ദോഹ : നയതന്ത്രബന്ധം വഷളായതിനെ തുടര്ന്നുള്ള പ്രതിസന്ധി രൂക്ഷമായതോടെ ഖത്തറില് നിന്നും നാട്ടിലേയ്ക്കുള്ള വിമാന ടിക്കറ്റിനായി പ്രവാസികള് നെട്ടോട്ടത്തില്. ഖത്തറില് അവധിക്കാലം ജൂണ് 22 തുടങ്ങും എന്നത് മുന്നില് കണ്ട് ദോഹയില് നിന്നും നേരിട്ടല്ലാതെ മറ്റ് ഗള്ഫ് രാജ്യങ്ങളിലൂടെ വിമാന ടിക്കറ്റ് എടുത്തവരാണ് പാടുപെടുന്നത്. നാട്ടില് എത്താനായി ഇത്തരത്തില് മാസങ്ങള്ക്ക് മുന്പേ ടിക്കറ്റ് എടുത്തകര് പുതിയ ടിക്കറ്റ് സംഘടിപ്പിക്കാനുള്ള പരിശ്രമത്തിലാണ്.
പ്രതിസന്ധി രൂക്ഷമായതോടെ ടിക്കറ്റ് നിരക്ക് നാലുമടങ്ങിലേറെ ആയിട്ടുണ്ട്. ടിക്കറ്റ് ബുക്ക് ചെയ്യുമ്പോള് ഈടാക്കിയ മുഴുവന് തുകയും തിരിച്ചു നല്കുമെന്ന് അറിയിച്ചിട്ടുണ്ടെങ്കിലും മാസങ്ങള്ക്ക് മുന്പ് ഈടാക്കിയ ചെറിയ തുക തിരിച്ചുകിട്ടിയിട്ട് കാര്യമില്ലെന്ന സ്ഥിതിയാണ് ഇപ്പോള്. ഖത്തര് എയര്വേസ് കോഴിക്കോട്ടേയ്ക്ക് 1800 റിയാലിന് നല്കിയ ടിക്കറ്റിന് ജൂണ് 22 ന് ശേഷമുള്ള നിരക്ക് 3600 റിയാലിനും മേലെയാണ്. അതുകൊണ്ടു തന്നെ ഖത്തര് ഒഴികെയുള്ള ഗള്ഫ് രാജ്യങ്ങളുടെ വിമാനങ്ങള് ഒഴിവാക്കി ഇന്ത്യ, ശ്രീലങ്ക തുടങ്ങിയ രാജ്യങ്ങളില് നിന്നുള്ള സര്വീസുകളില് ടിക്കറ്റ് സംഘടിപ്പിക്കാനുള്ള ശ്രമങ്ങളാണ് ഇപ്പോള് പ്രവാസികള്ക്കിടയില് നടന്നുവരുന്നത്.
ഇതിനിടെ, ഭക്ഷ്യസാധനങ്ങള്ക്ക് വില കുതിച്ചുയര്ന്നേക്കുമെന്നുള്ള ആശങ്ക പരന്നതിനെ തുടര്ന്ന് ഖത്തറിലെ ഹൈപ്പര് മാര്ക്കറ്റുകളില് വന് തിരക്കാണ് അനുഭവപ്പെട്ടുകൊണ്ടിരിക്കുന്നത്. അതേസമയം, അതിര്ത്തി അടച്ചെങ്കിലും വിശുദ്ധ റംസാനില് ഭക്ഷ്യവസ്തുക്കളുടെ ഒഴുക്കുതടയുന്ന നിലപാട് ഗള്ഫ് രാജ്യങ്ങളുടെ ഭാഗത്തുനിന്ന് ഉണ്ടാകില്ലെന്ന പ്രതീക്ഷയിലാണ് ഖത്തറിലെ ഇന്ത്യന് സമൂഹം.
ഭീകരര്ക്ക് സാമ്പത്തിക സഹായം നല്കുന്നുവെന്ന് ആരോപിച്ചാണ് വിവിധ ഗള്ഫ് രാജ്യങ്ങള് ഖത്തറുമായുള്ള നയതന്ത്രബന്ധം അവസാനിപ്പിക്കാന് തീരുമാനിച്ചത്. ഖത്തറുമായുള്ള നയതന്ത്ര ബന്ധം ഉപേക്ഷിച്ചതിന് പിന്നാലെ സൗദി അറേബ്യ ഉള്പ്പെടെയുള്ള അഞ്ച് ഗള്ഫ് രാജ്യങ്ങള് ദോഹയിലേയ്ക്കും തിരിച്ചും ഉള്ള വിമാന സര്വീസുകള് റദ്ദാക്കുന്നതായി വ്യക്തമാക്കിയിരുന്നു. സൗദിയ്ക്ക് പുറമേ യു.എ.ഇ, ബഹ്റൈന്, ഈജിപ്ത്, യമന് എന്നീ രാജ്യങ്ങളിലെ വിമാനക്കമ്പനികളാണ് സര്വീസ് നിര്ത്തുന്നത്.
ഇതിന്റെ ഭാഗമായി അബുദാബി കേന്ദ്രീകരിച്ച എത്തിഹാദ് എയര്വെയ്സ് നാളെ മുതല് സര്വീസ് നടത്തില്ലെന്ന് അറിയിച്ചിരുന്നു. ഇന്ന് പ്രദേശിക സമയം 2.45 നായിരിക്കും ദോഹയിലേയ്ക്കുള്ള അവസാന വിമാനമെന്നും എത്തിയാണ് വക്താവ് അറിയിച്ചിരുന്നു. ഇതിനിടെ ദുബായില് നിന്നു ദോഹയിലേയ്ക്ക് സര്വീസ് നടത്തുന്ന ഫ്ളൈ ദുബായി സര്വീസും നിര്ത്തി. ഇതോടൊപ്പം എമിരേറ്റ്സ്, സൗദിയ, ഗള്ഫ് എയര്, ഈജിപ്ത് എയര് എന്നീ വിമാനക്കമ്പനികളും സര്വീസ് നിര്ത്തുന്നതായാണ് വിവരം.
