കൊച്ചി: നടിയെ തട്ടിക്കൊണ്ടു പോയ കേസിലെ പ്രതി സുനില്ക്കുമാര് നേരത്തേ നടത്തിയ തട്ടിക്കൊണ്ടു പോകല് ശ്രമവും അപകീര്ത്തി ദൃശ്യങ്ങള് പകര്ത്തി ബ്ളാക്ക്മെയില് ചെയ്യുക എന്ന ലക്ഷ്യത്തില്. യുവനടിയെ തട്ടിക്കൊണ്ടുപോകാനാണു പദ്ധതിയിട്ടതെങ്കിലും നിര്മ്മാതാവിന്റെ ഭാര്യയായിരുന്നു വലയില് വീണതെന്നും നേരത്തേ റിപ്പോര്ട്ടുകള് പുറത്തുവന്നിരുന്നു. മുമ്പ് നടത്തിയ തട്ടിക്കൊണ്ടു പോകല് കേസുകളില് അന്വേഷണസംഘത്തിന് മുമ്പാകെയാണ് മൊഴി നല്കിയത്.
സുനിലില് നിന്നും കൃത്യമായ നിര്ദേശം കിട്ടാതെ വന്നതിനാലാണ് ശ്രമം പാതിവഴിയില് ഉപേക്ഷിച്ചതെന്ന് നേരത്തേ കൂട്ടുപ്രതികളും സമ്മതിച്ചിരുന്നു. നിര്മ്മാതാവ് ജോണി സാഗരികയുടെ ഡ്രൈവറായി ജോലി ചെയ്തിരുന്ന സമയത്തായിരുന്നു തട്ടിക്കൊണ്ടുപോകല് പദ്ധതി ആലോചിച്ചത്. നിര്ദേശപ്രകാരം സംഘം കാര്യങ്ങള് ചെയ്തെങ്കിലും ജോണി സാഗരികയുടെ അടുത്തു നിന്നും സുനിക്ക് സമയത്ത് സംഘത്തിനൊപ്പം ചേരാന് കഴിയാതെ പോകുകയും ചെയ്തു. ഒരു യുവനടിയെ തട്ടിക്കൊണ്ടു പോകാനായിരുന്നു പദ്ധതിയിട്ടതെങ്കിലും അന്ന് ആ നടി വരാതിരിക്കുകയും പകരം നിര്മ്മാതാവിന്റെ ഭാര്യയായ നടി വരികയുമായിരുന്നു.
സിനിമാ ചിത്രീകരണത്തിനായി എത്തിയ നടിയെയും സഹായിയെയും സുനിയുടെ സംഘം ട്രാവലറില് കയറ്റി സഹായിയെ കുമ്പളം ആശുപത്രിയില് ഇറക്കിയ ശേഷം നടിയുമായി നഗരം ചുറ്റിക്കറങ്ങുകയും നടി ഭര്ത്താവിനെ വിളിക്കുകയും ഭര്ത്താവ് ജോണി സാഗരികയെ വിളിക്കുയും ആയിരുന്നു. കാര്യങ്ങള് കൈവിട്ടുപോയതോടെ നടിയെ ഒരു ഹോട്ടലിന് മുന്നില് ഇറക്കി സംഘം കടന്നു കളഞ്ഞു. കേസില് പിടികൂടിയവരെ എല്ലാവരേയും ഒരുമിച്ചിരുത്തി നടത്തിയ ചോദ്യം ചെയ്യലിലാണ് വിവരങ്ങള് കിട്ടിയത്. 2011 ല് നടന്ന സംഭവത്തില് ട്രാവലര് ഓടിച്ച കണ്ണൂര് പാടിച്ചാല് സ്വദേശി സുനീഷ്, കോതമംഗലം സ്വദേശികളായ എബിന്, അഷ്റഫ്, ബിപിന് വി പോള് എന്നിവരെ പോലീസ് പിടികൂടിയിരുന്നു.
നിലവില കണ്ണൂരില് സ്വകാര്യബസ് ഡ്രൈവറായി ജോലി ചെയ്യുന്ന സുനീഷ് കൊച്ചിയില് ഡ്രൈവറായി ജോലി ചെയ്ത കാലത്താണ് സുനിയുമായി പരിചയത്തില് ആയത്. ആറു വര്ഷത്തോളം കൊച്ചിയില് സുനിയുടെ വെണ്ണലയിലെ വീട്ടിലായിരുന്നു താമസം. തട്ടിക്കൊണ്ടു പോകലിനായി ഉപയോഗിച്ച വാഹനം പിന്നീട് സംഘം തമിഴ്നാട്ടിലേക്ക് കടത്തുകയും ചെയ്തിരുന്നു. കേസില് ഇന്നലെ നടിയുടെ തിരുവനന്തപുരത്തെ വീട്ടിലെത്തി പോലീസ് മൊഴി എടുത്തിരുന്നു. ഈ കേസില് ഉള്പ്പെട്ട എല്ലാവരും പിടിയിലായിട്ടുണ്ട്. ഇതേസംഘം 2010 ല് മറ്റൊരു നടിയേയും തട്ടിക്കൊണ്ടു പോകാന് ശ്രമം നടത്തിയിരുന്നതായി പോലീസിന് സൂചന ലഭിച്ചിട്ടുണ്ട്.
മുമ്പ് നടന്ന തട്ടിക്കൊണ്ടു പോകല് സംഭവങ്ങളുടെ അടിസ്ഥാനത്തിലാണ് സുനിയെ തന്നെ ദിലീപ് ക്വട്ടേഷന് ഏല്പ്പിച്ചത്. ഒന്നര കോടിയുടെ ക്വട്ടേഷന് ആയിരുന്നെന്നാണ് സുനി പോലീസിനോട് പറഞ്ഞിരിക്കുന്നത്. നടിയുമായി അടുപ്പമുണ്ടെന്ന് സുനി പറഞ്ഞപ്പോള് ഈ അടുപ്പം ഉപയോഗിച്ച് നഗ്നദൃശ്യങ്ങള് പകര്ത്തി കൊടുത്താല് പണം നല്കാമെന്ന് ദിലീപ് വാഗ്ദാനം ചെയ്തെന്നും ഇങ്ങിനെ പകര്ത്തുന്ന ദൃശ്യങ്ങള് ഭാവിയില് ചോര്ന്നാല് താന് കുടുങ്ങുമെന്ന് സുനി ആശങ്കപ്പെട്ടപ്പോള് ഫോണ് നന്നാക്കാന് കൊടുത്തപ്പോള് ചോര്ന്നതാണെന്ന് പറയണമെന്നായിരുന്നു സുനിക്ക് ദിലീപ് കൊടുത്ത നിര്ദേശമെന്നും പറഞ്ഞു.
