ന്യൂഡല്ഹി: സ്ത്രീകള്ക്ക് സ്വാതന്ത്ര്യം നല്കേണ്ട കാര്യമില്ലെന്നും അവര് സംരക്ഷണയില് കഴിയേണ്ടവരും കീഴില് നില്ക്കേണ്ടവരുമാണെന്ന പ്രസ്താവന നടത്തി ഉത്തര്പ്രദേശ് മുഖ്യമന്ത്രി യോഗി ആദിത്യനാഥ് വിവാദത്തില്. യോഗി ആദിത്യനാഥ് എന്ന തന്റെ വെബ്സൈറ്റില് നല്കിയിരിക്കുന്ന 'മാത്രി ശക്തി, ഭാരതീയ സംസ്കൃതി കേ സന്ദര്ഭ്' എന്ന പേരില് പ്രസിദ്ധീകരിച്ച ലേഖനത്തിനെതിരേ ആദിത്യനാഥ് രാജി വെയ്ക്കണമെന്ന് ആവശ്യപ്പെട്ട് പ്രതിപക്ഷം രംഗത്ത് വന്നിട്ടുണ്ട്.
പുതിയതായി നിയോഗിതനായ മന്ത്രിയുടേത് സ്ത്രീകളെ താഴ്ത്തികെട്ടുന്നതും അപ്രിയമായതും മാനിക്കാത്തതുമായ പ്രസ്താവനയെന്നാണ് പ്രതിപക്ഷ വിമര്ശനം. ഇന്ത്യന് സ്ത്രീകള് എല്ലായ്പ്പോഴും സംരക്ഷണയുടെ തണലില് നില്ക്കേണ്ടവര് എന്ന് വെബ്സൈറ്റില് ആദിത്യനാഥ് നല്കിയിരിക്കുന്ന ലേഖനം ബിജെപിയുടെ സ്ത്രീകളോടുള്ള മാനസീകനിലയാണ് കാണിക്കുന്നതെന്ന് കോണ്ഗ്രസ് നേതാക്കള് പ്രതികരിച്ചു. സ്ത്രീകള് പിതാവിനാലോ, ഭര്ത്താവിനാലോ, മകനാലോ സംരക്ഷിക്കപ്പെടേണ്ടവരാണെന്ന പരാമര്ശം സ്വതന്ത്രമായി ഒരു കാര്യം ചെയ്യാനോ പ്രവര്ത്തിക്കാനോ തീരുമാനമെടുക്കാനോ സ്ത്രീയ്ക്ക് ശേഷിയില്ലെന്ന് സൂചിപ്പിക്കുന്നതാണ്. ഇത് രാജ്യത്തെ മുഴുവനായും അപമാനിക്കുന്നതാണെന്ന് കോണ്ഗ്രസ് നേതാക്കള് പ്രതികരിച്ചു.
രാജ്യത്തിന്റെ ചരിത്രത്തില് തന്നെ ഇതരമൊരു പരാമര്ശം തെരഞ്ഞെടുക്കപ്പെട്ട ഒരാളും നടത്തിയിട്ടില്ലെന്നും ശക്തമായി അപലപിക്കുന്നതായും രണ്ദീപ് സുര്ജേവാല പറഞ്ഞു. സ്ത്രീകളേക്കാള് മിടുക്ക് പുരുഷന്മാര്ക്കുണ്ട് എന്ന് വിശ്വസിക്കുന്നു എങ്കില് സ്ത്രീകള്ക്കും പുരുഷന്മാരേക്കാള് മിടുക്കുണ്ടെന്ന് കൂടി കണക്കാക്കണമെന്നും പറഞ്ഞു. ഇന്ത്യയില് സ്ത്രീ സ്വാതന്ത്ര്യസമര സേനാനികളും വനിതാ രാഷ്ട്രീയ നേതാക്കളും ഉണ്ടെന്നും ചില വീരകളായ ദേവതകള് പോലും ഇന്ത്യന് സംസ്ക്കാരത്തില് ഉണ്ടെന്ന കാര്യം ബിജെപി നേതാക്കള് മറക്കരുതെന്നും പറഞ്ഞു.
