കോട്ടയം: പ്രമേഹം മൂര്ഛിച്ചതിനെത്തുടര്ന്നു വീട്ടില് കിടന്നു മരിച്ച വീട്ടമ്മയുടെ മൃതദേഹം പോസ്റ്റ്മോര്ട്ടം ചെയ്യാതെ ബന്ധുക്കള് സ്വദേശമായി തമിഴ്നാട്ടിലേക്കു കൊണ്ടുപോയി. ചെങ്ങന്നൂരില് വരെയെത്തിച്ച മൃതദേഹം നാട്ടുകാരുടെ പരാതിയെത്തുടര്ന്നു കോട്ടയത്തു തിരികെ എത്തിച്ചു പോസ്റ്റ്മോര്ട്ടം ചെയ്ത ശേഷം ബന്ധുക്കള്ക്കു വിട്ടുകൊടുത്തു.
ഇന്നലെ രാവിലെ കോട്ടയം വെസ്റ്റ് പോലീസ് സ്റ്റേഷന് അതിര്ത്തിയിലാണു സംഭവം. സംഭവത്തെക്കുറിച്ച് പോലീസ് പറയുന്നത്: തിരുനെല്വേലി സ്വദേശിയും അലുമിനിയം പാത്രം വ്യാപാരിയുമായ തിരുനക്കര സിവില് സ്റ്റേഷനു സമീപം പശുവന്ദനംഇല്ലം മുക്കാണ്ടിയുടെ ഭാര്യ ലക്ഷ്മി (50)യാണ് ഇന്നലെ പുലര്ച്ചെ വീട്ടില് മരിച്ചു. പ്രമേഹം മൂര്ഛിച്ചതിനെത്തുടര്ന്ന് രണ്ടു ദിവസമായി അവശ നിലയിലായിരുന്നു.
ഇവരുടെ സമുദായത്തിന്റെ ആചാരപ്രകാരം മൃതദേഹം ഏറെ നേരം സൂക്ഷിക്കാന് പാടില്ലാത്തതിനാല് ബന്ധുക്കള് ചേര്ന്നു എട്ടോടെ മൃതദേഹവുമായി തിരുനെല്വേലിയിലേക്കു പോയി. എന്നാല്, മരണത്തില് സംശയം ഉന്നയിച്ച് നാട്ടുകാരില് ചിലര് പോലീസില് വിവരമറിയിച്ചു. പോലീസ് എത്തിയപ്പോഴേയ്ക്കും ബന്ധുക്കള് മൃതദേഹവുമായി ചെങ്ങന്നൂരില് എത്തിയിരുന്നു.
ഉടന് തന്നെ വെസ്റ്റ് എസ്.ഐ. എം.ജെ. അരുണ് ഇവരുമായി ഫോണില് ബന്ധപ്പെടുകയും മൃതദേഹം തിരികെ എത്തിക്കാന് നിര്ദേശിക്കുകയും ചെയ്തു. തിരികെ യെത്തിച്ച മൃതദേഹം പോസ്റ്റ്മോര്ട്ടം നടത്തി. മരണത്തില് അസ്വഭാവികതയില്ലെന്നു കണ്ടെത്തിയതോടെ മൃതദേഹം ബന്ധുക്കള്ക്കു വിട്ടുകൊടുത്തതായി പോലീസ് അറിയിച്ചു. സംഭവത്തില് കേസെടുത്തിട്ടുണ്ട്.
