മുംബൈ: വാന്നക്രൈ റാന്സംവേറില് നടുങ്ങി ലോകം. സഹസ്രകോടികളുടെ നഷ്ടമാണ് ഇതുവരെ ഉണ്ടായതെന്നാണു റിപ്പോര്ട്ട്.
എന്നാല് വൈറസ് ആക്രമണത്തിന്റെ ശക്തി കുറഞ്ഞതായി യൂറോപ്യന് യൂണിയന്റെ പോലീസ് ഏജന്സി യൂറോപോള് അറിയിച്ചു. ഇന്ത്യയിലെ എ.ടി.എമ്മുകളില് 80 ശതമാനവും സുരക്ഷിതമാണെന്ന് ഐടി സുരക്ഷാ സ്ഥാപനമായ ലുസിഡിയസ് സി.ഇ.ഒ. സകേത് മോഡി അറിയിച്ചു.
ഹാക്കര്മാര് ആവശ്യപ്പെടുന്ന പണം നല്കരുതെന്നു വിവിധ രാജ്യങ്ങളിലെ കമ്പ്യൂട്ടര് സുരക്ഷാ വിദഗ്ധര് നിര്ദേശിച്ചിട്ടുണ്ട്. വൈറസ് പടരുന്നതിന്റെ പേരില് അമേരിക്കയുടെ സുരക്ഷാ ഏജന്സിയെ വിമര്ശിച്ചു മൈക്രോസോഫ്റ്റ് കോര്പറേഷന് രംഗത്തെത്തി. ആക്രമണം തടഞ്ഞു മാര്ക്കസ് ഹച്ചിന്സ് എന്ന 22 കാരനും ലോകശ്രദ്ധ നേടി. യു.എസ്, ബ്രിട്ടന്, റഷ്യ, ചൈന, ജര്മനി, ഫ്രാന്സ്, ജപ്പാന് എന്നിവയടക്കം 150 രാജ്യങ്ങളിലാണു റാന്സംവേര് നാശം വിതച്ചത്. രണ്ട് ലക്ഷത്തിലേറെ കമ്പ്യൂട്ടറുകള് ഇതുവരെ ആക്രമണത്തിന് ഇരയായി.
ജര്മനിയില് റെയില്വേ സംവിധാനത്തെ ഇതു ബാധിച്ചു. ചൈനയില് 29,372 സ്കൂളുകളിലെ കമ്പ്യൂട്ടറുകളാണു പ്രവര്ത്തന രഹിതമായത്. ജപ്പാനില് 600 കേന്ദ്രങ്ങളിലായി 2,000 കമ്പ്യൂട്ടറുകള് പ്രവര്ത്തന രഹിതമായി. നിസാന്, ഹിറ്റാച്ചി എന്നിവയ്ക്കും തിരിച്ചടി ഉണ്ടായി. ചൈനയില് 15 ശതമാനം ഇന്റര്നെറ്റ് പ്രോട്ടോക്കോള് അഡ്രസുകള് ആക്രമണത്തിനിരയായതായി സിന്ഹുവ ന്യൂസ് ഏജന്സി റിപ്പോര്ട്ട് ചെയ്തു. റഷ്യയില് ആഭ്യന്തര മന്ത്രാലയത്തിലെ കമ്പ്യൂട്ടറുകളും ആക്രമണത്തിനിരയായി. ഫ്രാന്സില് റിയോയുടെ ഫാക്ടറികളിലെ കമ്പ്യൂട്ടറുകളില് ചിലത് പ്രവര്ത്തന രഹിതമായി.
മൈക്രോസോഫ്റ്റിന്റെ വിന്ഡോസ് എക്സ്പി, വിന്ഡോസ് 7 ഓപ്പറേറ്റിങ് സിസ്റ്റങ്ങളെയാണ് റാന്സംവേര് ആക്രമിക്കുന്നത്. ഉബുണ്ടു- ലിനക്സ്, യുനിക്സ് അധിഷ്ഠിത ഓപ്പറേറ്റിങ് സിസ്റ്റങ്ങളെ വൈറസ് ബാധിച്ചതായി റിപ്പോര്ട്ടില്ല. സ്ഥിതി അതീവ ഗുരുതരമെന്നാണു കേന്ദ്രസര്ക്കാരിന്റെ കമ്പ്യൂട്ടര് എമര്ജന്സി റെസ്പോണ്സ് ടീം (സി.ഇ.ആര്.ടി) വ്യക്തമാക്കി. എന്നാല് ഇന്ത്യയില് വ്യാപക ആക്രമണം ഉണ്ടായില്ലെന്നു സി.ഇ.ആര്.ടി അറിയിച്ചു.
"ആശങ്കകള് വേണ്ട. ഗുരുതര പ്രശ്നങ്ങള് ഉള്ളതായി റിപ്പോര്ട്ടില്ല. പ്രശ്നങ്ങള് ഉണ്ടായാല് പരിഹരിക്കാന് മൈക്രോസോഫ്റ്റ് കോര്പറേഷനുമായി ബന്ധപ്പെട്ട് വരികയാണ്"- സി.ഇ.ആര്.ടി. ഡയറക്ടര് ജനറല് സഞ്ജയ് ബഹ്ല് അറിയിച്ചു. ശനിയാഴ്ച മുതല് വൈറസ് ആക്രമണം സംബന്ധിച്ചു സൈബര് സ്വച്ഛ് കേന്ദ്ര ജനങ്ങള്ക്കു വിവരം നല്കുന്നുണ്ട്. ജനങ്ങള് കമ്പ്യൂട്ടര് ഓപ്പറേറ്റിങ് സിസ്റ്റം അപ്ഡേറ്റ് ചെയ്യാന് ശ്രദ്ധിക്കണമെന്ന് അദ്ദേഹം നിര്ദേശിച്ചു.ബാങ്കുകളിലും കേന്ദ്ര സര്ക്കാര് വെബ്സൈറ്റുകളിലും ഫയര്വാള് ഏര്പ്പെടുത്തിയതിനാല് ഇവിടെ ആക്രമണംപ്രതീക്ഷിക്കുന്നില്ലെന്നും കമ്പ്യൂട്ടര് സുരക്ഷാ വിദഗ്ധര് അറിയിച്ചു.
ആക്രമണത്തിനു പിന്നില് പ്രവര്ത്തിച്ചവരെ ഇനിയും തിരിച്ചറിഞ്ഞിട്ടില്ല. ഇത്തരം ആക്രമണങ്ങള് ആവര്ത്തിക്കാതിരിക്കാന് രാജ്യാന്തര തലത്തില് നിയമനിര്മാണം വേണ്ടിവരുമെന്ന് യൂറോപ്യന് യൂണിയന് സുരക്ഷാ കമ്മിഷണര് ജീലിയന് കിങ് നിര്ദേശിച്ചു.
