മുംബൈ: ഐപിഎൽ 2027 സീസണിന് മുന്നോടിയായി മുംബൈ ഇന്ത്യൻസിൽ നിർണായക മാറ്റം. ടീമിന്റെ മുഖ്യ പരിശീലകസ്ഥാനത്തുനിന്ന് ശ്രീലങ്കൻ മുൻ നായകൻ മഹേള ജയവർധന പടിയിറങ്ങി. ശനിയാഴ്ചയാണ് ഫ്രാഞ്ചൈസി ഇക്കാര്യം ഔദ്യോഗികമായി അറിയിച്ചത്. ഇതോടെ ടീമുമായുള്ള പത്തുവർഷത്തെ ബന്ധത്തിനാണ് വിരാമമായത്.
2017 മുതൽ 2022 വരെ മുംബൈ ഇന്ത്യൻസിന്റെ പരിശീലകനായിരുന്ന ജയവർധനെ 2024ൽ വീണ്ടും ഈ ചുമതലയിലെത്തി. അദ്ദേഹത്തിന്റെ പരിശീലനത്തിനു കീഴിൽ മുംബൈ ഇന്ത്യൻസ് 2017, 2019, 2020 വർഷങ്ങളിൽ ഐപിഎൽ കിരീടം നേടി.
2026ലെ ഐപിഎൽ സീസണിൽ നിരാശാജനകമായ പ്രകടനമാണ് മുംബൈ ഇന്ത്യൻസ് കാഴ്ചവെച്ചത്. നാല് വിജയങ്ങൾ മാത്രമാണ് ടീമിന് നേടാനായത്. പോയിന്റ് പട്ടികയിൽ ഒൻപതാം സ്ഥാനത്താണ് ടീം ഫിനിഷ് ചെയ്തത്. ഇതിനു പിന്നാലെയാണ് പരിശീലകസ്ഥാനത്ത് മാറ്റമുണ്ടാകുന്നത്.
മുംബൈ ഇന്ത്യൻസിനൊപ്പമുള്ള യാത്രയിലെ പിന്തുണയ്ക്കും സഹകരണത്തിനും ഉടമകളായ നീത അംബാനിയോടും ആകാശ് അംബാനിയോടും ജയവർധനെ നന്ദി അറിയിച്ചു. ടീമിനൊപ്പമുള്ള അനുഭവങ്ങൾ എന്നും ഓർമിക്കുമെന്നും അദ്ദേഹം വ്യക്തമാക്കി.
ജയവർധനെയുടെ പകരക്കാരനെ സംബന്ധിച്ച പ്രഖ്യാപനം ഇതുവരെ ഉണ്ടായിട്ടില്ല. ഐപിഎൽ 2027ന് മുന്നോടിയായി പുതിയ പരിശീലകനെ കണ്ടെത്തേണ്ടതുണ്ട്.
Comments