ന്യൂഡല്ഹി: വഴക്കിനെ തുടര്ന്ന് മകന് വധിക്കപ്പെട്ട സംഭവത്തില് വധശിക്ഷയ്ക്ക് വിധിക്കപ്പെട്ട 10 ഇന്ത്യാക്കാര്ക്ക് പാകിസ്താന്കാരന് പൊതുമാപ്പ് കൊടുത്തതായി റിപ്പോര്ട്ട്. പാക്പത്രമായി എക്സ്പ്രസ് ട്രൈബൂണ് പുറത്തുവിട്ട റിപ്പോര്ട്ടില് മൊഹമ്മദ് ഫര്ഹാന് എന്ന യുവാവ് കൊല്ലപ്പെട്ട കേസില് മൊഹമ്മദ് റിയാസ് എന്നയാളാണ് നഷ്ടപരിഹാരം സ്വീകരിച്ച് ഒരു യുവതിയും കുട്ടിയും ഉള്പ്പെടെയുള്ള 10 പേരെ തൂക്കുമരത്തില് നിന്നും രക്ഷപ്പെടുത്തിയത്.
ശരിയത്ത് നിയമം അനുസരിച്ച് 'ചോരപ്പണം' കൈപ്പറ്റി ഇരയുടെ കുടുംബം മാപ്പ് നല്കിയാല് പ്രതികളുടെ വധശിക്ഷ ഒഴിവാക്കാറുണ്ട്. 2015 ല് അബുദാബിയില് നടന്ന സംഭവത്തില് നഷ്ടപരിഹാരം സ്വീകരിക്കാമെന്ന് പിതാവിന്റെ അപേക്ഷ യുഎഇ കോടതി പരിഗണിക്കുകയായിരുന്നു. ഇതേ തുടര്ന്ന് മൊഹമ്മദ് റിയാസും കുടുംബവും ഉടന് യുഎഇയില് എത്തുമെന്നും കോടതിയില് അപ്പീല് നല്കുമെന്നുമാണ് വിവരം.
ഷരിയ കോടതിയുടെ നിയമം അനുസരിച്ച് കുറ്റവാളിയുമായി രമ്യതയില് എത്തിയാല് ഇരയുടെ കുടുംബത്തിന് വധശിക്ഷയ്ക്കെതിരേ അപ്പീല് നല്കാനാകും. ഒരു ചാരിറ്റബിള് ട്രസ്റ്റിന്റെ തലവനായ എസ്പി സിംഗ് ഒബറോയി എന്ന ദുബായിലെ ഒരു ഇന്ത്യന് ബിസിനസുകാരനാണ് നഷ്ടപരിഹാരം നല്കുന്നത്. റിയാസിനും കുടുംബത്തിനും താമസവും വിസയുമെല്ലാം തയ്യാറാക്കി യുഎഇ യിലേക്ക് ക്ഷണിച്ചിട്ടുണ്ടെന്ന് ഒബറോയി വ്യക്തമാക്കി. മതമോ പൗരത്വമോ പരിഗണിക്കാതെ പുരുഷന് രണ്ടു ലക്ഷം ദിര്ഹവും സ്ത്രീകള്ക്ക് അതിന്റെ പകുതിയുമാണ് നല്കുക.
നിര്ഭാഗ്യവശാല് തന്റെ മകനെ തനിക്ക് നഷ്ടമായി. ഇനി അവന് തിരിച്ചു വരികില്ല. എന്നാല് പത്തുപേര്ക്കും താന് മാപ്പു നല്കുകയാണ്. ഇനി അള്ളാഹു അവരെ രക്ഷിക്കട്ടെ. വഴക്കിനെ തുടര്ന്നായിരുന്നു ഇന്ത്യാക്കാര് പാക് യുവാവിനെ കൊന്നതെന്നും പത്രം പറയുന്നുണ്ട്.
