കോട്ടയം: അടിമയാകുന്നവരെ മരണത്തിലേക്കു വരെ തള്ളിവിടുന്ന ബ്ലൂവെയ്ല് ഗെയിമിന്റേതെന്നു കരുതുന്ന ലിങ്കുകള് വാട്ട്സ് ആപ്പില് പ്രചരിക്കുന്നു. യുവാക്കളുടെ ഗ്രൂപ്പുകളിലും സ്വകാര്യ മെസേജായുമൊക്കെയാണ് ഇതു പ്രചരിക്കുന്നത്. ഘട്ടംഘട്ടമായി മരണത്തിലേക്ക് അടുപ്പിക്കുന്ന അസാധാരണമായ ഒരു ഗെയിമാണ് ബ്ലൂവെയ്ല്. ദി െസെലന്റ് ഹൗസ്, ദി വെയില് ഇന് ദി സീ എന്നീ പേരുകളിലും ബ്ലൂവെയ്ല് പ്രചരിക്കുന്നുണ്ട്. രഹസ്യ ലിങ്കുകള് വഴിയും കമ്യൂണിറ്റി വഴിയുമാണു ഗെയിമിന്റെ ലിങ്കുകള് വ്യാപിക്കുന്നത്.
ഇവ വാട്ട്സ് ആപ്പിലൂടെ എത്തുന്നതോടെ കൂടുതല് പേരിലേക്ക് അതിവേഗം എത്തപ്പെടും. തലയിലും ശരിരത്തിലും മുറിവേല്പ്പിക്കുക, സാഹസികതയും െധെര്യവും പരീക്ഷിക്കാന് പുലര്ച്ച ഒറ്റയ്ക്കിരുന്നു പ്രേത സിനിമകള് കാണുക എന്നിങ്ങനെയുള്ള ടാസ്കുകളിലൂടെ ഗെയിമിനു പൂര്ണമായും അടിമപ്പെടുകയും ഗെയിമിന്റെ നിര്ദേശങ്ങള്ക്കനുസരിച്ചു പ്രവര്ത്തിക്കാനുള്ള മാനസിക നിലയിലേക്കു വ്യക്തികള് എത്തിച്ചേരുകയും ചെയ്യുന്നു. ഇടയ്ക്ക് എപ്പോഴെങ്കിലും അപകടസാധ്യത മനസിലാക്കി പിന്മാറാനോ നിര്ത്താനോ ശ്രമിച്ചാല് നേരത്തേ എപ്പോഴെങ്കിലും ഹാക്ക് ചെയ്തു വച്ചിട്ടുള്ള വിവരങ്ങള് വച്ചു ഭീഷണിപ്പെടുത്തുന്നതിനു പുറമേ ചെയ്യാത്ത കുറ്റങ്ങള് ചെയ്തു എന്നു കാണിച്ചു ഭയപ്പെടുത്തുകയും ചെയ്യുന്നു.
കളിക്കുന്നവര് ഓരോ ലെവല് കഴിയും തോറും കൂടുതല് അടിമപ്പെടുകയാണു ചെയ്യുന്നത്. മനഃശാസ്ത്രപരമായ കൗണ്സിലിങ്ങിലൂടെ മാത്രമേ ഗെയിമിന് അടിമപ്പെട്ടവരെ തിരിച്ചുകൊണ്ടുവരാന് കഴിയൂ. എന്നാല് ഇത്തരക്കാരെ തിരിച്ചറിയുക എന്നതാണ് ഏറെ ദുഷ്കരം. താന് ബ്ലൂവെയില് കളിക്കുന്നുവെന്ന് കാണിച്ച് ഫെയ്സ്ബുക്കില് പോസ്റ്റിടുകയും സുഹൃത്തിനോട് ഫോണ് സംഭാഷണം നടത്തുകയും ചെയ്ത യുവാവിനെതിരെ പോലീസ് കേസെടുത്തു. ഇടുക്കി മുരിക്കാശേരി സ്വദേശിക്കെതിരെയാണ് കേസെടുത്തത്.
ഇയാള്ക്ക് മാനസികമായി എന്തെങ്കിലും പ്രശ്നങ്ങള് ഉണ്ടോയെന്ന് പോലീസിന് സംശയമുണ്ട്. ബ്ലൂ വെയില് ഗെയിമിന്റെ നാലു ഘട്ടങ്ങള് താന് എത്തിയെന്നു കാണിച്ചാണ് ഇയാള് പോസ്റ്റിട്ടത്. തുടര്ന്ന് യുവാവ് തന്റെ സുഹൃത്തുമായി സംസാരിച്ച ഫോണ് സന്ദേശത്തിന്റെ ശബ്ദരേഖയും പുറത്തു വന്നു. ഗെയിം കളിക്കുകയും െകെയില് ബ്ലേഡ് കൊണ്ട് മുറിവേല്പ്പിച്ചതായും ഇയാള് അവകാശപ്പെട്ടു. എന്നാല് സംഭവം വിവാദമായതോടെ താന് ഗെയിം കളിച്ചിട്ടില്ലെന്നും ഫെയ്സ് ബുക്കില് െലെക്ക് കിട്ടാനായി പോസ്റ്റ് ഇട്ടതാണെന്നും യുവാവ് പോലീസിനോടു സമ്മതിച്ചു. എന്നാല്, ഇതു പോലീസ് പൂര്ണമായും വിശ്വസിച്ചിട്ടില്ല.
ഇയാളുടെ ഫോണ് ഉള്പ്പടെ പോലീസ് പിടിച്ചെടുത്തു. ഇതു പരിശോധനയക്ക് െകെമാറി. പോലീസ് സ്റ്റേഷനില് വച്ചു ശാരീരികാസ്വാസ്ഥ്യം പ്രകടിപ്പിച്ച യുവാവ് ഇപ്പോള് മനോരോഗ വിദഗ്ധന്റെ ചികില്സയിലാണ്. യുവാവിന്റെ മനോനില പൂര്വ സ്ഥിതിയിലായ ശേഷം കൂടുതല് ചോദ്യം ചെയ്യുമെന്നും അതിനു ശേഷമേ ബ്ലൂ വെയില് കളിച്ചിട്ടുണ്ടെയെന്നതിനെക്കുറിച്ചു വ്യക്തത വരുത്താനാകൂവെന്നും ഇടുക്കി സിഐ: സിബിച്ചന് ജോസഫ് പറഞ്ഞു. ഫെയ്സ്ബുക്ക് വഴി വ്യാജസന്ദേശം പ്രചരിപ്പിച്ചതിന് ഐ.ടി ആക്ട് പ്രകാരമാണു യുവാവിനെതിരെ കേസ് എടുത്തിരിക്കുന്നത്. കൂടുതല് അന്വേഷണത്തിനുശേഷമെ ഇതു സംബന്ധിച്ച യഥാര്ഥ വിവരങ്ങള് പുറത്തുവരൂ.
