കൊച്ചി : കലാലയ രാഷ്ട്രീയം നിരോധിച്ചുകൊണ്ടുള്ള ഉത്തരവില്‍ നിലപാട് ആവര്‍ത്തിച്ച് ഹൈക്കോടതി. ക്യാമ്പസ്സുകളില്‍ രാഷ്ട്രീയം വേണ്ടെന്നും കഴിഞ്ഞ 15 വര്‍ഷത്തോളമായി കോടതികള്‍ ഇക്കാര്യം ആവര്‍ത്തിച്ചുകൊണ്ടിരിക്കുകയാണെന്നും ഹൈക്കോടതി പറഞ്ഞു. രാഷ്ട്രീയ പ്രവര്‍ത്തനം നടത്തേണ്ടത് ക്യാമ്പസുകളില്‍ അല്ല, മറൈന്‍ ഡ്രൈവ് പോലുള്ള വേദികളിലാണെന്നും കോടതി നിരീക്ഷിച്ചു.
ക്യാമ്പസുകളില്‍ രാഷ്ട്രീയവും സമരവും നിരോധിച്ചുകൊണ്ട് കഴിഞ്ഞയാഴ്ചയാണ് ഹൈക്കോടതി വിധി ഉണ്ടായത്. ഇതിന് പിന്നാലെയാണ് കോടതി നിലപാട് ആവര്‍ത്തിച്ചത്. പൊന്നാണി എംഇഎസ് കോളജിന്റെ ഹര്‍ജി പരിഗണിച്ചുകൊണ്ടായിരുന്നു ഹൈക്കോടതിയുടെ കഴിഞ്ഞ ആഴ്ചയിലെ ഉത്തരത്. ഈ ഹര്‍ജി വീണ്ടും വെള്ളിയാഴ്ച പരിഗണിക്കും.
വിദ്യാഭ്യാസ സ്ഥാപനങ്ങളില്‍ സമരവും സത്യാഗ്രഹവും പാടില്ലെന്നായിരുന്നു ഹൈക്കോടതി ഉത്തരവ്. വിദ്യാലയങ്ങളില്‍ സമരം നടത്തുന്നത് അനുവദിക്കാനാകില്ലെന്നും അത്തരത്തിലുള്ള പ്രവര്‍ത്തനങ്ങളില്‍ ഏര്‍പ്പെടുന്നവരെ പുറത്താക്കാമെന്നും ഹൈക്കോടതി വ്യക്തമാക്കിയിരുന്നു.
വിദ്യാര്‍ത്ഥികള്‍ പഠിക്കാനാണ് വിദ്യാഭ്യാസ സ്ഥാപനങ്ങളില്‍ വരുന്നത്. അല്ലാതെ രാഷ്ട്രീയ പ്രവര്‍ത്തനത്തിനല്ല. രണ്ടും കൂടി ഒന്നിച്ചുപോകില്ല. രാഷ്ട്രീയ പ്രവര്‍ത്തനം നടത്തണമെങ്കില്‍ പഠനം നിര്‍ത്തി പോകണമെന്നും കോടതി പറഞ്ഞു.
Comments