയായി വീണത്.
'റെസൊനേറ്റ് വോയ്സസ്' റിപ്പോർട്ട് പ്രകാരം, വിവരമറിഞ്ഞയുടൻ രക്ഷാപ്രവർത്തകർ പ്രഥമശുശ്രൂഷ നൽകുകയും ആംബുലൻസിൽ മെഡിക്കൽ സെന്ററിലേക്ക് മാറ്റുകയും ചെയ്തെങ്കിലും ജീവൻ രക്ഷിക്കാനായില്ല. മരണത്തിന്റെ യഥാർത്ഥ കാരണം മെഡിക്കൽ അധികൃതർ ഇതുവരെ സ്ഥിരീകരിച്ചിട്ടില്ല. തിങ്കളാഴ്ച മത്സരത്തിൽ പങ്കെടുത്തവർക്കായി പുറപ്പെടുവിച്ച പ്രസ്താവനയിലൂടെ സീയൂൾ റേസ് സംഘാടക സമിതി സംഭവം സ്ഥിരീകരിക്കുകയും, ദുരന്തത്തിൽ അനുശോചനം രേഖപ്പെടുത്തുകയും ചെയ്തു. സംഭവത്തിന്റെ പശ്ചാത്തലം വിശദമായി പരിശോധിക്കുമെന്നും അവർ ഉറപ്പുനൽകി.
Comments