പാലക്കാട്: മോഷണക്കുറ്റം ആരോപിച്ച് അട്ടപ്പാടിയില് മനോരോഗമുള്ള ആദിവാസി യുവാവിനെ ആള്ക്കൂട്ടം മര്ദ്ദിച്ചു കൊലപ്പെടുത്തിയ സംഭവത്തില് പ്രതിഷേധം ആളിക്കത്തുന്നു. വ്യാഴാഴ്ച വൈകിട്ടാണ് ദാരുണ സംഭവങ്ങള് അരങ്ങേറുന്നത്. കടുക്മണ്ണ ആദിവാസി ഊരിലെ മധു(35) ആണ് മരിച്ചത്. അടുത്തിടെ പ്രദേശത്ത് ഉണ്ടായ മോഷ്ണവുമായി ഇയാള്ക്ക് ബന്ധമുണ്ടെന്ന് ആരോപിച്ച് ആള്ക്കുട്ടം മര്ദ്ദിക്കുകയായിരുന്നു.
വനത്തോടു ചേര്ന്ന പ്രദേശത്തു നിന്ന് പിടികൂടി നാട്ടുകാര് പോലീസിന് കൈമാറുകയായിരുന്നു. ക്രൂരമായി മര്ദ്ദിച്ച ശേഷമാണ് നാട്ടുകാര് യുവാവിനെ പോലീസിന് കൈമാറിയതെന്ന് ആരോപണം ഉയരുന്നുണ്ട്. പോലീസിനു കൈമാറിയ ഇയാളെ കൊണ്ടുപോകും വഴിമധ്യേ യുവാവിന്റെ മരണം സംഭവിക്കുകയായിരുന്നു. മുക്കാലിക്കടുത്ത് വനാതിര്ത്തിയില് ചാക്കില് അരിയുമായി കണ്ട മധുവിനെ ചിലര് തടഞ്ഞു നിര്ത്തി ചോദ്യം ചെയ്തുവെന്നും, ശാരീരികമായി ഉപദ്രവിച്ച ശേഷമാണ് പോലീസിനു കൈമാറിയതെന്നും പോലീസ് പറയുന്നു.
യുവാവിനെ ആള്ക്കൂട്ടം മര്ദ്ദിക്കുന്നതും ചോദ്യം ചെയ്തതും നാട്ടുകാര് സെല്ഫി എടുത്തും, ദൃശ്യങ്ങള് പകര്ത്തിയും ആഘോഷിച്ച് സാമൂഹ്യമാധ്യമങ്ങളിലൂടെ പോസ്റ്റ് ചെയ്യുകയും ചെയ്തിരുന്നു. വനാതിര്ത്തിയില് പാറക്കെട്ടിനുള്ളില് കഴിഞ്ഞിരുന്ന മധുവിനെ ഉടുതുണികൊണ്ട് കൈകള് കെട്ടി ചോദ്യം ചെയ്താണ് പരസ്യ വിചാരണ നടത്തിയത്. സാമൂഹ്യമാധ്യമങ്ങളിലൂടെ സംഭവത്തില് വന് പ്രതിഷേധം ആളിക്കത്തുകയാണ്. അഗളിയിലെ ആശുപത്രിയില് സൂക്ഷിച്ചിരുന്ന യുവാവിന്റെ മൃതദേഹം പോസ്റ്റ്മോര്ട്ടത്തിനായി പുറത്തെടുക്കാനാകാതെ ആശുപത്രി പരിസരത്ത് ബന്ധുക്കളുടെയും, ആദിവാസികളുടെയും പ്രതിഷേധം ആളിക്കത്തുകയാണ്. കുറേ നാളായി പ്രദേശത്തെ കടകളില് നിന്ന് ഭക്ഷ്യവസ്തുക്കള് മോഷണം പോകുന്നത് പതിവാണെന്ന് പരാതിയുയര്ന്നിരുന്നു.
ഇതേതുടര്ന്ന് സിസിടിവി ദൃശ്യങ്ങളില് യുവാവിന്റെ മുഖവുമായി സാമ്യമുണ്ടെന്ന് കാണിച്ചാണ് യുവാവിനെ മര്ദ്ദിച്ചത്. യുവാവ് വീടുമായി ബന്ധമില്ലാതെ കഴിയുകയായിരുന്നുവെന്നും, പാറയിടുക്കിലാണു കഴിഞ്ഞിരുന്നതെന്നുമാണ് വിവരം. മധുവിന്റെ മൃതദേഹം അഗളിയിലെ സര്ക്കാര് ആശുപത്രിയില് സൂക്ഷിച്ചിരിക്കുകയാണ്.
