ധരുഹേര: പീഡിപ്പിച്ചയാളെ കാഴ്ചയില്ലാത്ത പെണ്കുട്ടി ശബ്ദത്തിലൂടെ തിരിച്ചറിഞ്ഞു കുടുക്കി. ഹരിയാനയിലെ ധരുഹേരയില് നടന്ന സംഭവത്തില് സനോജ് കുമാര് എന്നയാളാണ് പിടിയിലായത്. മാതാപിതാക്കള് മകളെ തനിച്ചാക്കി ഒരു ബന്ധുവിനെ കാണാന് പോയ സമയത്ത് വീടിനുള്ളില് ഒളിച്ചു കയറിയായിരുന്നു സനോജ്കുമാര് പെണ്കുട്ടിയെ പീഡിപ്പിച്ചത്. തുടര്ന്ന് വീട്ടില് തിരിച്ചെത്തിയ മാതാപിതാക്കള് മകളില് നിന്നും വിവരമറിഞ്ഞ് പോലീസില് പരാതി സമര്പ്പിക്കുകയായിരുന്നു.
പോലീസ് കേസെടുത്തെങ്കിലും പെണ്കുട്ടിക്ക് കണ്ണു കാണാന് കഴിയാത്തതിനാല് പ്രതിയാരാണെന്ന് തിരിച്ചറിയാന് പോലീസിന് കഴിഞ്ഞിരുന്നില്ല. തുടര്ന്ന് മാതാപിതാക്കളാണ് ആള്ക്കാരുടെ ശബ്ദം ശ്രദ്ധിക്കാനും കുറ്റവാളിയെ ശബ്ദത്തിലൂടെ തിരിച്ചറിയാനും മകള്ക്ക് നിര്ദേശം നല്കിയത്. തുടര്ന്ന് പെണ്കുട്ടി സമീപവാസികളായ നാട്ടുകാരുടെ ശബ്ദം ശ്രദ്ധിക്കാന് തുടങ്ങി. കഴിഞ്ഞ തിങ്കളാഴ്ച സനോജ് കുമാര് വീണ്ടും പെണ്കുട്ടിയുടെ വീട്ടിലെത്തിയപ്പോള് മാതാവ് വീട്ടിലുണ്ടായിരുന്നു. അമ്മയോട് പ്രതി സംസാരിച്ചു കൊണ്ടു നില്ക്കുന്നത് ശ്രദ്ധിച്ച പെണ്കുട്ടി തന്നെ ഉപദ്രവിച്ചത് ഈ വ്യക്തി തന്നെയാണെന്ന് മാതാവിനോട് പറയുകയായിരുന്നു.
അപകടം മണത്ത സനോജ് മാതാവിനെയും പെണ്കുട്ടിയെയും വിവരം പുറത്തു പറഞ്ഞാല് കൊല്ലുമെന്ന് ഭീഷണിപ്പെടുത്തിയെങ്കിലൂം പെണ്കുട്ടി മാതാപിതാക്കള്ക്ക് ഒപ്പം സ്റ്റേഷനില് എത്തി വിവരം പോലീസിനെ അറിയിച്ചു. വൈകാതെ സനോജ് അറസ്റ്റിലാകുകയും ചെയ്തു. ഇര പ്രായപൂര്ത്തിയാകാത്ത ആളായതിനാല് പോക്സോ അടക്കമുള്ള കുറ്റമാണ് പ്രതിക്കു മേല് ചുമത്തിയിരിക്കുന്നത്. ജാര്ഖണ്ഡ് സ്വദേശികളായ പെണ്കുട്ടിയും കുടുംബവും ഫാക്ടറി ജോലിയുമായി ബന്ധപ്പെട്ട് 20 ദിവസം മുമ്പാണ് ഈ നാട്ടില് എത്തിയത്.
