മുംബൈ: അണ്ടര് 17 ലോകകപ്പ് ഫുട്ബോളില് ബ്രസീലിന്റെയും സ്പെയിന്റെയും വേദി കൊച്ചി. ഡി ഗ്രൂപ്പ് മത്സരങ്ങളാണ് കൊച്ചിയില് നടക്കുക. ബ്രസീലിനെ കൂടാതെ സ്പെയിന്, ദക്ഷിണ കൊറിയ, നൈജര് ടീമുകളാണു കൊച്ചിയിലെ ജവാഹര്ലാല് നെഹ്റു സ്റ്റേഡിയത്തില് കളിക്കുക. ഒക്ടോബര് ഏഴിനും പത്തിനുമാണ് ബ്രസീലിന്റെ മത്സരങ്ങള്. എ ഗ്രൂപ്പിലാണ് ആതിഥേയരായ ഇന്ത്യയുടെ സ്ഥാനം. യു.എസ്.എ., കൊളംബിയ, ഘാന എന്നിവരാണ് ഇന്ത്യക്കൊപ്പം കളിക്കുന്നത്.
ഡല്ഹിയിലാണ് എ ഗ്രൂപ്പിന്റെ മത്സര വേദി. ഒക്ടോബര് ആറിന് യു.എസിനെതിരേയാണ് ഇന്ത്യയുടെ ആദ്യ മത്സരം. ഒക്ടോബര് ഒന്പതിന് കൊളംബിയയേയും 12 ഘാനയെയും ഇന്ത്യ നേരിടും. നൈജീരിയയുടെ ഇതിഹാസ താരം എംവാങ്കോ കാനു, അര്ജന്റീനയുടെ മുന് താരം എസ്ബാന് കാമ്പിയാസോ, ഇന്ത്യന് നായകന് സുനില് ഛേത്രി, ബാഡ്മിന്റണ് താരവും ഒളിമ്പിക്സ് വെള്ളി മെഡല് ജേതാവുമായ പി.വി. സിന്ധു എന്നിവര് ചേര്ന്നായിരുന്നു ലോകകപ്പ് ഗ്രൂപ്പുകളുടെയും വേദികളുടെയും നറുക്കെടുപ്പ് നടത്തിയത്.
ഗ്രൂപ്പിലെ ഒന്നും രണ്ടും സ്ഥാനക്കാര് നോക്കൗട്ടിലേക്കു നേരിട്ടു യോഗ്യത നേടും. ആറു ഗ്രൂപ്പുകളിലെയും മികച്ച മൂന്നാംസ്ഥാനക്കാരായും നോക്കൗട്ടില് കളിക്കാം. നാലു ടീമുകള്ക്കാണ് മികച്ച മൂന്നാംസ്ഥാനക്കാരാകാന് അവസരം ലഭിക്കുക. ലോകകപ്പിലെ ആദ്യ മത്സരം ആറിനു കൊളംബിയയും ഘാനയും തമ്മിലാണ്. മുംബൈ, ഗോവ, ഗുവാഹാത്തി, കൊല്ക്കത്ത എന്നിവയാണു മറ്റു വേദികള്. ഫൈനല് മത്സരം 28 നു കൊല്ക്കത്തിലാണ്. 21, 22 തീയതികളിലാണ് ക്വാര്ട്ടര് ഫൈനല് മത്സരങ്ങള്. 25 നു നവി മുംബൈയിലും ഗുവാഹാത്തിയിലുമായി സെമി ഫൈനല് മത്സരങ്ങള് നടക്കും. മൂന്നാംസ്ഥാനക്കാര്ക്കു വേണ്ടിയുള്ള മത്സരവും ഫൈനലും 28 നാണ്. ഇന്ത്യയും നൈജറും ന്യൂ കാലഡോണിയയും ലോകകപ്പില് അരങ്ങേറും.
