മുംബൈ: കേരള ബ്ളാസ്റ്റേഴ്സിന്റെ മുന് പരിശീലകന് കോപ്പലാശാനുമായുള്ള കട്ട ഉടക്കിനെ തുടര്ന്ന് ദക്ഷിണാഫ്രിക്കന് യുവതാരം സമീഹ് ദൗത്തിയെ ജംഷഡ്പൂര് എഫ് സി വില്ക്കാനൊരുങ്ങുന്നു. ഐഎസ്എല് ജനുവരിയിലെ ട്രാന്സ്ഫര് വിന്ഡോയില് താരത്തെ വില്പ്പനയ്ക്ക് വെയ്ക്കാനാണ് തീരുമാനം. അതേസമയം യുവതാരത്തെ കൊത്താന് കേരളബ്ളാസ്റ്റേഴ്സ് കാത്തിരിക്കുകയാണെന്നാണ് വിവരം.
കഴിഞ്ഞ രണ്ടു സീസണുകളില് കൊല്ക്കത്തയ്ക്ക് വേണ്ടി തകര്പ്പന് പ്രകടനം നടത്തിയ താരത്തെ ഈ സീസണില് ടീം വേണ്ടെന്ന് വെച്ചിരുന്നു. തുടര്ന്ന് പുതിയതായി ലീഗില് എത്തിയ ജംഷഡ്പൂര് എഫ് സിയുടെ പരിശീലകന് സ്റ്റീവ് കോപ്പല് സ്വന്തം നിരയിലേക്ക് പരിഗണിക്കുകയായിരുന്നു. എന്നാല് കഴിഞ്ഞയാഴ്ച താരം ടീമിനെ ഒന്നടങ്കം വലച്ചിരുന്നു. ഡിസംബര് 6 ന് ഡല്ഹി ഡൈനാമോസിനെതിരേ 1-0 ന് വിജയം നേടിയ മത്സരത്തിന് പിന്നാലെ താരം ആരോടും പറയാതെ ഒറ്റ മുങ്ങല് നടത്തി. ടീം താമസിക്കുന്ന ഹോട്ടലില് നിന്നും ഇറങ്ങിയ താരം ആരും അറിയാതെ മറ്റൊരു ഹോട്ടലില് പോയി കിടന്നു. രാത്രി മുഴുവന് കോച്ചും കളിക്കാരും ടീം സ്റ്റാഫുകളും താരത്തെ തപ്പിനടക്കുകയും രാവിലെ കണ്ടെത്തുകയുമായിരുന്നു. എന്നാല് ടീം ഹോട്ടലിലേക്ക് തിരിച്ചുവരാന് താരമൊട്ട് തയ്യാറായുമില്ല.
ഇത് കോച്ചിനെയും സപ്പോര്ട്ടിംഗ് സ്റ്റാഫിനെയും ചില്ലറയല്ല വിഷമിപ്പിച്ചത്. താരത്തിന്റെ അച്ചടക്കം ഇല്ലായ്മ ചൊടിപ്പിച്ച കോപ്പലാശാന് താരത്തെ ജനുവരിയില് വില്പ്പനയ്ക്ക് വെയ്ക്കാന് തീരുമാനിക്കുകയായിരുന്നു. നേരത്തേ ഡൈനാമോസിന് എതിരേയുള്ള മത്സരത്തില താരത്തെ ഭൂരിഭാഗവും ബഞ്ചില് ഇരുത്താനാണ് കോപ്പല് തുനിഞ്ഞത്. കളത്തിലേക്ക് അയച്ചതാകട്ടെ പകരക്കാരന്റെ വേഷത്തില് 90 ാം മിനിറ്റിലും. ഇത് താരത്തെ വല്ലാതെ ചൊടിപ്പിച്ചിരുന്നു. ഇക്കാര്യം ഏതാനും സഹകളിക്കാരോട് പരാതിപ്പെട്ട ശേഷമാണ് ദൗത്തി രായ്ക്ക് രാമാനം കടന്നുകളഞ്ഞത്.
രണ്ടുമണിക്കൂര് കൂടി താരത്തെ കാണാതെ വന്നിരുന്നെങ്കില് ദക്ഷിണാഫ്രിക്കന് എംബസിയെ അധികൃതര് സമീപിച്ചേനെ. ദൗത്തിയെ കൊണ്ടുവന്ന അതേ ഏജന്റാണ് കോപ്പലിനെയും കൊണ്ടുവന്നതെന്ന് മാത്രമായിരുന്നു ഇക്കാര്യത്തില് കിട്ടിയ ഏക പരിഗണന. എന്നാല് ടീമിലെ ഈ കുഴപ്പങ്ങള് പുറത്തറിയിക്കാതെ വളരെ രഹസ്യമായി കൈകാര്യം ചെയ്യാന് തീരുമാനിച്ച ടീം ഉടമകളായ ടാറ്റ ട്രാന്സ്ഫര് സീസണായ ജനുവരി വരെ കാത്തിരിക്കാന് തീരുമാനിക്കുകയായിരുന്നു. ജംഷഡ്പൂരിന്റെ അടുത്ത കളി ഡിസംബര് 21 ന് ബംഗലുരു എഫ്സിയുമായിട്ടാണ്.
അതേസമയം താരത്തിനായി രണ്ടു തവണ റണ്ണറപ്പുകളായ കേരളബ്ളാസ്റ്റേഴ്സ് രംഗത്തുണ്ടെന്നാണ് കേള്ക്കുന്നത്. എന്നാല് ഇക്കാര്യത്തില് ഇതുവരെ ബന്ധപ്പെട്ടിട്ടില്ല. ആദ്യ മൂന്ന് മത്സരങ്ങള് സമനിലയില് കുടുങ്ങുകയും ഗോവയോട് തോല്ക്കുകയും ചെയ്ത ബ്ളാസ്റ്റേഴ്സ് കഴിഞ്ഞ മത്സരത്തില് ഒരു ഗോളിന് നോര്ത്ത്ഈസ്റ്റിനെ തോല്പ്പിച്ചിരുന്നു. ബ്ളാസ്റ്റേഴ്സ് അവസാനം ഫൈനല് കളിച്ച കഴിഞ്ഞ സീസണില് ടീമിനെ ഏറെ ബുദ്ധിമുട്ടിച്ച താരങ്ങളില് ഒരാളായിരുന്നു സമീഹ് ദൗത്തി.
