ജോലി നേടാൻ പല വഴികളും പരീക്ഷിക്കുന്നവരുണ്ട്. എന്നാൽ സ്വന്തം മുഖം പോലും ഡിജിറ്റലായി മാറ്റി ജോലി അഭിമുഖത്തിനെത്തിയാലോ? അത്തരമൊരു വിചിത്ര സംഭവമാണ് ഇപ്പോൾ സമൂഹമാധ്യമങ്ങളിൽ ശ്രദ്ധ നേടുന്നത്. ഓൺലൈൻ അഭിമുഖത്തിൽ തത്സമയ മുഖമാറ്റ ഫിൽട്ടർ ഉപയോഗിച്ചെത്തിയ ഉദ്യോഗാർഥിയെ തന്ത്രപരമായ പരീക്ഷണത്തിലൂടെ തിരിച്ചറിഞ്ഞിരിക്കുകയാണ് അമേരിക്കയിലെ മിഷിഗണിൽ നിന്നുള്ള റിക്രൂട്ടറായ ജേസൺ. സംഭവത്തിന്റെ ദൃശ്യങ്ങൾ വൈറലായതോടെ നിർമിതബുദ്ധിയുടെ ദുരുപയോഗത്തെക്കുറിച്ചും ചർച്ചകൾ സജീവമായി.
വിദൂര ജോലിക്കായി ഉദ്യോഗാർഥികളെ അഭിമുഖം നടത്തുന്നതിനിടെയാണ് ജേസണിന് സംശയം തോന്നിയത്. ഉദ്യോഗാർഥിയുടെ കണ്ണടയുടെ രൂപത്തിൽ അസ്വാഭാവികതയുണ്ടെന്നും മുഖത്തിന് ചുറ്റും മറ്റൊരു ചിത്രത്തിന്റെ നിഴൽപോലെയുള്ള ഭാഗങ്ങൾ കാണുന്നുണ്ടെന്നും സഹപ്രവർത്തകനാണ് ആദ്യം ശ്രദ്ധിച്ചത്. ഇതോടെ അഭിമുഖത്തിൽ കാണുന്ന വ്യക്തി തത്സമയ മുഖമാറ്റ സാങ്കേതികവിദ്യ ഉപയോഗിക്കുന്നുണ്ടാകാമെന്ന് ജേസൺ സംശയിച്ചു. തുടർന്ന് ഇക്കാര്യം പരിശോധിക്കാൻ ഒരു ചെറിയ പരീക്ഷണം നടത്താൻ അദ്ദേഹം തീരുമാനിച്ചു.
പ്രശസ്ത ഗുസ്തി താരമായ ജോൺ സീനയുടെ 'യു കാന്റ് സീ മീ' എന്ന പ്രശസ്തമായ കൈചലനം അനുകരിക്കാനായിരുന്നു ജേസൺ ഉദ്യോഗാർഥിയോട് ആവശ്യപ്പെട്ടത്. കൈ മുഖത്തിന് മുന്നിലൂടെ വീശിക്കാണിക്കണമെന്നായിരുന്നു നിർദേശം. എന്നാൽ ഉദ്യോഗാർഥി കൈ മുഖത്തിന് മുന്നിൽ കൊണ്ടുവരുന്നതിന് പകരം അരികിലായി ഉയർത്തുകയായിരുന്നു. വീണ്ടും ആവശ്യപ്പെട്ടിട്ടും അതേ രീതിയിൽ പ്രതികരിച്ചതോടെ ജേസണിന്റെ സംശയം ശക്തമായി. സമൂഹമാധ്യമങ്ങളിലെ പ്രൊഫൈലുകളിലുള്ള ചിത്രങ്ങളുമായി അഭിമുഖത്തിലെ വ്യക്തിയുടെ രൂപത്തിന് വ്യത്യാസമുണ്ടായിരുന്നതും സംശയത്തിന് കാരണമായി.
സംഭവത്തിന്റെ ദൃശ്യങ്ങൾ പങ്കുവെച്ചതോടെ നിരവധി പേരാണ് പ്രതികരണങ്ങളുമായി എത്തിയത്. ഉദ്യോഗാർഥിയെ തിരിച്ചറിഞ്ഞ റിക്രൂട്ടറുടെ മിടുക്കിനെ പ്രശംസിച്ചവർക്കൊപ്പം ജോലി നേടാൻ ആളുകൾ സ്വീകരിക്കുന്ന വിചിത്രമായ മാർഗങ്ങളെക്കുറിച്ച് തമാശ പറഞ്ഞവരുമുണ്ട്. അതേസമയം, ഓൺലൈൻ അഭിമുഖങ്ങളിൽ ഉദ്യോഗാർഥികളുടെ യഥാർഥ വ്യക്തിത്വം ഉറപ്പാക്കുന്നത് കൂടുതൽ വെല്ലുവിളിയാകുകയാണെന്ന് ജേസൺ അഭിപ്രായപ്പെട്ടു. നിർമിതബുദ്ധി ഉപയോഗിച്ചുള്ള മുഖമാറ്റങ്ങൾ വർധിക്കുന്ന സാഹചര്യത്തിൽ നേരിട്ടുള്ള അഭിമുഖങ്ങൾ കൂടുതൽ ആവശ്യമായി വന്നേക്കാമെന്നും അദ്ദേഹം ചൂണ്ടിക്കാട്ടി.
Comments