തൃശൂര്‍: പോളണ്ടില്‍ എന്തു സംഭവിച്ചു? നിക്കരാഗ്വയില്‍ എന്തു സംഭവിച്ചു?സന്ദേശത്തിലെ കോട്ടപ്പള്ളിയെപ്പോലുള്ള ചോദ്യങ്ങളൊക്കെ നിര്‍ത്തി ഇന്ത്യയിലെ കമ്യൂണിസ്റ്റ് പാര്‍ട്ടികള്‍ ഇവിടുത്തെ സാമൂഹ്യ സാഹചര്യങ്ങളിലും പാരമ്പര്യത്തിലും ശ്രദ്ധയൂന്നാന്‍ ബിഎംഎസിന്റെ വിമര്‍ശനം. വ്യാഴാഴ്ച തൃശൂരില്‍ നടന്ന വാര്‍ത്താസമ്മേളനത്തില്‍ ഇംഎംഎസ് അനുസ്മരണ പരിപാടിയായ ഇഎംഎസ് സ്മൃതിയില്‍ സിപിഎം ജനറല്‍ സെക്രട്ടറി സീതാറാം യെച്ചൂരിയുടെയും മുന്‍ ജനറല്‍ സെക്രട്ടറി പ്രകാശ് കാരാട്ടും മുന്നോട്ട് വെച്ച കാഴ്ചപ്പാടുകളെ ചോദ്യം ചെയ്തു.
ഇന്ത്യയിലെ കമ്യൂണിസ്റ്റുകള്‍ ഇവിടുത്തെ സാമൂഹ്യ പ്രശ്‌നങ്ങളിലും ഭാരതത്തിന്റെ പൈതൃക പാരമ്പര്യത്തിലൂം ഊന്നാനും ആവശ്യപ്പെട്ടു. ഒക്‌ടോബര്‍ വിപ്‌ളവത്തിന്റെ ഫലമായുള്ള മാറ്റം തെറ്റാണെന്ന് വാദിക്കുകയും 90 കളില്‍ മിഖായേല്‍ ഗോര്‍ബച്ചേവ് കൊണ്ടുവന്ന പെരിസ്‌ട്രോയിക്കയും ഗ്‌ളാസ്‌നോസ്റ്റും യുഎസ്എസ്ആറില്‍ ദാരിദ്ര്യം വിതയ്ക്കുകയായിരുന്നെന്നും പറഞ്ഞു. പോളണ്ടില്‍ പോലും ആള്‍ക്കാര്‍ക്ക് ആഹാരത്തിന് വേണ്ടി സമരപാതയിലിറങ്ങേണ്ടി വന്നു. കിഴക്കന്‍ ജര്‍മ്മനിയില്‍ ദാരിദ്ര്യത്തിന് മുന്നില്‍ ബെര്‍ലിന്‍ മതില്‍ പോലും വീണെന്നും ഏത് കമ്യൂണിസ്റ്റ് രാജ്യത്താണ് ജനാധിപത്യവും മതേതരത്വവും പുലരുന്നതെന്നും ചോദിച്ചു.
1942 ലും 1962 ലും കമ്യൂണിസ്റ്റ് പാര്‍ട്ടി അനേകം തവണയാണ് കുഴിയില്‍ വീണത്. പാര്‍ട്ടി ഇപ്പോഴെങ്കിലൂം തെറ്റ് തിരുത്തി ഇന്ത്യന്‍ സാഹചര്യത്തിലേക്ക് ശ്രദ്ധയൂന്നണം. റഷ്യയില്‍ ലനിനും ചൈനയില്‍ മാവോയും വിയറ്റ്‌നാമില്‍ ഹോചിമിനും അവരുടേതായ കമ്യുണിസം കൊണ്ടുവന്നപ്പോള്‍ ഇന്ത്യ തനിച്ചായി. ഇന്ത്യന്‍ കമ്യൂണിസം സൃഷ്ടിക്കുന്നതില്‍ പാര്‍ട്ടികള്‍ പരാജയമാണെന്നും പറഞ്ഞു. സ്വന്തം ആശയ സിദ്ധാന്തങ്ങളുടെ അപകര്‍ഷതയിലാണ് കമ്യൂണിസ്റ്റ് പാര്‍ട്ടികളെന്ന് ബിജെപി സംസ്ഥാന സെക്രട്ടറി ബി ഗോപാലകൃഷ്ണനും പറഞ്ഞു. ഇന്ത്യയില്‍ സോഷ്യലിസം കൊണ്ടുവരാമെന്ന മലര്‍പ്പൊടിക്കാരന്റെ സ്വപ്നത്തിലാണ് ഇന്ത്യന്‍ കമ്യുണിസ്റ്റുകാര്‍ എന്നും പറഞ്ഞു.
Comments