തിരുവനന്തപുരം: കൊച്ചിയില് ആക്രമിക്കപ്പെട്ട നടിയെ കുറിച്ച് നടത്തിയ പരാമര്ശത്തില് മുന് ഡി.ജി.പി ടി.പി സെന്കുമാറിന് അന്വേഷണ സംഘത്തിന്റെ ക്ലീന്ചിറ്റ്. ഒരു വാരികയ്ക്ക് നല്കിയ അഭിമുഖത്തില് നടിയെ കുറിച്ച് മോശം പരാമര്ശം നടത്തിയെന്നായിരുന്നു സെന്കുമാറിനെതിരായ പരാതി.
എന്നാല് സെന്കുമാര് ബോധപൂര്വ്വം പരാമര്ശം നടത്തിയിട്ടില്ലെന്നും മറ്റൊരാളുമായി നടത്തിയ സ്വകാര്യ സംഭാഷണത്തിലെ വിശദാംശം ലേഖകന് അനുമതി കൂടാതെ പ്രസിദ്ധീകരിക്കുകയായിരുന്നുവെന്ന് അന്വേഷണ റിപ്പോര്ട്ടില് പറയുന്നു.
ലേഖകനുമായുള്ള അഭിമുഖത്തിനിടെ സെന്കുമാര് മറ്റൊരാളുമായി ഫോണില് സംസാരിച്ചത് അദ്ദേഹത്തിന്റെ അനുമതി കൂടാതെ ലേഖകന് റെക്കോര്ഡ് ചെയ്യുകയും പ്രസിദ്ധീകരിക്കുകയുമായിരുന്നു.
സെന്കുമാറിനെതിരെ നടപടി ആവശ്യപ്പെട്ട് സിനിമയിലെ വനിതാ കൂട്ടായ്മയാണ് പരാതി നല്കിയത്. തിരുവനന്തപുരം ഡി.സി.പി രമേശ് കുമാര് നടത്തിയ അന്വേഷണത്തിന്റെ റിപ്പോര്ട്ട് റേഞ്ച് ഐ.ജിക്ക് കൈമാറി. ഐ.ജി മനോജ് ഏബ്രഹാം റിപ്പോര്ട്ട് ഡി.ജി.പിക്കും സമര്പ്പിച്ചു. റിപ്പോര്ട്ടില് ആര്ക്കെതിരെയും നടപടിക്ക് ശിപാശയില്ല.
അതേസമയം, ഇതേവാരികയ്ക്ക് നല്കിയ മറ്റൊരു അഭിമുഖവുമായി ബന്ധപ്പെട്ട് സെന്കുമാര് ക്രൈംബ്രാഞ്ച് അന്വേഷണം നേരിടുകയാണ്. മതസ്പര്ദ്ധ വളര്ത്തുന്ന രീതിയില് സംസാരിച്ചുവെന്നാണ് സെന്കുമാറിനെതിരായ പരാതി. കേസില് ഹൈക്കോടതിയില് നിന്ന് സെന്കുമാര് മുന്കൂര് ജാമ്യവും നേടിയിട്ടുണ്ട്.
