കളത്തില് പ്രതിബദ്ധതയുടെ ആള്രൂപമാണ് കേരളാ ബ്ളാസ്റ്റേഴ്സ് നായകന് സന്ദേശ് ജിംഗാന്. എതിര്മുന്നേറ്റ നിരയുടെ എല്ലാ നീക്കങ്ങളും പെനാല്റ്റി ബോക്സില് തീര്ത്തു കളയുന്ന ബ്ളാസ്റ്റേഴ്സിന്റെ വന്മതില് കളത്തില് മാത്രമല്ല പുറത്തും അങ്ങിനെ തന്നെ. അമര് തൊമാര് കൊല്ക്കത്ത നീട്ടിയ അഞ്ചു കോടിയുടെ വമ്പന് ഓഫര് തള്ളി മഞ്ഞപ്പടയുടെ നായകന് ബ്ളാസ്റ്റേഴ്സില് കരാര് തീരും വരെ തുടരാന് തീരുമാനിച്ചു.
ജിംഗാന്റെ കരാര് രണ്ടു വര്ഷം കൂടി ബാക്കിയുണ്ട്. ചെറുപ്രായത്തില് തന്നെ ടീമിന്റെ നായകസ്ഥാനത്ത് എത്തിയ ജിംഗാനെ കൂറ്റന് ഓഫര് കിട്ടിയിട്ടും ടീമിനെ വിടാതിരിക്കാന് കാരണം മലയാളി ആരാധകര് നിറഞ്ഞു നല്കുന്ന സ്നേഹമാണ്.
ഇന്ത്യന് സൂപ്പര്ലീഗില് ഏറ്റവും വലിയ ആരാധക പിന്തുണയുള്ള ടീമാണ് കേരളാ ബ്ളാസ്റ്റേഴ്സിന് കളിയുള്ളിടത്തെല്ലാം മലയാളികള് എത്തി പിന്തുണ നല്കാറുണ്ട്. ആദ്യ സീസണില് 1.20 കോടിക്ക് കരാര് ചെയ്ത ജിംഗാനുമായുള്ള കാലാവധി കഴിഞ്ഞ വര്ഷം ടീം മൂന്ന് വര്ഷത്തേക്ക് കൂടി നീട്ടിയിരുന്നു. എന്നാല് ഇത്തവണ അനസ് എടത്തൊടിക ബ്ളാസ്റ്റേഴ്സിലേക്ക് വന്നതോടെയാണ് എടികെ ജിംഗാനെ കുരുക്കാന് ശ്രമിച്ചത്. മൂന്ന് വര്ഷത്തേക്ക് അഞ്ചുകോടി പ്രതിഫലവും 50 ലക്ഷം ഫ്രാഞ്ചൈസിയ്ക്ക് കൈമാറ്റത്തുകയുമായിരുന്നു വാഗ്ദാനം. എന്നാല് ഇന്ത്യ മുഴുവനും കിട്ടുന്ന ആരാധക പ്രോത്സാഹനത്തിന്റെ വിധേയത്വം ബ്ളാസ്റ്റേഴ്സ് നായകനെ പിന്തിരിപ്പിക്കുകയായിരുന്നു.
എടികെയുടെ വാഗ്ദാനത്തെ മാനിക്കുന്നു എങ്കിലും ബ്ളാസ്റ്റേഴ്സ് തന്റെ ഹൃദയത്തോട് ചേര്ന്നു നില്ക്കുന്ന ക്ളബ്ബാണെന്നാണ് ജിംഗാന് പറയുന്നത്. ഈ അസാധാരണ ആരാധകരുടെ സ്നേഹം വാക്കുകളിലെഴുതാനാകില്ലെന്നാണ് ജിംഗാന് പറയുന്നത്. അതില് താന് വീണു പോകുന്നെന്നും അതില് നിന്നും ഒരു ശതമാനം പോലും നീങ്ങാന് ആഗ്രഹിക്കുന്നില്ല എന്നും ജിംഗാന് കഴിഞ്ഞ ദിവസം ഒരു ദേശീയ മാധ്യമത്തോട് പറഞ്ഞു.
ആദ്യ സീസണില് പരിശീലകനും മാര്ക്കി പ്ളേയറുമായിരുന്ന ഡേവിഡ് ജെയിംസിന്റെ കണ്ടെത്തലായ സന്ദേശ് ജിംഗാന് പഴയ പരിശീലകന് സ്റ്റീവ് കോപ്പലിന്റെയും ഷോപ്പിംഗ് ലിസ്റ്റില് പെട്ട താരമാണ്. ജംഷെഡ്പൂര് എഫ്സി യുടെ പരിശീലകനാണ് ഇപ്പോള് സ്റ്റീവ് കോപ്പല്. അതിനിടയില് 37 കാരന് സെഡ്രിക് ഹെംഗ്ബര്ത്ത് ഉള്പ്പെടെ പഴയ അഞ്ചു താരങ്ങളെയും ബ്ളാസ്റ്റേഴ്സ് പദ്ധതി ഇടുന്നതായിട്ടാണ് സൂചനകള്. കഴിഞ്ഞ സീസണില് കളിച്ച ജാക്കിചന്ദ് സിംഗ് ടീം വിട്ടപ്പോള് മികച്ച പ്രകടനം നടത്തിയ മറ്റൊരു താരം ലാല്റുവാത്താര ടീമില് തുടരുന്നുണ്ട്.
