ലക്നൗ: കെട്ടിട നിര്മ്മാണം നടക്കുന്ന സൈറ്റില് നിന്നും ഒളിപ്പിച്ച നിലയില് പോലീസ് കണ്ടെത്തിയത് 100 കോടിയുടെ 500 ന്റെയും 1000 ന്റെയും നോട്ടുകെട്ടുകള്. ഉത്തര്പ്രദേശ് പോലീസ് ഇതുവരെ നടത്തിയ ഏറ്റവും വലിയ പണവേട്ടകളില് ഒന്നില് 2016 നവംബറില് നിരോധിക്കപ്പെട്ട നോട്ടുകളുടെ ശേഖരം കാണ്പൂരിലെ ഒരു നിര്മ്മാണം നടക്കുന്ന കെട്ടിടത്തില് നിന്നുമായിരുന്നു കണ്ടെത്തിയത്.
നോട്ടുകള് അടുക്കി കെട്ടി കിടക്ക പോലെ ഉപയോഗിച്ച് വരികയായിരുന്നു. അനധികൃത മാര്ഗ്ഗത്തിലൂടെ കള്ളപ്പണം വെളുപ്പിക്കാനുള്ള ശ്രമമാണ് നടന്നതെന്നാണ് പോലീസ് നടത്തുന്ന നിരീക്ഷണം. ഒരു പ്രമുഖ സോപ്പു നിര്മ്മാതാവ് ഉള്പ്പെടെ നാലുപേരുടേയോ അവരുടെ കമ്പനിയുടേതോ ആയിരിക്കാം പണമെന്നാണ് എന്ഐഎ പറയുന്നത്. സിസാമാവുവില് നിന്നുള്ള ഒരു കെട്ടിട നിര്മ്മാതാവാണ് പോലീസിനെ പണം സൂക്ഷിച്ചിരിക്കുന്ന സ്ഥലത്തേക്ക് നയിച്ചത്. കാണ്പൂരിലെ സ്വരൂപ് നഗറിലെ പണി നടക്കുന്ന ഒരു ബില്ഡിംഗില് അനധികൃതമായി പണം സൂക്ഷിച്ചിരിക്കുന്നതായി വിവരം കിട്ടുകയായിരുന്നെന്ന് പോലീസ് മേധാവി വ്യക്തമാക്കി.
500 ന്റെയും 1000 ന്റെയും നോട്ടുകള് നിരോധിച്ച ശേഷം നൂറുകണക്കിന് കോടികളാണ് ബാങ്കുകള് വഴി ഒഴുകിയത്. ഇതിനൊപ്പം തന്നെ അനധികൃതമായി മറ്റൊരു വന് തുകയും പോകുകയുണ്ടായി. ആര്ബിഐ കണക്കുകള് അനുസരിച്ച് 99 ശതമാനം നിരോധിത നോട്ടുകളും ബാങ്കില് എത്തിയിരുന്നു. അതേസമയം കഴിഞ്ഞ നവംബര് വരെ 36.34 കോടിയോളം നിരോധിത കറന്സികളാണ് എന്ഐഎ പിടിച്ചെടുത്തത്.
