കൃഷി എന്റെ ജീവാത്മാവ്

പച്ചക്കറിക്കുവേണ്ടി നാം ആശ്രയിക്കുന്ന തമിഴ്‌നാട് നമുക്ക് പച്ചക്കറി തന്നില്ലെങ്കില്‍ എന്തുചെയ്യും? നമുക്ക് കഴിക്കാനുള്ളത് നാം തന്നെകൃഷിചെയ്ത് ഉണ്ടാക്കേണ്ട അവസ്ഥ വന്നാലോ? കൃഷിയെ പുച്ഛിക്കുന്നവര്‍ അന്നേ അതിന്റെ വില മനസ്സിലാക്കൂ.

ഞാന്‍ മന:പൂര്‍വ്വം ബ്രേക്ക് എടുക്കുന്നതല്ല, സംഭവിച്ചുപോകുന്നതാണ്. നേരത്തേ പറഞ്ഞല്ലോ, വര്‍ക്ക്‌ഷോപ്പ് തുടങ്ങിയകാലത്ത് സിനിമകളുടെ ചാകരയായിരുെന്നന്ന്.പ്രായിക്കര പാപ്പാന്‍ എന്ന സിനിമ ചെയ്യുന്നതിനിടയിലാണ് ഞാനൊരു കാര്‍ ആക്‌സിഡന്റില്‍പ്പെട്ടത്. 6 മാസം വിശ്രമം.

പിന്നെപ്പിന്നെ സിനിമകളില്‍ അഭിനയിച്ചെങ്കില്‍പ്പോലും സജീവമായി നില്‍ക്കാന്‍ സാധിച്ചില്ല. അതെന്റെ കുറ്റമാണ്. വ്യക്തിപരമായ ധാരാളം പ്രശ്‌നങ്ങളുണ്ടാകും. 'പ്രജ' എന്ന ചിത്രത്തില്‍ ബാബുരാജ് ചെയ്ത കഥാപാത്രം യഥാര്‍ത്ഥത്തില്‍ എന്റെ വേഷമായിരുന്നു. പല കാരണങ്ങളാല്‍ ആ സിനിമകളൊക്കെ എനിക്ക് കൈയൊഴിയേണ്ടതായിവന്നു.

അഭിനയിക്കാന്‍ തുടങ്ങിയ കാലം മുതല്‍ ഞാന്‍ ചെയ്യുന്ന കഥാപാത്രങ്ങളെല്ലാം നെഗറ്റീവായിരുന്നു. 'ഈ പുഴയും കടന്ന്' എന്ന സിനിമയ്ക്ക് ശേഷം ട്രെയിനില്‍ യാത്ര ചെയ്യവേ അതിലെ സഹയാത്രികരെല്ലാംകൂടി എന്നെ സൂക്ഷിച്ചുനോക്കി. ചിലരുടെ മുഖത്ത് ചിരി, ചിലരുടേത് ദേഷ്യം. ഞാന്‍ ഒറ്റയ്ക്ക് ഒരു മൂലയ്ക്ക് മാറിയിരുന്നു.

കുറച്ചുകഴിഞ്ഞപ്പോള്‍ മുഖത്ത് ദേഷ്യം പ്രകടിപ്പിച്ചവരൊക്കെ അടുത്ത് വന്ന് പരിചയപ്പെട്ടു. ഒറ്റനോട്ടത്തില്‍ കണ്ടാല്‍ ദുഷ്ടനെന്ന് വിചാരിക്കുമെങ്കിലും എന്നോട് സംസാരിച്ച് കഴിഞ്ഞപ്പോള്‍ അവരുടെ ചോദ്യം ഇങ്ങനെയായിരുന്നു. ''സാര്‍ എന്തൊരു പാവമാ... ഈ മനുഷ്യനെയാണല്ലോ ദൈവമേ, ആ സിനിമ കണ്ട് ഞങ്ങള്‍ കുറ്റം പറഞ്ഞതും വെറുത്തതും. ഒരുപക്ഷേ കഥയെഴുതുന്ന വ്യക്തികള്‍ എന്റെ രൂപം കണ്ട് തരുന്നതാവാം വില്ലന്‍വേഷങ്ങള്‍.

വില്ലന്‍ കഥാപാത്രങ്ങള്‍ തുടര്‍ച്ചയായി ചെയ്തുകൊണ്ടിരുന്ന എനിക്ക് ആക്ഷന്‍ ഹീറോ ബിജുവിലെ കഥാപാത്രം മറ്റൊരു പാത തുറന്നുതന്നു. ഒരു സീന്‍ മാത്രമേ ആ സിനിമയില്‍ എനിക്കുണ്ടായിരുന്നുള്ളൂവെങ്കിലും നല്ല കാമ്പുള്ള കഥാപാത്രമായിരുന്നു.

അഭിനയിച്ചുകഴിഞ്ഞപ്പോള്‍ എനിക്ക് എന്നോടുതന്നെ സഹതാപം തോന്നി. അത്രത്തോളം വികാരനിര്‍ഭരമായ സീനായിരുന്നു ആ ചിത്രത്തില്‍ എന്റെ കുടുംബത്തെ കാണിക്കുമ്പോഴുള്ളത്.

'വില്ലന്‍ എന്ന ഇമേജ്' മാറ്റിത്തന്നത് എബ്രിഡ് ഷൈനാണ്. ഇതുപോലെ മറ്റു സംവിധായകര്‍ക്കും പ്രൊഡ്യൂസര്‍മാര്‍ക്കും തോന്നിയാല്‍ എന്നെപ്പോലുള്ള ആളുകള്‍ക്ക് നല്ല കഥാപാത്രങ്ങള്‍ ചെയ്യാനാകും.

ഉള്ളില്‍ സ്‌നേഹമുണ്ടെങ്കിലും അത് പൂര്‍ണമായും പുറത്ത് പ്രകടിപ്പിക്കാത്ത വ്യക്തിയാണ് ഞാന്‍. വ്യക്തിജീവിതത്തില്‍ ഞാന്‍ സൈലന്റാണ്. സിനിമയില്‍ വയലന്റും(ചിരിക്കുന്നു). കൃഷിയും വീട്ടുകാര്യങ്ങളും നോക്കിയിരിക്കാനാണ് എനിക്കിഷ്ടം.

സിനിമയില്ലാത്ത സമയങ്ങളില്‍ ഭാര്യ സുസ്മിതയ്ക്കും മകള്‍ പാര്‍വ്വതിക്കുമൊപ്പം യാത്രകള്‍ പോകാറുണ്ട്. അത്തരം യാത്രകളില്‍ ധാരാളം സിനിമാപ്രേമികളെ കണ്ടുമുട്ടും. അവര്‍ വന്ന് വിശേഷങ്ങള്‍ ചോദിക്കുകയും ഫോട്ടോ എടുക്കുകയും ചെയ്യുന്നത് കാണുമ്പോള്‍ സന്തോഷമുണ്ട്.

ആക്ഷന്‍ ഹീറോ ബിജുവിന് ശേഷമാണ് ആളുകള്‍ എന്റടുത്ത് വന്ന് ഫോട്ടോ എടുക്കുന്നത്. ഇതിനുമുമ്പ് ഞാന്‍ ചെയ്യുന്ന കഥാപാത്രത്തിന്റെ സവിശേഷതകൊണ്ടാകാം, ആരും എന്റെ അടുത്ത് വരുമായിരുന്നില്ല. ആളുകള്‍ ഇത്രമാത്രം ഭയക്കാന്‍ ഞാന്‍ ഭയങ്കരനൊന്നുമല്ല, പച്ചയായ ഒരു മനുഷ്യനാണ്. സാധാരണക്കാരില്‍ സാധാരണക്കാരനായ ഒരാള്‍.

ഞാന്‍ നല്ലൊരു പാചകക്കാരനാണ്. മത്സ്യമാംസാദികള്‍ കൂട്ടിയുള്ള കറികളൊക്കെ വയ്ക്കാറുണ്ട്. ഭാര്യയുടെ സര്‍ട്ടിഫിക്കറ്റും കിട്ടിയിട്ടുണ്ട്.

ഓര്‍മ്മവച്ച കാലം മുതല്‍ ആഴ്ചയിലൊരിക്കല്‍ വീട്ടിലെത്തുന്ന വിരുന്നുകാരനായിരുന്നു അച്ഛന്‍. ഞായറാഴ്ച രാവിലെ മദ്രാസ്‌മെയിലില്‍ വരും. അമ്മയ്ക്കും ഞങ്ങള്‍ മക്കള്‍ക്കുമൊപ്പം സമയം ചെലവഴിച്ച് വൈകിട്ടത്തെ മദ്രാസ്‌മെയിലിന് തിരിച്ചുപോകും.

അന്നത്തെക്കാലത്ത് ഷൂട്ടിംഗ് മുഴുവനും മദ്രാസിലായിരുന്നല്ലോ. കൃത്യനിഷ്ഠയുടെ കാര്യത്തില്‍ അച്ഛന്‍ ഒന്നാമനായിരുന്നു. അച്ഛനില്ലാത്ത സിനിമകള്‍ ചുരുക്കം. ഇല്ലെന്നുതന്നെ പറയാം. ഒരു ലൊക്കേഷനില്‍ നിന്ന് മറ്റൊരിടത്തേക്ക്. കൃത്യസമയത്ത് ലൊക്കേഷനുകളില്‍ ചെല്ലാന്‍ അച്ഛന്‍ ലോറിയെ വരെ ആശ്രയിച്ചിട്ടുണ്ട്.

അദ്ദേഹത്തെ സംബന്ധിച്ച് ഓരോ സിനിമയുടെ കഥകള്‍ കേള്‍ക്കുമ്പോള്‍ ഇഷ്ടപ്പെട്ടാല്‍ ഡയറിയില്‍ ആ സിനിമയുടെ ഷൂട്ടിംഗ് ഡേറ്റ് എഴുതിവയ്ക്കും. ഇന്ന് അങ്ങനെയല്ല, എഗ്രിമെന്റുണ്ടെങ്കിലേ താരങ്ങള്‍ ഡേറ്റ് കൊടുക്കൂ.

സാമ്പത്തികപ്രയാസം നേരിട്ട എത്രയോ നിര്‍മ്മാതാക്കളുടെ സിനിമയില്‍ പ്രതിഫലം പറ്റാതെ അച്ഛന്‍ അഭിനയിച്ചിരിക്കുന്നു. അച്ഛന് വയ്യാത്ത സമയത്ത് അച്ഛന്‍ അന്ന് സഹായിച്ചവരാരും ഒന്നെത്തിനോക്കുകപോലും ചെയ്തില്ല.

അച്ഛന്‍ മരിച്ചശേഷം 3 വര്‍ഷം ബാലന്‍ കെ.നായര്‍ അനുസ്മരണയോഗം കോഴിക്കോട് നടത്തി. പിന്നീട് അതും നിര്‍ത്തി. ഒരുപക്ഷേ അതിന്റെ സംഘാടകര്‍ അച്ഛന്റെ പേര് മറന്നുകാണും.

ഒരുകാര്യത്തില്‍ എനിക്ക് സന്തോഷമുണ്ട്. എന്റെ തറവാട് മുതല്‍ റോഡ് വരെയുള്ള വഴി അറിയപ്പെടുന്നത് ബാലന്‍ കെ. നായര്‍ റോഡ് എന്നാണ്. പിന്നെ ബാലന്‍ കെ. നായരുടെ മകന്‍ എന്ന നിലയിലാണ് ഞാന്‍ സിനിമയിലേക്ക് വന്നത്.

എവിടെച്ചെന്നാലും എനിക്കിരിക്കാന്‍ ഒരു സീറ്റുണ്ടാകും. അതൊക്കെതന്നെ ആളുകള്‍ അച്ഛന് നല്‍കുന്ന സ്‌നേഹമാണ്. മണ്‍മറഞ്ഞുപോയ കലാകാരന്മാരെ സ്വന്തം മക്കള്‍പ്പോലും ശ്രദ്ധിക്കാത്ത ഈ കാലഘട്ടത്തില്‍ എന്നിലൂടെ എന്റെ അച്ഛന്‍ എന്നും ജീവിക്കുന്നു എന്നോര്‍ക്കുമ്പോള്‍ ഞാന്‍ അഭിമാനിക്കുന്നു.