ലണ്ടന്: എങ്ങനെ മറ്റു പ്രപഞ്ചങ്ങളെ കണ്ടെത്താം, എങ്ങനെ പ്രപഞ്ചാവസാനം പ്രവചിക്കാം? മരണത്തോട് അടുക്കുമ്പോള് സ്റ്റീഫന് ഹോക്കിങ്ങിനു പറയാനുണ്ടായിരുന്നത് ഇവയായിരുന്നു. തോമസ് ഹെര്ടോഗിനൊപ്പമുള്ള പ്രബന്ധം പൂര്ത്തിയാക്കിയശേഷമാണു ഹോക്കിങ് എന്ന മഹാപ്രതിഭ വിടവാങ്ങിയത്.
പ്രബന്ധം പൂര്ത്തിയാക്കിയശേഷം രണ്ടാഴ്ചകഴിഞ്ഞാണു അദ്ദേഹത്തെ മരണം കൂട്ടിക്കൊണ്ടുപോയത്. അദ്ദേഹത്തിന്റെ സംസ്കാരം ഈ മാസമുണ്ടാകുമെന്നാണു സൂചന.
ബഹുപ്രപഞ്ചങ്ങളെക്കുറിച്ചാണ് അദ്ദേഹം അവസാനകാലത്ത് കൂടുതലായി പഠിച്ചത്. മഹാവിസ്ഫോടനത്തിനുശേഷം നിരവധി പ്രപഞ്ചങ്ങള് ഉണ്ടായെന്നാണു ഹോക്കിങ് സമര്ഥിച്ചത്. ''എ സ്മൂത്ത് എക്സിറ്റ് ഫ്രം എറ്റേണല് ഇന്ഫ്ളേഷന്'' എന്നാണു പ്രബന്ധത്തിന്റെ പേര്. ശാസ്ത്രത്തിന്റെ അടിസ്ഥാനത്തില് ബഹുപ്രപഞ്ചം സംബന്ധിച്ച സിദ്ധാന്തം പരീക്ഷിക്കാന് ഹോക്കിങ് ആഗ്രഹിച്ചതായി ഹെര്ടോഗ് പറഞ്ഞു.
നക്ഷത്രങ്ങളില് ഊര്ജോല്പാദനം അവസാനിക്കുന്ന കാലമുണ്ടാകുമെന്നും അന്നു നമ്മുടെ പ്രപഞ്ചം ഇരുട്ടിലേക്കു പോകുമെന്നും ഹോക്കിങ് കുറിച്ചു. മറ്റു പ്രപഞ്ചങ്ങളെ പരിശോധിക്കുന്നതു പ്രായോഗികമല്ലെന്നാണു കരുതുന്നതെന്നു കോസ്മോളജി പ്രഫസര് കാര്ലസ് ഫ്രെങ്ക് പറഞ്ഞു.
ഇതു കണ്ടെത്തിയാല് പ്രപഞ്ചത്തെ സംബന്ധിച്ച വീക്ഷണം മാറുമെന്ന് അവര് പറഞ്ഞു. ഹോക്കിങ്ങിന്റെ സംസ്കാരത്തിനുള്ള തയാറെടുപ്പുകള് കുടുംബാംഗങ്ങള് തുടങ്ങി. ഈ മാസം കേംബ്രിഡ്ജില് സംസ്കാരം നടത്താനാണു നീക്കം.
മുന് ഭാര്യമാരായ ജെയിന്, എലെയ്ന് എന്നിവരും അദ്ദേഹത്തിന്റെ മൂന്ന് മക്കളുമാണ് അന്തിമ തീരുമാനമെടുക്കേണ്ടത്. ചടങ്ങിലേക്ക് 500 അതിഥികളെ ക്ഷണിക്കാനാണു നീക്കം. അതേസമയം, ഹോക്കിങ്ങിന്റെ തലച്ചോര് ഗവേഷണത്തിനു വിട്ടുനല്കണമെന്ന ആവശ്യം ഉയര്ന്നിട്ടുണ്ട്. മോട്ടോര് ന്യൂറോണ് രോഗത്തെക്കുറിച്ചു ഗവേഷണം നടത്തുന്നവരും ശരീരഭാഗങ്ങള് ആവശ്യപ്പെട്ടിട്ടുണ്ട്. ആല്ബട്ട് ഐന്സ്റ്റീന് മാതൃകയില് ഹോക്കിങ്ങിന്റെ തലച്ചോര് വിവിധ ഗവേഷണ സ്ഥാപനങ്ങള്ക്കു വീതിച്ചു നല്കാനും നീക്കമുണ്ട്.
എന്നാല്, ഇക്കാര്യത്തില് അന്തിമ തീരുമാനമെടുക്കേണ്ടത് അദ്ദേഹത്തിന്റെ കുടുംബാംഗങ്ങളാണെന്ന് ഓക്സ്ഫഡ്, കേംബ്രിഡ്ജ് സയന്സ് കമ്യൂണിറ്റി അറിയിച്ചു. ശാസ്ത്രലോകത്തിന്റെ ആവശ്യത്തിനു കുടുംബാംഗങ്ങള് അനുമതി നല്കുമെന്നാണു പ്രതീക്ഷ.
