കോട്ടയം : കുമരകത്ത് നിന്നും മദ്യലഹരിയില് കാറുമായി പോലീസിനെ വെട്ടിച്ചു ചീറിപ്പായുകയും റോഡില് പരിഭ്രാന്തിയുണ്ടാക്കുകയും ചെയ്ത യുവതീ യുവാക്കള് ഒടുവില് കോട്ടയത്ത് ട്രാഫിക് ബ്ളോക്കില് പെട്ട് പോലീസ് പിടിയിലായി. അടൂര് സ്വദേശിയായ യുവാവും യുവതിയുമാണ് ചീറിപ്പാഞ്ഞത്. വാഹനം ഓടിച്ച യുവാവിനെതിരേ കേസെടുത്ത പോലീസ് യുവതിയെ ബന്ധുക്കളെ വിളിച്ചു വരുത്തി പറഞ്ഞയച്ചു.
കുമരകത്ത് നിന്നും കോട്ടയത്തേക്കാണ് ഇവര് കാര് പറപ്പിച്ചത്. ഏകദേശം 14 കിലോമീറ്ററിലേറെ ദൂരം അമിത വേഗത്തില് താണ്ടിയ ഇരുവരെയും ഏഴിടത്തില് പോലീസ് പിടികൂടാന് ശ്രമിച്ചെങ്കിലും നടന്നില്ല. ഏറ്റവും അവസാനം ചാലുകുന്നിലെ ബ്ളോക്കില് പെട്ടതോടെയാണ് ഇരുവരെയും പോലീസ് പൊക്കിയത്. രാവിലെ കുമരകത്ത് എത്തിയ ഇരുവരും ഹോട്ടലില് താമസിച്ച ശേഷം വൈകിട്ട് നാലിനു വീട്ടിലേക്ക് മടങ്ങുമ്പോഴായിരുന്നു സംഭവം.
മദ്യപിക്കാനാണ് ഇവര് ഇവിടെ എത്തിയതെന്നും വഴിയരികില് കാറില് ഇരുന്ന മദ്യപിക്കുന്നത് കണ്ടതായും വിവരമുണ്ട്. കാറിലിരുന്ന് മദ്യപിക്കുന്നത് കണ്ട് നാട്ടുകാര് അടുത്തു കൂടുകയുണ്ടായി. കുമരകത്തിനും കോട്ടയത്തിനും ഇടയില് ഇല്ലിക്കലില് വെച്ച് പോലീസ് കൈ കാണിച്ചെങ്കിലും നിര്ത്താതെ പോകുകയായിരുന്നു. തുടര്ന്ന് വിവരം നഗരത്തിലെ ട്രാഫിക് പോലീസിനും വെസ്റ്റ് പോലീസിനും കൈമാറി.
ഒടുവില് ചാലുകുന്നില് വാഹനം ഗതാഗതക്കുരുക്കില് പെട്ടപ്പോള് പിന്നാലെയെത്തിയ പോലീസ് പിടികൂടുകയായിരുന്നു. മദ്യപിച്ച് കാറോടിച്ചതിനാണ് യുവാവിനെതിരേ കേസെടുത്തിട്ടുള്ളത്.
