മലപ്പുറം : സംസ്ഥാന ഭാഗ്യക്കുറിയുടെ ഓണം ബമ്പര് ഒന്നാം സമ്മാനമായ 10 കോടി രൂപ മലപ്പുറത്തു വിറ്റ ടിക്കറ്റിന്. തിരൂര് ഏജന്സിയില്നിന്നു വാങ്ങി പരപ്പനങ്ങാടിയിലെ ഐശ്വര്യ സബ് ഏജന്സിയില്നിന്നു ഖാലിദ് വിറ്റ ടിക്കറ്റിനാണ് ഒന്നാം സമ്മാനം ലഭിച്ചത്. അതേസമയം, ടിക്കറ്റ് ഉടമയെ ഇന്നലെ രാത്രി ഏറെ വൈകിയും കണ്ടെത്താനായില്ല. പരപ്പനങ്ങാടി ബസ് സ്റ്റാന്ഡില് ലോട്ടറി വില്പ്പന നടത്തുന്ന പാലത്തിങ്ങല് കൊട്ടന്തല സ്വദേശി പൂച്ചേങ്ങല്കുന്നത്ത് ഖാലിദ് താന് വിറ്റ ടിക്കറ്റ് തന്നെയാണ് ഇതെന്നു സ്ഥിരീകരിച്ചിട്ടുണ്ട്.
ബമ്പര് നേടിയ ടിക്കറ്റിന്റെ ഉടമയെന്ന പേരില് നിരവധിയാളുകളുടെ ഫോട്ടോയാണ് ഇന്നലെ വൈകിട്ടു മുതല് സമൂഹമാധ്യമങ്ങളിലൂടെ പ്രചരിക്കുന്നത്. ബംഗാളിയുവാവിനാണ് ഒന്നാംസമ്മാനം ലഭിച്ചതെന്നും ഇയാള് പോലീസ് സംരക്ഷണം ആവശ്യപ്പെട്ടെന്നും രാത്രിയില് സന്ദേശം പ്രചരിച്ചു. ഒന്നാം സ്ഥാനം നേടിയത് എം.എസ്.പിയിലെ പോലീസുകാരനാണെന്നും ഒഴൂരിലെ ഒരാളാണെന്നും അതല്ല വൈലത്തൂര്കാരനാണെന്നും അങ്ങാടിപ്പുറം ഏറാന്തോടുകാരനാണെന്നും സമൂഹമാധ്യമങ്ങളില് പ്രചരിക്കുന്നുണ്ട്.
ഇവരുടെയെല്ലാം ഫോട്ടോസഹിതമാണു പ്രചാരണം. ഓണം ബമ്പര് നേടിയത് ഒഴൂര് സ്വദേശിയായ കോങ്ങോടി സോമനാണെന്നായിരുന്നു സോഷ്യല് മീഡിയയിലെ ഒരു പ്രചാരണം. സുഹൃത്തുക്കളുടെ തമാശയാണ് സോമനെ അല്പ സമയത്തേക്കു കോടിപതിയാക്കിയത്. തനിക്ക് സമ്മാനം ലഭിച്ചുവെന്ന പ്രചാരണം വ്യാജമാണെന്നു സോമന് പറഞ്ഞു.
തന്റെ ഒരു സുഹൃത്തിന് 500 രൂപ സമ്മാനം ലഭിച്ചിട്ടുണ്ടെന്നും ഇതേത്തുടര്ന്ന് സുഹൃത്തുക്കളിലൊരാള് തന്റെ ഫോട്ടോ സോഷ്യല് മീഡിയയില് പ്രചരിപ്പിക്കുകയായിരുന്നുവെന്നും അദ്ദേഹം പറഞ്ഞു. വാര്ത്ത പരന്നതോടെ സോമന്റെ ഫോണിലേക്ക് നിലയ്ക്കാതെ വിളി വന്നു. ഫോണ് ഓഫ് ചെയ്താണ് അദ്ദേഹം ''രക്ഷപ്പെട്ടത്''. ലോട്ടറി ഉടമയെ കണ്ടെത്താനായില്ലെങ്കിലും ടിക്കറ്റ് വിറ്റതിനുള്ള 10ശതമാനം കമ്മീഷന് ലഭിക്കുമെന്ന ആഹ്ളാദത്തിലാണ് പാലത്തിങ്ങല് കൊട്ടന്തല സ്വദേശി പൂച്ചേങ്ങല്കുന്നത്ത് ഖാലിദ്.
എ.ജെ. 442876 നമ്പര് ടിക്കറ്റിനാണ് ഒന്നാം സമ്മാനം. തലസ്ഥാനത്ത് ശ്രീചിത്രാ ഹോം ഓഡിറ്റോറിയത്തില് നറുക്കെടുപ്പ് മന്ത്രി കടകംപള്ളി സുരേന്ദ്രന് ഉദ്ഘാടനം ചെയ്തു. ചടങ്ങില് അധ്യക്ഷനായ മേയര് വി.കെ. പ്രശാന്ത് പൂജാ ബമ്പറിന്റെ പ്രകാശനവും നിര്വഹിച്ചു. കേരള സംസ്ഥാന ഭാഗ്യക്കുറി വകുപ്പ് ഡയറക്ടര് എസ്. വെങ്കിടേസപതി, ജോയിന്റ് ഡയറക്ടര് സുരേഷ്കുമാരി തുടങ്ങിയവരും സംബന്ധിച്ചു. ഇതാദ്യമാണ് ഓണം ബംബറിനു പത്തു കോടി സമ്മാനത്തുക. 65 ലക്ഷം ടിക്കറ്റുകളാണ് അച്ചടിച്ചത്. ഇവ മുഴുവന് വിറ്റുപോയെന്ന പ്രത്യേകതയും ഇക്കുറിയുണ്ട്. 45 കോടി രൂപയുടെ വരുമാനമാണ് ഓണം ബമ്പറിലൂടെ മാത്രം സര്ക്കാരിനുണ്ടായത്.
