ന്യൂഡല്ഹി: പശുക്കളുടെ നീക്കവും അതിര്ത്തി കടത്തിയുള്ള കടത്തും തടയുന്നതിനായി മൃഗങ്ങള്ക്ക് യുഐഡി കാര്ഡുകള് കൊണ്ടുവരാനുള്ള കേന്ദ്ര സര്ക്കാരിന്റെ നീക്കത്തിന് നേരെ ട്വിറ്ററില് നാട്ടുകാരുടെ തകര്പ്പന് പരിഹാസം.
പശു ആധാറിന് ഗോവാധാര് എന്നും അകിട് ആധാറെന്നും പേരു നല്കണമെന്നുള്ള പരിഹാസത്തില് തുടങ്ങി എന്തിന് ആധാര് മാത്രമാക്കുന്നു അവയ്ക്ക് വോട്ടവകാശവും പാസ്പോര്ട്ടും ജന്ധന് അക്കൗണ്ടും കൂടി നല്കാന് പാടില്ലേ എന്നാണ് മിക്കവരുടേയും ചോദ്യം.
വാര്ത്തയോട് പലരും ഏറെ രസകരമാണ് ട്വിറ്ററില് പ്രതികരിച്ചിട്ടുള്ളത്. മൃഗങ്ങള്ക്ക് ഉഡ്ഡര് കാര്ഡ് (അകിട് കാര്ഡ്)കിട്ടാനുള്ള അവസരമെന്നാണ് ഒരു പ്രതികരണം. നമ്മള്ക്ക് ആധാര് കാര്ഡും അവര്ക്ക് ഉഡ്ഡര് കാര്ഡുമെന്നും പറഞ്ഞിട്ടുണ്ട്.
പാലും തോലും മൂത്രവും നല്കുന്ന ആടും പശുവിനെ പോലെ തന്നെയാണെന്നും അവയ്ക്കും ആധാര് നല്കണമെന്നും ഗാവോം കി ചോരി എന്ന സിനിമയിലൂടെ ബോളിവുഡിലും തങ്ങളുടെ നിഷ്ക്കളങ്കത അവ കാട്ടിയിട്ടുണ്ടെന്നാണ് മറ്റൊരു കമന്റ്.
പശുക്കളെയും അവയുടെ തലമുറയേയും കൃത്യമായി നിരീക്ഷിക്കാനാണ് യുഐഡി കാര്ഡെന്ന് സര്ക്കാര് സുപ്രീംകോടതിക്ക് ഏപ്രില് 24 ന് നല്കിയ മറുപടിയില് പറഞ്ഞിരുന്നു. ഇതിനെ ഓരോ പശുവിന്റെയും യഥാര്ത്ഥ പിതാവിനെ അറിയാന് എല്ലായിടവും സിസിടിവി ക്യാമറാ കവറേജിന് കീഴിലാക്കണമെന്നും ഓരോ കിടാവിന്റെയും അച്ഛന്റെ പേര് ആധാര് കാര്ഡില് രേഖപ്പെടുത്തണമെന്നും ഒരു ട്വീറ്റ് പരിഹസിക്കുന്നത്.
പശുക്കളുടെ വിരലടയാളവും പശുആധാറില് വേണമെന്നാണ് മറ്റൊരാളുടെ ആവശ്യം. പശുവിന് പാസ്പോര്ട്ടും ജന്ധന് ബാങ്ക് അക്കൗണ്ടുകള് കൂടി നല്കണമെന്ന് മറ്റൊരാള് കുറിച്ചു. പശുവിന്റെ പ്രായം, വര്ഗ്ഗം, പാലിന്റെ അളവ്, ലിംഗാവസ്ഥ, ഉയരം, ശരീരത്തിന്റെ നിറം, പ്രത്യേക അടയാളം എന്നിവയെല്ലാം രേഖപ്പെടുത്തിയ കാര്ഡാണ് സര്ക്കാര് കൊണ്ടുവരുന്നത്. നേപ്പാളിലേക്കും ബംഗ്ലാദേശിലേക്കും പശുക്കളെ കടത്താതിരിക്കാനാണ് ഈ കാര്ഡെന്ന് നേരത്തേ സുപ്രീംകോടതിയോട് കേന്ദ്രസര്ക്കാര് വ്യക്തമാക്കിയിരുന്നു.
