തൃശ്ശൂര്: മഞ്ഞ ബാഗും, കറുത്ത ഹെല്മറ്റും ധരിച്ച് ബൈക്കിലെത്തി ഒരാള് മാല പൊട്ടിക്കാന് ശ്രമം നടത്തുന്നതായി പരാതികള് ഉയര്ന്നു. പോലീസിനു ലഭിച്ച ഇരുപതോളം പരാതികളില് ഒന്നില് പോലും എന്നാല് മാല പൊട്ടിച്ചിട്ടില്ല.
അവസാനം പോലീസിനെയും, സ്ത്രീകളേയും ഒരു പോലെ പറ്റിച്ച് രക്ഷപ്പെട്ടിരുന്ന സാമൂഹിക വിരുദ്ധനെ ഈസ്റ്റ് പോലീസ് പിടികൂടി. മാല പൊട്ടിക്കാനെന്ന വ്യാജേന ബൈക്കിലെത്തി സ്ത്രീകളെ കടന്നുപിടിക്കുന്നത് പതിവാക്കിയ വടക്കാഞ്ചേരി സ്വദേശി സനില് ആണ് പിടിയിലായത്. അന്വേഷണത്തിനൊടുവിലാണ് പ്രതി ഞരമ്പുരോഗി ആണെന്ന് പോലീസ് കണ്ടെത്തിയത്.
വിമല കോളേജ് പരിസരത്ത് ഒരാള് മാല പൊട്ടിക്കാന് ശ്രമിച്ചതായി യുവതിയുടെ പരാതിയുടെ അടിസ്ഥാനത്തില് പ്രദേശത്തെ സിസിടിവി ദൃശ്യങ്ങളില് നിന്നാണ് ഞരമ്പുരോഗിക്ക് കുരുക്ക് വീണത്. മറ്റു പരാതികളും അന്വേഷണ വിധേയമാക്കിയപ്പോള് ഒരു കേസിലും മാല പൊട്ടിച്ചിട്ടില്ലെന്ന് കണ്ടെത്തിയതോടെ പ്രതിയുടെ ഉദേശ്ശ്യം മാല അല്ലെന്ന് വ്യക്തമാകുകയായിരുന്നു. മഞ്ഞ ബാഗ് കഴുത്തിലിട്ട്, കറുത്ത ഹെല്മറ്റ് വെച്ചായിരുന്നു ബൈക്കില് യുവാവ് തൊഴിലിന് ഇറങ്ങിയിരുന്നത്. എല്ലാ ദൃശ്യങ്ങളിലും ഒരുപോലെ ആയിരുന്നതും തെളിവായി. ഒട്ടേറെ യുവതികളെ ഇപ്രകാരം ഉപദ്രവിച്ചിട്ടുണ്ടെന്ന് പ്രതി പോലീസിനോട് വെളിപ്പെടുത്തിയിട്ടുണ്ട്.
