മലപ്പുറം : പരസ്ത്രീ ബന്ധം ആരോപിച്ച് ഭര്ത്താവിനെ ആസിഡ് ഒഴിച്ചു കൊലപ്പെടുത്തിയ കേസില് പ്രതിയും ഭാര്യയുമായ സുബൈദയെ കുടുക്കിയത് സിസിടിവി ദൃശ്യങ്ങള്. പൊള്ളലേറ്റ ബഷീറിനെ മലപ്പുറം വാറങ്കോട്ടെ ആശുപത്രിയില് പ്രവേശിപ്പിക്കാന് കൊണ്ടുവരുമ്പോഴാണ് സുബൈദ ആസിഡ് ഒഴിഞ്ഞ കന്നാസ് ആശുപത്രിക്ക് മുന്പിലെ തോട്ടിലേക്ക് വലിച്ചെറിഞ്ഞത്. ഈ ദൃശ്യങ്ങള് സിസിടിവി ദൃശ്യങ്ങളില് നിന്നും കണ്ടെടുത്തു. ആസിഡ് വാങ്ങാനെത്തിയ സ്ത്രീയെ മഞ്ചേരിയിലെ കടക്കാരന് തിരിച്ചറിയുകയും ചെയ്തു.
സംഭവദിവസം മഞ്ചേരിയിലെ കടയിലെത്തി സുബൈദ നേരിട്ടാണ് ആസിഡ് വാങ്ങിയത്. മുഖത്തും ശരീരത്തിന്റെ മൂന്ഭാഗത്തും ഒഴിക്കാന് കഴിയുന്ന പാത്രം വീട്ടില തയ്യാറാക്കി വെച്ചു. രാത്രി 11 ന് കൃത്യം നടപ്പാക്കുകയും ചെയ്തു. ബഷീറും സുബൈദയും മാത്രമായിരുന്നു വീട്ടില് ഉണ്ടായിരുന്നത്. വീട്ടില് നിന്നും ബഷീറിനെ ആശുപത്രിയിലാക്കാന് പുലര്ച്ചെ രണ്ടു വരെ കാത്തിരുന്നത് എന്താനാണെന്ന ചോദ്യത്തിന് സുബൈദയ്ക്ക് കൃത്യമായ മറുപടി പറയാന് ഇല്ലായിരുന്നു. 52 കാരനായ ബഷീര് മരിച്ച് ഏഴാം ദിവസമാണ് 48 കാരിയായ സുബൈദയാണ് കൊലയാളി എന്ന് പോലീസ് തിരിച്ചറിഞ്ഞത്. ആസിഡ് ഒഴിച്ച ആളെ കുറിച്ചുള്ള ചോദ്യങ്ങള്ക്ക് സുബൈദ ഓരോ കഥകള് മെനയുകയായിരുന്നു.
താമരശ്ശേരിയിലുള്ള മൂന്ന് പേരും മലപ്പുറത്തെ ഒരു പഴ വ്യാപാരിയും ഇതോടെ സംശയത്തിന്റെ നിഴലിലായി. നീണ്ട ചോദ്യം ചെയ്യലില് നിന്നും രക്ഷപ്പെടാനാകില്ല എന്ന് വന്നതോടെയാണ് സുബൈദ പോലീസിന് മുന്നില് എല്ലാം തുറന്നു പറയാന് തയ്യാറായത്. ഭര്ത്താവിനു പരസ്ത്രീ ബന്ധമുണ്ടെന്ന സംശയമാണ് കൊലപാതകത്തിലേക്കു നയിച്ചത്. കഴിഞ്ഞ 20നു രാത്രി ആസിഡൊഴിച്ച് പൊള്ളലേറ്റ ബഷീറിനെ മെഡിക്കല് കോളജ് ആശുപത്രിയില് പ്രവേശിപ്പിച്ചിരുന്നു. ചികിത്സയിലിരിക്കെ 23ന് മരിച്ചു.
