തിരുവനന്തപുരം: മതസ്പര്ദ്ധ വളര്ത്തുന്ന പരാമര്ശം നടത്തിയെന്ന പാതിയില് മുന് ഡി.ജി.പി ടി.പി സെന്കുമാറിനെതിരെ തെളിവില്ലെന്ന് ഫോറന്സിക് പരിശോധനാ ഫലം. ഒരു മാസികയ്ക്ക് നല്കിയ അഭിമുഖത്തില് സെന്കുമാര് ഒരു മതവിഭാഗത്തെ കുറിച്ച് നടത്തിയെന്ന് പറയപ്പെടുന്ന പരാമര്ശമാണ് കേസിനാസ്പദം. എന്നാല് ലേഖകന് സമര്പ്പിച്ച ശബ്ദരേഖയിലും മൊബൈല് ഫോണിലും മതസ്പര്ദ്ധയുള്ള പരാമര്ശം ഇല്ല. മൊബൈല് ഫോണിലും ലാപ്ടോപ്പിലും ഉണ്ടായിരുന്നത് കൃത്രിമ ശബ്ദരേഖയാണെന്നും ഫോറന്സിക് പരിശോധനാ ഫലത്തില് പറയുന്നു. ഇതോടെ സെന്കുമാറിനെതിരായ ഈ കേസ് തള്ളിപ്പോകുമെന്ന് ഉറപ്പായി.
സെന്കുമാര് മതസ്പര്ദ്ധ വളര്ത്തുന്ന പരാമര്ശം നടത്തിയെന്ന ആക്ഷേപത്തില് പോലീസ് കേസെടുത്ത് അന്വേഷണം നടത്താന് മുന് ചീഫ് സെക്രട്ടറി നളിനി നെറ്റോയാണ് ഉത്തരവിട്ടിരുന്നത്. കേസില് അറസ്റ്റ് ഭയന്ന് സെന്കുമാര് ഹൈക്കോടതിയില് നിന്ന് മുന്കൂര് ജാമ്യവും നേടിയിരുന്നു.
അതേസമയം, സെന്കുമാറിനെതിരെ തിരുവനന്തപുരം വിജിലന്സ് കോടതിയില് സമര്പ്പിച്ചിരുന്ന രണ്ടു കേസുകള് തള്ളി. അവധിയിലിരിക്കേ വ്യാജ ചികിത്സാരേഖയുണ്ടാക്കി പണം തട്ടിയെടുത്തു, അനധികൃത വായ്പ നല്കി എന്നീ ആരോപണങ്ങളാണ് കോടതി തള്ളിയത്. വ്യാജരേഖ ചമച്ചു എന്നതുള്പ്പെടെ ജാമ്യമില്ലാ വകുപ്പുകള് ചുമത്തി നാലു കേസുകളാണ് സെന്കുമാറിനെതിരെ രജിസ്റ്റര് ചെയ്തിരുന്നത്. കന്റോണ്മെന്റ് അസിസ്റ്റ് കമ്മീഷണര്ക്കായിരുന്നു അന്വേഷണ ചുമതല. എന്നാല് അന്വേഷണം ദുരുദേശപരമാണെന്ന സെന്കുമാറിന്റെ ഹര്ജി പരിഗണിച്ച് ഹൈക്കോടതി അന്വേഷണം റദ്ദാക്കുകയും ചെയ്തിരുന്നു.
