കല്പ്പറ്റ: പോക്സോ കേസില് 10 വര്ഷം തടവിനു ശിക്ഷിക്കപ്പെട്ട പ്രതി ജഡ്ജിക്കു നേരെ ഷൂ എറിഞ്ഞു. ദേഹാസ്വാസ്ഥ്യത്തെത്തുടര്ന്ന് ജഡ്ജി െവെദ്യസഹായം തേടി. കല്പ്പറ്റ പോക്സോ കോടതി ജഡ്ജി എസ്.എച്ച്.
പഞ്ചാപകേശനു നേരേ വയനാട് മേപ്പാടി കടച്ചിക്കുന്ന് കുന്നുമ്മേല് അറുമുഖന് (56)ആണ് ഷൂ എറിഞ്ഞത്. ഇന്നലെ രാവിലെ 11.45 നാണു സംഭവം. 12 വയസുള്ള പെണ്കുട്ടിയെ പീഡിപ്പിച്ച കേസില് അറുമുഖനെ ഇന്നലെ കോടതി ശിക്ഷിച്ചിരുന്നു. വിവിധ വകുപ്പുകള് പ്രകാരം 20 വര്ഷം തടവും രണ്ടുലക്ഷം രൂപ പിഴയുമാണ് ശിക്ഷ. രണ്ടു ശിക്ഷയും ഒരുമിച്ച് 10 വര്ഷം തടവ് അനുഭവിച്ചാല് മതി. വിധി പറഞ്ഞ ഉടനെയാണ്, പ്രതിക്കൂട്ടില്നിന്ന് അറുമുഖന് ഷൂ എറിഞ്ഞത്.
ജഡ്ജിയുടെ നെഞ്ചിലാണ് ഏറ് കൊണ്ടത്. ഉടന് തന്നെ പോലീസുകാര് അറുമുഖനെ വളഞ്ഞ് കസ്റ്റഡിയിലെടുത്തു. സംഭവത്തെത്തുടര്ന്ന് കോടതി നടപടികള് സ്തംഭിച്ചു. ജഡ്ജി കല്പ്പറ്റ െകെനാട്ടി ജനറല് ആശുപത്രിയിലെത്തി െവെദ്യ പരിശോധനയ്ക്കു വിധേയനായി.
കോടതി ജീവനക്കാരുടെ പരാതി പ്രകാരം ഔദ്യോഗിക കൃത്യനിര്വഹണം തടസപ്പടുത്തല്, പരുക്കേല്പ്പിക്കല് വകുപ്പുകള് പ്രകാരം അറുമുഖനെതിരേ കേസെടുത്തു.2014ലാണ് പീഡനക്കേസില് അറുമുഖന് അറസ്റ്റിലായത്. അമ്മയുടെ മരണത്തെതുടര്ന്ന് വല്ല്യമ്മയുടെ സംരക്ഷണയില് കഴിഞ്ഞിരുന്ന കുട്ടിയെയാണ് ഇയാള് ഉപദ്രവിച്ചത്. സ്കൂളിലെ കൗണ്സലിങ്ങില് കുട്ടി സംഭവം വെളിപ്പെടുത്തിയതിനെത്തുടര്ന്നാണ് അറുമുഖന് പിടിയിലായത്.
