തിരുവനന്തപുരം: അഹിന്ദുക്കള്ക്കും ക്ഷേത്രങ്ങളില് പ്രവേശനം നല്കണമെന്നും ഇക്കാര്യം നിഷേധിച്ചു കൊണ്ടുള്ള ദേവസ്വം ബോര്ഡ് ഉത്തരവ് പരിഷ്ക്കരിക്കണമെന്നും കോണ്ഗ്രസ് നേതാവും തിരുവിതാംകൂര് ദേവസ്വംബോര്ഡംഗവുമായ അജയ് തറയില് രംഗത്ത്. ക്ഷേത്രാരാധനയിലും വിഗ്രഹാരാധനയിലും വിശ്വസിക്കുന്ന ആര്ക്കും ക്ഷേത്രങ്ങളില് പ്രവേശിക്കാമെന്ന് ദേവസ്വം ഉത്തരവില് തിരുത്ത വരുത്തണമെന്നും പറഞ്ഞു.
തന്റെ ഫേസ്ബുക്ക് പോസ്റ്റിലാണ് അജയ് തറയില് ഇക്കാര്യം വ്യക്തമാക്കിയിട്ടുള്ളത്. ഹിന്ദുക്കള്ക്കും ഹിന്ദുമത വിശ്വാസിയെന്ന് എഴുതി നല്കുന്നവര്ക്കും മാത്രമാണ് ഇപ്പോള് ക്ഷേത്രങ്ങളില് പ്രവേശനം നല്കുന്നത്. എന്നാല് ക്ഷേത്ര ആരാധനയിലും വിഗ്രഹ ആരാധനയിലും വിശ്വസിക്കുന്ന ധാരാളം അഹിന്ദുക്കള് അറിഞ്ഞും അറിയാതെയും ക്ഷേത്രത്തില് കയറി ആരാധന നടത്തുന്നത് ഒരു പതിവാണ്. ദേവസ്വം ബോര്ഡിന്റെ തീരുമാനങ്ങള്ക്ക് വിലയില്ലാതെ പോകുന്നത് ഇത്തരം ഘട്ടത്തിലാണെന്നും പറയുന്നുണ്ട്.
അതുകൊണ്ട് ഹിന്ദുക്കള്ക്കും ഹിന്ദുമതത്തില് വിശ്വസിക്കുന്നവരെന്ന സാക്ഷ്യപത്രം നല്കിയവര്ക്കും മാത്രം പ്രവേശിക്കുവാന് പാടുള്ളൂ എന്ന 1952 ലെ നിര്ദേശം ദേവസ്വം ബോര്ഡ് ഉത്തരവ് പരിഷ്ക്കരിക്കാന് സമയമായെന്നും പറയുന്നു. ഹിന്ദുമതത്തില് വിശ്വസിക്കുന്നുവെന്ന പ്രതിജ്ഞാപത്രം ഒരു വ്യക്തി നല്കുന്നത് പരോക്ഷമായ മതപരിവര്ത്തനമാണെന്നും അത്തരം പ്രവര്ത്തനങ്ങള് പ്രോത്സാഹിപ്പിക്കുന്നത് ബോര്ഡിന്റെ ചുമതലയല്ലെന്നും പറയുന്നുണ്ട്.
