ചെന്നൈ: കൊച്ചുമകളെ മകന്റെ ആക്രമണത്തില് നിന്നും രക്ഷിക്കാന് 42 കാരന് മകനെ അരിവാളിന് വെട്ടിക്കൊന്ന 65 കാരി മാതാവിന് നിയമസഹായം ചെയ്തുകൊടുക്കാന് പോലീസ്. കഴിഞ്ഞയാഴ്ച തമിഴ്നാട്ടിലെ ശിവഗംഗ ജില്ലയിലെ സക്കവയല് ഗ്രാമത്തില് നടന്ന സംഭവത്തില് 19 കാരിയായ കൊച്ചുമകളെ ബലാത്സംഗം ചെയ്യാന് ശ്രമിച്ച മകനെ ലക്ഷ്മി എന്ന സ്ത്രീയാണ് വെട്ടിയെറിഞ്ഞത്. ഇവര് പിന്നീട് പോലീസിന് കീഴടങ്ങി.
മദ്യത്തിന് അടിമയായ പിതാവ് കഴിഞ്ഞ ദിവസം മകളെ പീഡിപ്പിക്കാന് ഒരുങ്ങുമ്പോള് ഇടയ്ക്കുകയറി മകനെ തടഞ്ഞിരുന്നു. എന്നാല് മാതാവിനെ തള്ളിത്താഴെയിട്ട് ഇയാള് മകള്ക്ക് നേരെ വീണ്ടും അടുക്കുമ്പോള് ഗത്യന്തരമില്ലാതെ ലക്ഷ്മി കയ്യില് കിട്ടിയ അരിവാളിന് വെട്ടിത്തള്ളുകയായിരുന്നു. മകന് രക്തത്തില് കിടന്ന് പുളയുമ്പോള് കൊച്ചുമകള് കവിതയെ ചേര്ത്തുപിടിച്ച് അവര് വിതുമ്പിക്കരഞ്ഞു. തന്നെ സംരക്ഷിക്കാന് ഇതല്ലാതെ മുത്തശ്ശിക്ക് വേറെ മാര്ഗ്ഗമില്ലായിരുന്നെന്ന് കൊച്ചുമകള് പറഞ്ഞു. അമ്മയില്ലാത്ത പെണ്കുട്ടിക്ക് ആശ്രയം മുത്തശ്ശിയായിരുന്നു.
കൊലപാതകത്തിന് ശേഷം കീഴടങ്ങിയ ലക്ഷ്മിയെ പോലീസ് കസ്റ്റഡിയില് എടുത്തു. മനപ്പൂര്വ്വമല്ലാത്ത നരഹത്യയ്ക്കാണ് കേസെടുത്തിരിക്കുന്നത്. വൃദ്ധയായ ഈ സ്ത്രീയോട് പോലീസ് സഹതാപത്തോടെയാണ് പെരുമാറുന്നത്. ജാമ്യത്തിനായി ഇവര് അപേക്ഷിച്ചാല് എതിര് നില്ക്കില്ലെന്നും പോലീസ് പറഞ്ഞു. കുറ്റകൃത്യത്തിന്റെ സാഹചര്യവും സ്വഭാവവും പരിഗണിച്ച് ഇവരെ സഹായിക്കാന് ആവശ്യമായ രീതിയില് അഭിഭാഷകരെ ഏര്പ്പെടുത്താന് സഹായിക്കണമെന്ന് അന്വേഷണ ഉദ്യോഗസ്ഥര്ക്ക് ഉന്നത പോലീസ് ഉദ്യോഗസ്ഥര് നിര്ദേശവും നല്കിയിട്ടുണ്ട്.
