ന്യൂഡല്ഹി: കനത്ത മൂടല് മഞ്ഞ് ഡ്രൈവര്മാരുടെ കാഴ്ച മറച്ചപ്പോള് ഡല്ഹിയില് എക്സ്പ്രസ്വേയില് കൂട്ടിയിടിച്ചത് 18 കാറുകള്. ബുധനാഴ്ച ഡല്ഹി യമുനാ എക്സ്പ്രസ് വേയിലായിരുന്നു കൂട്ടയിടി. കനത്ത മഞ്ഞിനെ തുടര്ന്ന് മഞ്ഞ് ലൈറ്റിട്ടുകൊണ്ട് അതിവേഗത്തില് ഓടിയെത്തിയ കാറുകളായിരുന്നു ഇവ. കനത്ത മഞ്ഞിനെ തുടര്ന്ന വേഗത കുറയ്ക്കാന് ഫുട്പാത്തില് നിന്നുകൊണ്ട് അനേകരാണ് പതിയെപോകാന് ആവശ്യപ്പെട്ടത്.
ഇത് അവഗണിച്ച കാറുകളാണ് ഇടിയില് പെട്ടത്. അതേസമയം വലിയ അത്യാഹിതം റിപ്പോര്ട്ട് ചെയ്യപ്പെട്ടിട്ടില്ല. സംഭവത്തിന്റെ പുറത്തു വന്നിരിക്കുന്ന വീഡിയോ ഞെട്ടിക്കുന്നതാണ്. ആദ്യ ഇടി നടന്നതിന് പിന്നാലെ അനേകം കാറുകള് അതിവേഗം പാഞ്ഞു വരുമ്പോള് ഇടിച്ച കാറില് നിന്നും ഇറങ്ങി ഓടിമാറാന് ഡ്രൈവര്മാരോടും യാത്രക്കാരോടും വഴിയാത്രക്കാര് വിളിച്ചു പറഞ്ഞതാണ് വലിയ ദുരന്തം വഴിമാറ്റി വിട്ടത്. പരസ്പരം രണ്ടു കാറുകള് ഇടിച്ചതോടെയാണ് കൂട്ടയിടി തുടങ്ങിയത്. അതിവേഗത്തില് വന്ന കാറുകള് ഇവയിലേക്ക് പിന്നാലെ പിന്നാലെ ഇടിച്ചു കയറുകയായിരുന്നു. പിന്നാലെ വരുന്ന കാറുകളോട് ആള്ക്കാര് ഉച്ചത്തില് നിര്ത്താന് ആവശ്യപ്പെടുകയും ചെയ്തിരുന്നു.
മഞ്ഞുകാലം എത്തിയതോടെ കനത്തമൂടല് മഞ്ഞിലാണ് ഡല്ഹി പ്രഭാതമുണരുന്നത് തന്നെ. മഞ്ഞ് കടുത്തിരിക്കുന്ന സാഹചര്യത്തില് പ്രൈമറി സ്കൂളുകള് അടച്ചിട്ടിരിക്കുകയാണ്. തൊട്ടടുത്തു നില്ക്കുന്നവരെ പോലും കാണാനാകാത്ത സാഹചര്യത്തില് കോളേജിലേക്കും ഓഫീസിലേക്കും പോകുന്നവര് ദിനംപ്രതി അനേകം പ്രതിസന്ധികളാണ് നേരിടുന്നത്. രാവിലത്തെ അസാധാരണ സാഹചര്യത്തില് പലരും കാറുകള് ഉപേക്ഷിച്ച് മെട്രോയിലേക്ക് യാത്ര മാറ്റിയിട്ടുണ്ട്. രാവിലെ ഏഴു മണിക്ക് പോലും ഡ്രൈവര്മാര് ലൈറ്റിട്ടാണ് വാഹനം ഓടിക്കുന്നത്.
വീഡിയോയ്ക്ക് കടപ്പാട്: ഇന്ത്യാടുഡേ
