''അമ്പയര് കുമാരധര്മ്മസേനയോട് ആ ഓവര് എറിയാന് പോകും മുമ്പ് ടവ്വല് ഉപയോഗിക്കാന് അനുവാദം തേടിയിരുന്നു. അത് തീര്ച്ചയായും സ്റ്റമ്പ് ക്യാമറയില് റെക്കോഡ് ചെയ്യപ്പെട്ടിട്ടുണ്ടാകണം. ദക്ഷിണാഫ്രിക്കന് ബൗളര് അലന് ഡൊണാള്ഡിനെ പോലെ പന്തെറിയുന്നതിന് വേണ്ടി മാത്രമായിരുന്നു അന്ന് ആ ടൗവ്വല് തിരുകിയത്. '' ഒത്തുകളി ആരോപിക്കപ്പെട്ട് ആജീവനാന്ത വിലക്ക് നേരിടേണ്ടി വന്ന ശ്രീശാന്ത് തനിക്കെതിരേ പരാമര്ശിക്കപ്പെട്ട വാദങ്ങളില് വെളിപ്പെടുത്തലുകളുമായി രംഗത്ത വന്നു.
അലന് ഡൊണാള്ഡിനെ ഇഷ്ടപ്പെട്ടിരുന്ന താന് അദ്ദേഹം ചെയ്തിരുന്ന കാര്യങ്ങള് അനുകരിച്ചിരുന്നു. ആംബാന്ഡും ടൗവ്വലും സിന്ദൂരക്കുറിയുമെല്ലാം നേരത്തേയും ഉപയോഗിച്ചിട്ടുണ്ട്. ഡൊണാള്ഡിനെ പോലെ മുഖത്ത് സിനിക്ക് ഓക്സൈഡ് തേക്കാറുണ്ടായിരുന്നു. 'ജിത്തു ജനാര്ദ്ദനന്' എന്നോട് ആം ബാന്ഡോ ടൗവ്വലോ സിന്ദൂരക്കുറിയോ അതുപോലെ എന്തെങ്കിലും തിരിച്ചറിയാനായി ഉപയോഗിക്കണമെന്ന് പറഞ്ഞതായിട്ടാണ് ആരോപണം. എന്നാല് ഇതെല്ലാം താന് മുമ്പും ചെയ്തിരുന്നു. അപ്പോഴും അത് ഒത്തുകളിയുടെ ഭാഗമായിരുന്നോയെന്നും ശ്രീശാന്ത് ചോദിക്കുന്നു. ഇതെല്ലാം ഉപയോഗിക്കുമ്പോള് പന്തേറ് മോശമാകില്ലെന്നാണ് ഞാന് വിശ്വസിച്ചിരുന്നതെന്നും താരം പറഞ്ഞു.
വെറും 10 ലക്ഷം രൂപയ്ക്ക് വേണ്ടി സ്വന്തം ജീവിതവും കരിയറും താന് തുലയ്ക്കുമെന്ന് തോന്നുന്നുണ്ടോയെന്ന് ചോദിച്ച ശ്രീശാന്ത് ഒരു പത്തു കോടിയെങ്കിലും തനിക്ക് നേരെ ഡല്ഹി പോലീസിന് ആരോപിക്കാമായിരുന്നെന്നും പരിഹസിച്ചു. കളിയില് വാതുവെപ്പുകാര്ക്ക് സൂചന നല്കുന്നതിനാണ് താരം അരയില് ടൗവ്വല് തിരുകിയത് എന്നായിരുന്നു ശ്രീശാന്തിനെതിരേ ഉയര്ന്ന ആരോപണം. ഇത് പോലീസ് നിരത്തിയ പ്രധാന തെളിവുകളില് ഒന്നായി മാറുകയും ചെയ്തു. കിംഗ്സ് ഇലവന് പഞ്ചാബിനെതിരേ 2013 ലെ ഐപിഎല് മത്സരത്തില് രാജസ്ഥാന് റോയലിന് വേണ്ടി കളിച്ചപ്പോഴാണ് താരം വാതുവെയ്പ്പില് കുടുങ്ങിയത്.
ഈ ആരോപണത്തിന് പിന്നാലെ ശ്രീശാന്തിനെതിരേ 2013 സെപ്തംബറില് ബിസിസിഐ താരത്തിനെതിരേ ആജീവനാന്ത വിലക്ക് ഏര്പ്പെടുത്തിയിരുന്നു. എന്നാല് കോടതി കുറ്റവിമുക്താനാക്കിയിട്ടും ബിസിസിഐ വിലക്ക് മാറ്റിയിരുന്നില്ല. തുടര്ന്ന് താരം ഹൈക്കോടതിയില് അപ്പീല് സമര്പ്പിക്കുകയും വിലക്ക് നീക്കി വിധി ഉണ്ടാകുകയും ചെയ്തു. എന്നിട്ടും ബിസിസിഐ വിലക്ക് പുന:പരിശോധിക്കാന് തയ്യാറാകാത്ത സാഹചര്യത്തില് ഇക്കാര്യത്തില് വ്യക്തത തേടി താരം വീണ്ടും കോടതിയില് എത്തിയിരിക്കുകയാണ്. സ്ക്കോട്ടിഷ് പ്രീമിയര് ലീഗില് കളിക്കാന് ക്ഷണമുള്ള താരത്തിന് പക്ഷേ ബിസിസിഐ എന്ഒസി നല്കാന് തയ്യാറായിട്ടില്ല.
