ചെന്നൈ: തമിഴ്നാട്ടില് ഇവി രാമസ്വാമിയുടെ പ്രതിമ തകര്ക്കപ്പെടണമെന്ന പ്രസ്താവനയുടെ ചൂട് ഇതുവരെ മാറിയിട്ടില്ല. അപ്പോഴേയ്ക്കും അടുത്ത വിവാദവുമായി എത്തിയിരിക്കുകയാണ് തമിഴ്നാട് ബിജെപി നേതാവ് എച്ച് രാജ. കനിമൊഴിക്കിട്ടാണ് ഇത്തവണ കുത്തിയത്.
കനിമൊഴി ഡിഎംകെ നേതാവ് എം കരുണാനിധിയുടെ അവിഹിത സന്തതിയാണെന്നും അവിഹതബന്ധത്തിലൂടെ ഒരു കുട്ടിയെ പ്രസവിച്ചയാളുമാണെന്ന രാജയുടെ ട്വീറ്റ് വന് വിവാദമാണ് ഉയര്ത്തിയിരിക്കുന്നത്.
ദി വീക്ക് റിപ്പോര്ട്ടറായ മാധ്യമപ്രവര്ത്തകയുടെ കവിളില് തലോടിയ ഗവര്ണറെ വിമര്ശിച്ച് ഡിഎംകെയുടെ രാജ്യസഭാ എംപി കൂടിയായ കനിമൊഴി രംഗത്ത് വന്നതിന് തൊട്ടു പിന്നാലെയാണ് കനിമൊഴിയെ ആക്ഷേപിച്ച് എച്ച് രാജ ട്വീറ്റ് ഇട്ടത്. ഇന്ന് രാജ്ഭവനില് തമിഴ്നാട് ഗവര്ണര് ബന്വാരിലാല് പുരോഹിത് വിളിച്ച വാര്ത്താസമ്മേളനത്തിനിടയില് മാധ്യമപ്രവര്ത്തകയുടെ കവിളില് തൊട്ടത് വന് വിവാദമായിരുന്നു. മാധ്യമപ്രവര്ത്തകയെ പിന്തുണച്ച് നിരവധിപ്പേര് രംഗത്തെത്തിയവരില് കനിമൊഴിയും ഉണ്ടായിരുന്നു.
സര്വകലാശാല അധികൃതര്ക്ക് വഴങ്ങിക്കൊടുക്കാന് പെണ്കുട്ടികളെ അധ്യാപിക പ്രേരിപ്പിച്ചെന്ന തമിഴ്നാടിനെ ഇളക്കി മറിച്ചിരിക്കുന്ന വിവാദത്തില് കുടുങ്ങിയ വിരുദുനഗര് ജില്ലയിലെ അറപ്പുകോട്ടൈ ദേവാംഗ ആര്ട്സ് കോളേജിലെ ഗണിതവകുപ്പ് പ്രഫസര് നിര്മ്മലാ ദേവി തനിക്ക് ഗവര്ണറുമായി ബന്ധമുണ്ടെന്ന് വ്യക്തമാക്കിയിരുന്നു. ഇക്കാര്യത്തില് വിശദീകരണം നടത്തുന്നതിനായിരുന്നു വാര്ത്താസമ്മേളനം വിളിച്ചത്. ഇതിനിടയിലാണ് തന്നോട് ചോദ്യങ്ങള് ചോദിച്ച മാധ്യമപ്രവര്ത്തകയുടെ കവിളില് ബന്വാരിലാല് തലോടിയത്. ദ വീക്കിലെ റിപ്പോര്ട്ടര് ലക്ഷ്മി സുബ്രഹ്മണ്യന്റെ കവിളിലാണ് ബന്വാരിലാല് സ്പര്ശിച്ചത്.
പെരുമാറ്റത്തെ രൂക്ഷമായി വിമര്ശിച്ച് ലക്ഷ്മി സുബ്രഹ്മണ്യന് ട്വീറ്റ് ചെയ്യുകയായിരുന്നു. ഒരുപാട് മനോവിഷമവും ദേഷ്യവും തോന്നുന്നുണ്ട് മിസ്റ്റര് ഗവര്ണര് ബന്വാരിലാല് പുരോഹിത്. പലവട്ടം മുഖം കഴുകി. ഇപ്പോഴും അതില് നിന്ന് മോചിതയാകാന് സാധിക്കുന്നില്ല. നിങ്ങള്ക്ക് ഒരുപക്ഷേ ഇത് അഭിനന്ദനം സൂചിപ്പിക്കുന്ന പ്രവര്ത്തിയോ മുത്തശ്ശന്റെ പെരുമാറ്റമോ ആയിരിക്കും. പക്ഷേ എന്നെ സംബന്ധിച്ച് നിങ്ങള് ചെയ്തത് തെറ്റാണ്്-ലക്ഷ്മി ട്വീറ്റ് ചെയ്തു. എംപി കനിമൊഴിയും ലക്ഷ്മിയെ പിന്തുണച്ചെത്തിയിരുന്നു.
ത്രിപുരയില് സിപിഎമ്മിന്റെ മേല്ക്കോയ്മ അവസാനിപ്പിച്ച് ബിജെപി അധികാരത്തില് എത്തിയതിന് പിന്നാലെ ലെനിന്റെ പ്രതിമ തകര്ത്തപ്പോള് അതുപോലെ തന്നെ തമിഴ്നാട്ടിലെ സാമൂഹ്യപരിഷ്ക്കര്ത്താവ് ഇവി രാമസ്വാമിയുടെ പ്രതിമയും തകര്ക്കപ്പെടണമെന്ന രാജയുടെ ട്വീറ്റ് നേരത്തേ വിവാദമായിരുന്നു. തമിഴ്നാടിന്റെ വിവിധ ഭാഗങ്ങളില് പ്രതിമകള് തകര്ക്കപ്പെടുകയും ചെയ്തിരുന്നു.
