സിഡ്നി : 104 വയസ്സ് പിന്നിട്ടിട്ടും മരിക്കാത്തതിനെ തുടര്ന്ന് ജീവിതം മടുത്ത ശാസ്ത്രജ്ഞന് മരിക്കാനായി നാടുവിട്ടു. ഓസ്ട്രേലിയന് ശാസ്ത്രജ്ഞനായ ഡേവിഡ് ഗൂഡാള് ആണ് മരിക്കാനായി ഒരു വന്കരയില് നിന്നും മറ്റൊരു വന്കരയിലേയ്ക്ക് പോകാന് തയ്യാറെടുക്കുന്നത്.
ഓസ്ട്രേലിയയില് ദയാവധം നിയമവിധേയമല്ലാത്തതിനാല് സ്വിറ്റ്സര്ലന്റിലെത്തി മരണപ്പെടാനാണ് സസ്യശാസ്ത്രജ്ഞനും എക്കോളജിസ്റ്റുമായ ഗൂഡാളിന്റെ തീരുമാനം. സ്വിറ്റ്സര്ലന്റിലെ ബേസല് ലൈഫ് സര്ക്കിള് ക്ലിനിക്കിനെയാണ് ഗൂഡാള് ദയാവധത്തിനായി സമീപിച്ചിരിക്കുന്നത്. മരിക്കാനായി ഇന്ന് യാത്രതിരിക്കുന്ന ഗൂഡാളിനെ ദയാവധ അനുകൂല സംഘടനയായ എക്സിറ്റ് ഇന്റര്നാഷണലില് നിന്നുള്ള ഒരു നഴ്സും അനുഗമിക്കുന്നുണ്ട്.
കഴിഞ്ഞ 20 വര്ഷമായി എക്സിറ്റ് ഇന്റര്നാഷണലിലെ അംഗമായ ഗൂഡാള്, ജീവിതം അവസാനിപ്പിക്കാന് ആഗ്രഹിക്കുന്നവരെ മരിക്കാന് സഹായിക്കണമെന്ന വാദത്തെ പിന്തുണയ്ക്കുന്ന ആളായിരുന്നു. 'ഈ പ്രായം വരെ ജീവിച്ചതില് വലിയ ദു:ഖമുണ്ട്. താന് സന്തോഷവാനല്ലെന്നും മരിക്കാന് ആഗ്രഹിക്കുന്നു'വെന്നും 104-ാം പിറന്നാള് ദിനത്തില് ഗൂഡിള് പറഞ്ഞിരുന്നു. 1914 ഏപ്രിലില് ലണ്ടനിലാണ് ഗുഡാള് ജനിച്ചത്.
