പന്തളം: വിവാഹ പന്തലില്നിന്നു നാട്ടുകാര് പിടികൂടി പോലീസില് ഏല്പ്പിച്ച വിവാഹത്തട്ടിപ്പുകാരിയുടെ കൂട്ടാളിയേയും പോലീസ് അറസ്റ്റ് ചെയ്തു. കോട്ടയം തെള്ളകം കുഴിച്ചാല് കെ.പി. തുളസിദാസാണ്(42) അറസ്റ്റിലായത്. അടൂര് കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
കുളനട പനങ്ങാട് സ്വദേശിയായ യുവാവുമായുള്ള വിവാഹം നടക്കുന്നതിനിടെ പോലീസ് പിടിയിലായ കൊട്ടാരക്കര ഇളമാട് ആക്കല് ഷിബു വിലാസത്തില് വി. ശാലിനിയുടെ സഹായിയാണ് ഇയാള്. ഒരു വര്ഷത്തോളമായി ഇവര് ഒരുമിച്ച് കഴിയുകയായിരുന്നു. തുളസിദാസാണ് പത്രത്തില് വിവാഹപരസ്യംനല്കിയത്. പിന്നീടു സഹോദരനാണെന്നു പറഞ്ഞ് ഫോണില് യുവാവുമായി ബന്ധപ്പെട്ടതും ഇയാളാണ്.
തുളസിദാസ് സഹോദരനാണെന്നാണ് ശാലിനിയും പോലീസിനോട് പറഞ്ഞിരുന്നത്. സംശയത്തിന്റെ അടിസ്ഥാനത്തില് പോലീസ് ശാലിനിയെ കൊണ്ട് ഇയാളെ പന്തളം സ്റ്റേഷനില് വിളിച്ചു വരുത്തി ചോദ്യം ചെയ്തപ്പോഴാണ് തട്ടിപ്പില് ഇയാളുടെ പങ്ക് വ്യക്തമായത്.
വിവാഹത്തലേന്ന് ശാലിനിയെ ചെങ്ങന്നൂരില് കൊണ്ടു വിട്ടതും തട്ടിപ്പിലൂടെ സ്വരൂപിക്കുന്ന പണം െകെകാര്യം ചെയ്തു വന്നിരുന്നതും ഇയാളാണെന്നും പോലീസ് പറഞ്ഞു. വിവാഹദിനത്തില് ശാലിനി ധരിച്ച 50 പവന് വരുന്ന ആഭരണങ്ങള് മുക്കുപണ്ടമാണെന്നും പരിശോധനയില് തെളിഞ്ഞു.
കുളനട ഉള്ളന്നൂര് വിളയാടിശേരില് ക്ഷേത്രത്തില് ഞായറാഴ്ചയാണ്വിവാഹചടങ്ങ് നടന്നത്. കിടങ്ങന്നൂരില് നേരത്തെ സമാനരീതിയില് തട്ടിപ്പിനിരയായ യുവാവിന്റെ സുഹൃത്തും ക്ഷേത്ര ഭാരവാഹിയുമായ അഭിലാഷിന്റെ സമയോചിതമായ ഇടപെടലിനെ തുടര്ന്നാണ് ശാലിനി വലയിലായത്.
