അഹമ്മദാബാദ്: പരിസ്ഥിതിവാദികളുടെ എതിര്പ്പ് മൂലം ധനസഹായ വാഗ്ദാനത്തില് നിന്നു ലോകബാങ്ക് പിന്നോട്ടു പോയപ്പോള് ഗുജറാത്തിലെ ക്ഷേത്രങ്ങള് സംഭാവനയായി നല്കിയ പണമാണ് സര്ദാര് സരോവര് അണക്കെട്ടിന് അടിത്തറയായതെന്നു പ്രധാനമന്ത്രി നരേന്ദ്ര മോഡി. ഏറെ വെല്ലുവിളികള് അതിജീവിച്ചാണ് അണക്കെട്ട് നിര്മാണം പൂര്ത്തിയാക്കിയത്. പദ്ധതി ഇല്ലാതാക്കാന് വന് ഗൂഢാലോചന നടന്നു. തെറ്റായ ആരോപണങ്ങള് പ്രചരിപ്പിക്കപ്പെട്ടു.
പദ്ധതി തടസപ്പെടുത്താന് ശ്രമിച്ചവരുടെ പട്ടിക നിരത്താന് കഴിയുമെങ്കിലും രാഷ്ട്രീയവല്ക്കരിക്കാന് താല്പര്യമില്ലാത്തതിനാല് അതിനു തുനിയുന്നില്ല- അണക്കെട്ടിലെ ജലനിരപ്പ് പരമാവധി സംഭരണശേഷിയിലേക്ക് ഉയര്ത്തുന്ന പ്രഖ്യാപനം നിര്വഹിച്ച് പ്രധാനമന്ത്രി പറഞ്ഞു. നാലു സംസ്ഥാനങ്ങള്ക്കു പ്രയോജനപ്പെടുന്ന ഈ എന്ജിനീയറിങ് വിസ്മയം ലോകബാങ്കിന്റെ സഹായം ഇല്ലാതെ സ്വന്തം നിലയ്ക്കു പൂര്ത്തിയാക്കാന് നമുക്കു കഴിഞ്ഞു. ഭൂകമ്പം തകര്ത്തെറിഞ്ഞ കച്ചിലെ ജനങ്ങളെ പരിസ്ഥിതിസൗഹൃദമായി പുനരധിവസിപ്പിച്ച ഗുജറാത്തിന് ഹരിതപുരസ്കാരം സമ്മാനിക്കാന് അതേ ലോകബാങ്ക് പിന്നീടു നിര്ബന്ധിതരായെന്നും മോഡി പറഞ്ഞു.
മോഡിയുടെ 67-ാം ജന്മദിനവും ദേവശില്പ്പിയെന്നു വിശ്വസിക്കപ്പെടുന്ന വിശ്വകര്മാവിന്റെ ജയന്തിദിനവും ഒത്തുവന്ന ദിവസമാണ് ഗുജറാത്തിലെ സര്ദാര് സരോവര് അണക്കെട്ട് രാജ്യത്തിനു സമര്പ്പിച്ചത്. പാര്ട്ടിയെ രാജ്യത്തിനു മുകളില് പ്രതിഷ്ഠിച്ചവരുടെ ഭരണകാലത്ത് മെല്ലെപ്പോകുകയും രാജ്യത്തെ പാര്ട്ടിയേക്കാള് വലുതായി കണക്കാക്കിയവര് ഭരിച്ചപ്പോള് കുതിക്കുകയും ചെയ്തതാണു സര്ദാര് സരോവര് പദ്ധതിയെന്ന പരാമര്ശത്തിലൂടെ മോഡി ഈ വര്ഷമൊടുവില് നടക്കാനിരിക്കുന്ന ഗുജറാത്ത് നിയമസഭാ തെരഞ്ഞെടുപ്പിനു ബി.ജെ.പിയുടെ ശംഖു മുഴക്കുകയും ചെയ്തു. സ്വാതന്ത്ര്യാനന്തരം സര്ദാര് പട്ടേലിന് പല കാരണങ്ങളാലും അര്ഹിച്ച പ്രാധാന്യം കിട്ടിയില്ല. എന്നാല് ഇന്ത്യയുടെ ഉരുക്കുമനുഷ്യന്റെ പേരും പ്രചോദനവും ഉയര്ത്തിപ്പിടിക്കാന് തന്റെ സര്ക്കാര് തയാറായി.
''ഞാന് ചെറുതായി ചിന്തിക്കുകയോ ചെറിയ പദ്ധതികള് ഏറ്റെടുക്കുകയോ ചെയ്യില്ലെന്ന് അറിയാമല്ലോ. അതാണ് സര്ദാര് പട്ടേലിന്റെ പടുകൂറ്റന് പ്രതിമ സ്ഥാപിക്കാന് തിരുമാനിച്ചത്. ഐക്യത്തിന്റെ പ്രതിമ പൂര്ത്തിയാകുമ്പോള് അതിന് അമേരിക്കയുടെ സ്വാതന്ത്ര്യത്തിന്റെ പ്രതിമയുടെ ഇരട്ടി ഉയരമുണ്ടാകും''- അഹമ്മദാബാദില് ജപ്പാന് പ്രധാനമന്ത്രി ഷിന്സോ ആബെയുമൊത്ത് ബുള്ളറ്റ് ട്രെയിന് പദ്ധതിക്കു തുടക്കമിട്ടതിന്റെ രണ്ടാം ദിനത്തില് മോഡി പറഞ്ഞു. സംവരണവിഷയത്തില് ബി.ജെ.പിയോട് ഇടഞ്ഞുനില്ക്കുന്ന പാട്ടിദാര് സമുദായത്തെയും അണക്കെട്ടിനു വേണ്ടി കുടിയൊഴിപ്പിക്കപ്പെട്ട പട്ടികവര്ഗ സമൂഹത്തെയും അനുനയിപ്പിക്കാന് ലക്ഷ്യമിടുന്ന പരാമര്ശങ്ങള്ക്ക് അദ്ദേഹം മറന്നതുമില്ല.
