വയറില്‍ ക്യാന്‍സറാണെന്ന് വെളിപ്പെടുത്തി കെആര്‍കെ: അവസാന ആ രണ്ടു ആഗ്രഹങ്ങള്‍ തുറന്നു പറഞ്ഞുകൊണ്ട് കണ്ണീരിലാഴ്ത്തുന്ന കുറിപ്പ്

പ്രശസ്തര്‍ക്കെതിരെ അതിരൂക്ഷ വിമര്‍ശനമുയര്‍ത്തിയ വിവാദനായകന്‍ കെആര്‍കെ എന്ന കമാല്‍ റഷീദ് ഖാന്റെ ഞെട്ടിക്കുന്ന വെളിപ്പെടുത്തല്‍. വയറില്‍ ക്യാന്‍സര്‍ ആണെന്നാണ് കെആര്‍കെ വെരിഫൈഡ് ട്വിറ്റര്‍ അക്കൗണ്ടില്‍ വെളിപ്പെടുത്തിയിരിക്കുന്നത്.

വയറില്‍ ബാധിച്ച ക്യാന്‍സര്‍ മൂന്നാം ഘട്ടത്തിലെത്തിയിരിക്കുന്നുവെന്നും, ഒന്നോ രണ്ടോ വര്‍ഷം കൂടി മാത്രമേ ജീവിച്ചിരിക്കാന്‍ സാധ്യതയുള്ളുവെന്നും വിമര്‍ശകരുടെ വായടിപ്പിച്ചുകൊണ്ട് കെആര്‍കെ പറയുന്നു. ട്വിറ്ററില്‍ പ്രസിദ്ധീകരിച്ച വാര്‍ത്താക്കുറിപ്പിലാണ് ഇക്കാര്യം വ്യക്തമാക്കിയിരിക്കുന്നത്.

എന്നാല്‍ ഇക്കാര്യം അറിഞ്ഞ് ആശ്വസിപ്പിക്കാന്‍ ആരും തന്നെ വിളിക്കേണ്ടതില്ലെന്നും, ആരുടെയും സഹതാപം ആവശ്യമില്ലെന്നും, തന്നെ വിമര്‍ശിക്കുന്നവരോടും, വെറുക്കുന്നവരോടും സ്‌നേഹം മാത്രമേ ഉള്ളുവെന്നും കെആര്‍കെ പറയുന്നു. എന്നാല്‍ തനിക്ക് വേദനയുള്ളത് രണ്ടേ രണ്ട് കാര്യങ്ങളില്‍ മാത്രമാണ്. തനിക്ക് സാധിക്കാതെ പോയ ആ രണ്ടു ആഗ്രഹങ്ങളും കെആര്‍കെ വെളിപ്പെടുത്തി.

ഒരു എ ഗ്രേഡ് സിനിമ നിര്‍മ്മിക്കണം. രണ്ടാമത്തേത് അമിതാഭ് ബച്ചനൊപ്പം അഭിനയിക്കുകയോ, അദേഹത്തെ വെച്ച് ഒരു ചിത്രം നിര്‍മ്മിക്കുകയോ ചെയ്യണം. ഈ രണ്ടു ആഗ്രഹങ്ങളും തന്നോടൊപ്പം തന്നെ മരിച്ചു പോകുമെന്നും കെആര്‍കെ പറയുന്നു. ഈ സമയം സ്‌നേഹം നിറഞ്ഞ തന്റെ കുടുംബത്തോടൊപ്പമാണ് താന്‍ ചിലവിടുന്നതെന്നും അദേഹം വ്യക്തമാക്കി. വെറുക്കുന്നവരേയും സ്‌നേഹിക്കുന്നവരെയും ഒരു പോലെ സ്‌നേഹിക്കുന്നു എന്നു പറഞ്ഞാണ് കെആര്‍കെയുടെ കുറിപ്പ് അവസാനിക്കുന്നത്.

രണ്ടാമൂഴം സിനിമയാകുന്നുവെന്ന പ്രഖ്യാപനത്തിനു പിന്നാലെ മോഹന്‍ലാലിനെ ഛോട്ടാ ഭീം എന്ന കാര്‍ട്ടൂണ്‍ കഥാപാത്രത്തോട് ഉപമിച്ച് കെആര്‍കെ രംഗത്തെത്തിയതോടെയാണ് മലയാളികള്‍ക്കിടയില്‍ കുപ്രസിദ്ധനായത്. മോഹന്‍ലാലിനെ ജോക്കര്‍ എന്നു വിളിച്ചും ഇയാള്‍ പരിഹസിച്ചിരുന്നത് ആരാധകരെ ചൊടിപ്പിച്ചിരുന്നു.