ലക്നൗ: ഇന്ത്യ മുഴുവന് ഉറ്റുനോക്കുന്ന തെരഞ്ഞെടുപ്പ് നടക്കുന്ന ഉത്തര്പ്രദേശില് ബിജെപിയുടെ ലീഡ് നില കേവല ഭൂരിപക്ഷം കടന്നു. 288 സീറ്റുകളിലെ വോട്ടെണ്ണല് പുരോഗമിക്കുമ്പോള് ബിജെപി 204 ഇടങ്ങളില് മുന്നില്. കേവല ഭൂരിപക്ഷം 202 വേണമെന്നിരിക്കെ ബിജെപി യുപിയില് ഭരണം പിടിക്കുമെന്ന് പ്രതീക്ഷകള്.
നരേന്ദ്രമോഡി മുന്നില് നിന്നും പ്രചരണം നടത്തിയ യുപിയില് ബിജെപി പ്രവര്ത്തകര് ആഘോഷം തുടങ്ങിക്കഴിഞ്ഞു. അതേസമയം അഖിലേഷ് യാദവിന്റെ രാഷ്ട്രീയ തന്ത്രങ്ങള് വന് പരാജയമാകുന്നെന്ന സൂചനകള് നല്കി ഭരണപക്ഷമായ സമാജ്വാദി പാര്ട്ടി-കോണ്ഗ്രസ് മുന്നണിക്ക് 58 ഇടങ്ങളില് മാത്രമാണ് മുന്നില് നില്ക്കാനായിരിക്കുന്നത്. 28 സീറ്റുകളുമായി ബിഎസ്പി വന് തീരിച്ചടി നേടുമ്പോള് മറ്റുള്ളവര് 12 സീറ്റുകളില് മുന്നേറുന്നുണ്ട്.
ഉത്തര്പ്രദേശിന് പിന്നാലെ ഉത്തരാഖണ്ഡിലും ബിജെപി ഭരണ സാധ്യതകള് തുറക്കുകയാണ്. ഉത്തരാഖണ്ഡിലെ എല്ലാകേന്ദ്രങ്ങളിലുമായി വോട്ടെണ്ണല് പുരോഗമിക്കുമ്പോള് 45 ഇടങ്ങളില് ബിജെപി മുന്നേറുകയാണ്. 67 സീറ്റുകളിലെ വോടെണ്ണല് പുരോഗമിക്കുമ്പോള് 20 സീറ്റുകളില് മാത്രമാണ് കോണ്ഗ്രസ് മുന്നിട്ടു നില്ക്കുന്നത്. ബിഎസ്പി ഒരിടത്തും മറ്റുള്ളവര് ഒരിടത്തും മുന്നേറുന്നു.
അതേസമയം കോണ്ഗ്രസിനും തെരഞ്ഞെടുപ്പ് ഗുണകരമായി മാറുകയാണ്. കഴിഞ്ഞ തവണ ബിജെപി സഖ്യത്തിന് വിട്ടുകൊടുക്കേണ്ടി വന്ന പഞ്ചാബിലും ഗോവയിലും മണിപ്പൂരിലും കോണ്ഗ്രസ് തിരിച്ചുവരവ് കാണിക്കുകയാണ്. ഗോവയില് 15 സീറ്റുകളില് എട്ടെണ്ണത്തില് കോണ്ഗ്രസ് മുന്നിലുണ്ട്. മണിപ്പൂരില് ഏഴു സീറ്റുകളിലും പഞ്ചാബില് 47 സീറ്റുകളിലും മുന്നില് നില്ക്കുന്നു. ഉത്തരാഖണ്ഡില് പ്രതിപക്ഷ സ്ഥാനത്തേക്കും കോണ്ഗ്രസ് ഉയരുമെന്ന പ്രതീക്ഷയാണ് നല്കുന്നത്.
