മലപ്പുറം: അസാധുവാക്കിയ ഒരുകോടി രൂപയുടെ നോട്ടിന് വിപണിയില് വില മുപ്പതുലക്ഷം രൂപ. ഇത്തരത്തില് പണം മാറ്റിനല്കാനായി പ്രവര്ത്തിക്കുന്നത് നിരവധി ഏജന്റുമാര്. അസാധുവാക്കിയ അഞ്ഞൂറിന്റേയും ആയിരം രൂപയുടേയും നോട്ടുകളാണ് ഇടനിലക്കാര് മുഖേന മാറ്റി നല്കുന്നത്. പിന്നീട് ഈ പണം വിദേശ മലയാളികളെ ഉപയോഗിച്ച് ഒറിജിനല് നോട്ടുകളാക്കി മാറ്റും. നിലവില് വിദേശ മലയാളികള് നാട്ടില് തിരിച്ചെത്തുമ്പോള് തങ്ങളുടെ പാസ്പോര്ട്ട് ഉപയോഗിച്ച് 25,000രൂപയുടെ പഴയ നോട്ടുകള് മാറ്റിയെടുക്കാനുള്ള സംവിധാനമുണ്ട്.
ഈ അവസരം ഉപയോഗിച്ചാണു പണം മാറ്റുന്നത്. ഇത്തരത്തിലുള്ള വിദേശ മലയാളികളെ കണ്ടത്താന് കമ്മീഷന് അടിസ്ഥാനത്തില് പ്രത്യേക സംഘവും പ്രവര്ത്തിക്കുന്നുണ്ട്. ഇടപാടുകാരായി വേഷംമാറി പോലീസ് നടത്തിയ രഹസ്യാന്വേഷണത്തിലാണ് ഇക്കാര്യങ്ങള് വ്യക്തമായത്. നിരോധിത നോട്ടുകളുടെ വിപണനത്തിനായി ഒരുസംഘം സംസ്ഥാനത്തു പ്രവര്ത്തിക്കുന്നതായുള്ള രഹസ്യവിവരത്തെ തുടര്ന്ന് മലപ്പുറംജില്ലാ പോലീസ് മേധാവി ദേബേഷ്കുമാര് ബെഹ്റയുടെ നേതൃത്വത്തിലാണു പണത്തട്ടപ്പിന്റെ രഹസ്യ വിവരങ്ങള് ശേഖരിച്ചത്.
പണംമാറ്റി നല്കുന്ന സംഘത്തെക്കുറിച്ചു വിവരം ലഭിച്ച പോലീസ്, ഇടപാടുകാരായി വേഷംമാറി സംഘത്തെ സമീപിക്കുകയായിരുന്നു തങ്ങളുടെ െകെയില് ഒരുകോടി രൂപയുടെ അഞ്ഞൂറിന്റേയും ആയിരംരൂപയുടേയും അസാധുനോട്ടുകളുണ്ടെന്നും ഇവമാറ്റി നല്കണമെന്നും പറഞ്ഞാണ് സംഘത്തെ പോലീസ് കണ്ടത്. ആദ്യഘട്ടത്തില് ഒരു കോടി രൂപയ്ക്ക് 25ലക്ഷംരൂപ നല്കാമെന്നു പറഞ്ഞ സംഘത്തോട് വിലപേശിയപ്പോഴാണു 30ലക്ഷം നല്കാമെന്ന് സമ്മതിച്ചത്.
നിരോധിച്ച നോട്ടുകള് തിരിച്ചടയ്ക്കാനുള്ള പ്രത്യേക ഇളവുകളുടെ കാലാവധി അവസാനിക്കാനിരിക്കെയാണു നിരോധിത നോട്ടുകള് മാറ്റി നല്കുന്നത് തകൃതിയായിരിക്കുന്നത്. 3,22,27,500 രൂപയുടെ നിരോധിച്ച 500,1000 രൂപയുടെ നോട്ടുകളുമായി അഞ്ചംഗ സംഘം കഴിഞ്ഞ ദിവസം പെരിന്തല്മണ്ണയില് അറസ്റ്റിലായിരുന്നു. പിടിയിലായ സംഘത്തിന് തമിഴ്നാട്, കര്ണാടക എന്നിവിടങ്ങളിലെ ലോബിയുമായുള്ള ബന്ധത്തെക്കുറിച്ചും ഹവാല ഇടപാടുകളെക്കുറിച്ചും പോലീസ് അന്വേഷിക്കുന്നുണ്ട്.
പിടികൂടിയ അസാധുനോട്ടുകളില് തമിഴ്നാട്ടില്നിന്നെത്തിയതുമുണ്ടെന്ന് പ്രതികള് അന്വേഷണ സംഘത്തിനു മൊഴി നല്കി. അതോടൊപ്പംതന്നെ വിദേശമലയാളികളെ ഉപയോഗിച്ച് പണം മാറ്റുന്നതോടൊപ്പം സ്വകാര്യ ബാങ്കുകളുമായി ബന്ധപ്പെട്ടുള്ള പണം മാറ്റം നടക്കുന്നുണ്ടോ എന്നും പോലീസ് അന്വേഷിക്കുന്നുണ്ട്.
പണംമാറ്റത്തിന്റെ സാധ്യതകളെക്കുറിച്ച് മനസ്സിലാക്കാന് ആര്.ബി.ഐയുമായും ഡി.ആര്.ഐയുമായും ബന്ധപ്പെട്ടതായി മലപ്പുറം ജില്ലാ പോലീസ് മേധാവി ദേബേഷ്കുമാര് ബെഹ്റ 'മംഗള'ത്തോട് പറഞ്ഞു. 1000, 500 നോട്ടുകള് കേന്ദ്രസര്ക്കാര് പിന്വലിച്ച ആദ്യഘട്ടങ്ങളില് ഒരു കോടിരൂപയ്ക്ക് 70ലക്ഷംരൂപവരെ നല്കുന്ന സംഘം പ്രവര്ത്തിച്ചിരുന്നു. പിന്നീട് നാട്ടിലുള്ളവര്ക്കു പണം മാറ്റാന് നിയന്ത്രണങ്ങളേര്പ്പെടുത്തുകയും അതിനാല് പണം മാറാന് കഴിയാതെയും വന്നതോടെയാണ് സംഘങ്ങള് കമ്മീഷന് വര്ധിപ്പിച്ചത്.
പെരിന്തല്മണ്ണയില് നിരോധിത നോട്ടുകളുമായി പിടിയിലായ നാദാപുരം ചാലപ്പുറം ഒതിയാത്ത് ഷംസുദ്ദീന് എന്ന ഷംസു(42), കൊളത്തൂര് കുറുപ്പത്താല് പൂവാലപ്പടി വീട്ടില് മുഹമ്മദ് ഇര്ഷാദ്(22), കുറുപ്പത്താല് കുന്നിന്പുറത്ത് വീട്ടില് മുഹമ്മദ് നജീബ്(26), കോഴിക്കോട് പുതിയങ്ങാടി സ്വദേശി ചന്ദ്രാലയം വീട്ടില് റിജു(37), പന്നിയങ്കരസ്വദേശി ഹാഷിം മന്സിലില് ഹാഷിം(32)എന്നിവരെ കോടതി റിമാന്ഡ് ചെയ്തു.
