ന്യൂയോര്ക്ക്: ഐക്യരാഷ്ര്ട സഭയ്ക്കെതിരെ കടുത്ത വിമര്ശനവുമായി യു.എന്നിലെ യുഎസ് സ്ഥാനപതിയും ഇന്ത്യന് വംശജയുമായ നിക്കി ഹേലി. ഇസ്രയേല്-പാലസ്തീന് സമാധാന നീക്കം യു.എന് മുറിപ്പെടുത്തുന്നതായും നിക്കി ഹേലി ആഞ്ഞടിച്ചു.
ഇസ്രയേലിനോട് യുഎന്നിന് വൈരം കലര്ന്ന സമീപനമാണ്. യുഎന് നയം പശ്ചിമേഷ്യന് സമാധാന നീക്കങ്ങള്ക്ക് തിരിച്ചടിയാകുമെന്നും അടിയന്തര രക്ഷാസമിതി യോഗത്തില് നിക്കി ഹേലി പറഞ്ഞു.ജറുസലമിനെ ഇസ്രയേലിന്റെ തലസ്ഥാനമായി അംഗീകരിച്ച യുഎസ് പ്രസിഡന്റ് ഡോണള്ഡ് ട്രംപിന്റെ നടപടിക്കെതിരെ ഐക്യരാഷ്ര്ടസഭാ രക്ഷാസമിതി യോഗത്തിലും വിമര്ശനം ഉയര്ന്നു. ട്രംപിന്റെ തലസ്ഥാന പ്രഖ്യാപനത്തിനു പിന്നാലെയാണ് അടിയന്തിര രക്ഷാസമിതി യോഗം കൂടിയത്.
മേഖലയിലെ സമാധാനം തകര്ന്നുവെന്ന് പലസ്തീന് ഉള്പ്പെടെയുള്ള രാജ്യങ്ങള് കുറ്റപ്പെടുത്തി. എന്നാല് യാഥാര്ഥ്യം കണക്കിലെടുത്താണ് നടപടിയെന്നാണ് യോഗത്തില് യുഎസിന്റെ വിശദീകരണം. അതേസമയം, യുഎസിന്റെ തീരുമാനത്തിനെതിരെ പലസ്തീനില് പ്രതിഷേധങ്ങള് തുടരുകയാണ്. ഗാസയില് പ്രതിഷേധക്കാര്ക്ക് നേരെ ഇസ്രയേല് സൈന്യം നടത്തിയ ആക്രമണത്തില് രണ്ടു പേര് മരിച്ചു.
